1, 2. Otjikwaye tji tja ṱuna kovandu momuano omuvi tjinene, nu ouṋe ngwa tjita nao?

OZONGOZE, omarambe worutjeno, ovihauto, nozoiskasa oviṋa vya kandino mbya tjita kutja ehupo reyuva arihe ri rire epupu. Nungwari oviṋa vyarwe vyouye wa kandino vya tjita kutja ehupo ri rire enaumba tjinene, oviṋa tjimuna ozohanga zondjembo, ovipamuke mbi sirwa mehi, nomiku vyarwe ominawanga nousarute, okutamuna tjiva uriri. Nu wina, pe notjiṋa tjarwe otjikuru tjinene pu vyo avihe nu tji tja ṱuna kovandu avehe momuano omuvi tjinene. Otjikeṋa ho? Ovizeze! Oko okuhungira otjiṋa tji motjiwa nawa kutja kauatjiri kokutja u pukisa omundu warwe. Hapo nu ouṋe ngwa uta otjizeze otjitenga? Johanes 8:44 Jesus Kristus wa tja “Satan” o “ihe yovizeze.” (Lesa Johanes 8:44.) Nu oruṋe tja hungira otjizeze otjitenga?

² Za ri ozombura omayovi omengi tjinene nḓa kapita motjikunino tja Eden. Ovakupasane ovatenga, Adam na Eva, aa ve kara nondjoroka mo Paradisa ndji va pewa i Omuute wa wo. Okuzambo, Omudiaboli a hitire pokati mbo. Eye aa tjiwa kutja Mukuru wa rakiza ovakupasane mbo kutja a ve ri “komuti mbu yandja ondjiviro okutjiwa ouwa nouvi,” poo mave ṱu tji ve ha puratenene. Nandarire kutja va raerwa nao, okupitira monyoka, Satan wa raera Eva a tja: “Kamambo! Indee uri, kamaamu ṱu [ootjizeze otjitengatenga]! Nungwari Ndjambi ma tjiwa kutja tji mwa ri ku wo, omeho weṋu maye  paturuka, amu sana ku Ndjambi omuini namu tjiwa ouwa nouvi.”​—Gen. 2:15-17; 3:1-5.

3. Ongwaye otjizeze Satan tja kora tji tjari otjivi tjinene, nu kwa kongorera ye?

³ Satan wa kora otjizeze otjivi tjinene, orondu eye aa tjiwa nawa kutja Eva tja kambura mu ye nu ari otjihape ho ma koka. Adam na Eva ka ve puratenene kerakiza ra Jehova nu va koka. (Gen. 3:6; 5:5) Otjiṋa tjarwe otjihihamisa, “onḓiro otji ya tuurunga movandu avehe” mena rourunde mbo. Mouatjiri, “onḓiro ya honaparera ovandu avehe . . . , nangarire imba mbe ha tjitire ouvi momuhingo tjingewo mbwi Adam ma tjitire ouvi.” (Rom. 5:12, 14) Moruveze rokuhupa mondjoroka, nokuhina okukoka tjimuna Mukuru tja vangere, ovandu nai ve yandera ‘pozombura omirongo hambombari; nu tji ve nomasa tjinene, ve vaza kozombura omirongo hambondatu.’ Nungwari ozombura nḓa ze ‘tu etera, orukondjo nomaputi.’ (Eps. 90:10) Tjiri imbi ovihihamise, nu omena rotjizeze tja Satan uriri!

4. (a) Omapuriro yeṋe ngu matu hepa okuzira? (b) Otja kEpsalme 15:1, 2, ouṋe ngu ma yenene okurira epanga ra Jehovah?

⁴ Momuano wokukahurura ovitjitwa vyOmudiaboli, Jesus wa tja: “Keya rora okuungurira ouatjiri, mu ye tjinga amu hi na imbwi ouatjiri.” Satan ngamba ke nouatjiri, nu u kayenda komurungu ‘okupukisa ouye auhe’ novizeze vye. (Omavan. 12:9) Eṱe katu nokuvanga okupukisiwa i yOmudiaboli. Morupa ndwi matu katara komapuriro yetatu nga: Satan u pukisa vi ovandu? Ongwaye ovandu tjiva suvera okukora ovizeze? Matu raisa vi kutja tu “hungira ouatjiri” oruveze aruhe, kokutja atu ha pandjara oupanga wetu na Jehova, tjimuna Adam na Eva tji va pandjara?​—Lesa Epsalme 15:1, 2.

5. Satan u pukisa vi ovandu ndino?

⁵ Omuapostele Paulus aa tjiwa kutja “Satan ke nokusokutjita otjurutjutju ku eṱe. Eṱe ouripura we tu u i nawa.” (2 Kor. 2:11) Matu tjiwa kutja ouye auhe, nozongamburiro zoposyo, nozopolotika nḓa zunḓaka, novarandise ovakorokope, ve ri kehi yomananeno wOmudiaboli. (1 Joh. 5:19) Kunao eṱe katu kumisiwa, indu Satan nozondemone ze tji ve tjita kutja ovandu mbe ri povihavero vyo kombanda ve rire “ovanavizeze.” (1 Tim. 4:1, 2) Tjiri imbo ouatjiri, ovandu mbe nozongetjefa ozonene ve tunduuza omarandisiro woviṋa mbi zunḓa otutu twovandu nokutjiukisa oviṋa mbi hi nouatjiri kotjimariva otjingi.

6, 7. (a) Ongwaye ovanane vozongamburiro mbe kora ovizeze tjiri tji veri ovanandjo? (b) Ovizeze viṋe mbi wa zuva okuza kovanane vozongamburiro?

⁶ Ovanane vozongamburiro zoposyo mbe kora ovizeze tjiri ovanandjo mena rokutja ovizeze mbi ve kora vi twa oruyaveze rovandu mbe puratena ku wo moumba. Omundu tja yakura omahongero wovizeze ngo na tjiti otjiṋa tji tji ha yakurwa i Mukuru, omundu ngo ma pandjara omuinyo waaruhe. (Hos. 4:9) Jesus aa tjiwa kutja ovanane vozongamburiro moruveze rwe va turire ondjo mena rovizeze mbyaa ve kora. Eye we ve raera momirungu vyawo kutja: “Oweee ku eṋe, zonongo zOmatwako nOvafarisei, eṋe ovanatjavivi! Eṋe mu tapakaṋa okuvare nehi arihe okukapaha omuritanaure umwe, neye tje ritanaura, arire tji mwe mu zunḓire ko kutja a yende kotjovasengwa [omayandekero nga kongaaruhe] potuvari okukapita eṋe oveni!” (Mat. 23:15) Jesus wa pangura ovanane vozongamburiro mbo nombanguriro yomasa. Owo tjiri vari ‘ovanatje vaihe, okutja Satan, omuzepe.’​—Joh. 8:44.

⁷ Ovahonge, novapristeri poo varwe mbe nomaisaneno warwe wondjozikiro tjimuna ngo, novanane vozongamburiro va takavara mouye ndino. Tjimuna ovanane vozongamburiro meserewondo etenga, owo ve “kondja okutjaera ouatjiri” okuza mEmbo ra Mukuru nu “ve  pimba ouatjiri wa Njambi novizeze.” (Rom. 1:18, 25) Owo ve handjaura omahongero woposyo tjimuna wokutja “tjiwa yamwa otjikando otjitenga, wa yamwa nga kongaaruhe,” omuinyo womundu kaukoka, nu omundu tja koka omuinyo u kahupa morutu rwarwe, nokutja Mukuru u yakura ovatundukavena, novarumendu vevari po ovakaendu vevari okukupasana.

8. Otjizeze tjiṋe tji tu undja ovandu vozopololtika okuhungira nai, posi yokutja matu sokukara noumune uṋe?

⁸ Ovanane vozopolotika ve ungurisa ovizeze okupukisa ovandu. Tjimwe tjovizeze tji matu kazuva eendu ovandu tji mave tja “ku nohange norusuvo!” Posi yokutja “ouo mave uererekua omanjoneno.” Kamaa tu vanga okupukisiwa i yovizeze vyawo vyokuvanga okumunikisa aa yo ouye mbwi kaunoumba! Tjiri, matu tjiwa kutja ‘ejuva indi ri tjendjereke eṋe otj’ erunga.’​—1 Tes. 5:1-4, EEP.

9, 10. (a) Ongwaye ovandu tji ve kora ovizeze, nu ku kongorera ye? (b) Matu sokuzemburuka ye ohunga na Jehova?

⁹ Indu tji pa memwa otjiṋa otjipe poo tji tja ṱunwa nawa na tji rire otjitjiukwa, ovandu ve pitisa oviṋa ovingi mbi ri nao poo ve yenena okumema vyarwe ovingi. Ovizeze wina vi handjauka mongaro ndja sana ngo. Okukora ovizeze kwa rira oviṋa uriri mouye ndino, nu kavandu ovananḓengu motjiwaṋa mbe kora ovizeze uriri. Orupa ndwi “Why We Lie” ndwa tjangwa i Y. Bhattacharjee rwa tja, “okukora ovizeze ya rira oviṋa mbya kakaterera movandu.” Ovandu potuingi ve kora ovizeze mokuvanga okuritjevera oveni poo ve kare notjihako tjokombanda. Ve kora ovizeze okuhoreka ozondataiziro zawo nokupukisa varwe poo kutja ve mune ovimariva ovingi noviṋa vyarwe oviwa. Orupa ndwi wina rwa tja, pe novandu mbe “kora ovizeze nokuhina ondira, momiano avihe, kovandu mbu ve hi nokutjiwa, kovaungure ovakwao, omapanga, novasuverwa vawo.”

¹⁰ Okukora ovizeze ku eta ovikongorereko vya ye? Ovandu kave kara nongamburiro move rukwao noupanga weṋu u teka. Ripura uriri kutja otjihihamise tjomutima pu pe ṱa pi, indu omukaendu tja katuka orukupo na kora ovizeze komurumendu we omuṱakame mokuhoreka ouvi mbo. Poo omurumendu ngu tatumisa omukaendu we novanatje, nungwari komurungu wovandu a raisa tjimuna otjiuru tjonganda otjiwa. Posi yokutja, ngatu zemburuke kutja Jehova u muna ovandu otja imbo, mena rokutja “avihe vi munika nu vi ri poruhaera komurungu we.”​—Hebr. 4:13.

11. Otjihorera tja Ananias na Safira matji tu hongo ye? (Tara kotjiperendero pomautiro worupa ndwi.)

¹¹ Otjotjihorera, Ombebela i tu raera omuano ‘Satan mbwa rora omutima’ wOvakriste ovakupasane veserewondo etenga okukora ovizeze ku Mukuru. Ananias na Safira va tjita otjineya kovaapostele. Owo va randisa ouini wawo tjiva nu va yandja tjiva vyovimariva kovaapostele uriri. Ovakupasane mba aave vanga okuriraisa kutja ovandu ovawa kombongo, aa yo owo ovandu ozondjandje. Nungwari, Jehova wa muna oviṋa mbi va tjita, nu we ve verera oviṋa mbyo.​—Oviung. 5:1-10.

12. Ovandu mbe he ri tanaura komauvi wawo, na imba mbe kora ovizeze mave katjitwa vi, nu omena raye?

¹² Jehova u noumune uṋe ohunga nokukora ovizeze? Satan novandu avehe mbe he ri tanaura komauvi wawo, na imba mbe mu horera mokukora ovizeze mave kayumbwa “merindi romuriro.” (Omavan. 20:10; 21:8; Eps. 5:6) Omena raye? Jehova u vara ovandu mbe kora ovizeze pupeṱeki na imba avehe mbe ritjinda tjimuna “ozombua” mena rokutja ovitjitwa vyawo oviyaukise ku Mukuru.​—Omavan. 22:15, EEP.

13. Matu tjiwa tjike ohunga na Jehova, nu ondjiviro ndjo i tu hinga okutjita tjike?

¹³ Matu tjiwa kutja Jehova “kamundu ngu  kora ovizeze.” Mouatjiri, “Ndjambi ka wovisa.” (Num. 23:19; Hebr. 6:18) Jehova “wa tonda . . . eraka rovizeze.” (Omiano 6:16, 17) Kutja tu yakurwe i ye, matu sokuhupa otja komirari vye vyokukara nouatjiri aruhe. Nu omena ra nao, eṱe opu tu ha zu ‘okuwovisasana.’​—Kol. 3:9

14. (a) Omomuano uṋe umwe Ovakriste vatjiri mu va panguka ku imba vozongamburiro zoposyo? (b) Kahurura omurari mbu ri mu Lukas 6:45.

¹⁴ Omomuano uṋe umwe Ovakriste vatjiri mu va panguka ku imba vozongamburiro zoposyo? Tu ‘serekarerasana ouatjiri.’ (Lesa Sakarja 8:16, 17.) Paulus wa kahurura na tja: “Tu raisa kutja oweṱe ovakarere va Ndjambi, . . . mokuzuvarisa ouatjiri.” (2 Kor. 6:4, 7) Jesus wa tja: “Otjinyo tji hungira imbi mbye ura momutima.” (Luk. 6:45) Kunao omundu tje nouatjiri momutima we, motjinyo tje mu pita imbi mbi ri ouatjiri. Eye u hungira ouatjiri momiano avihe, tjimuna kovandu mbe hi nokutjiwa, kovaungure ovakwao, omapanga, novasuverwa ve. Ngatu tare kovihorera tjiva mbi ma vi raisa kutja tu nouatjiri poo indee.

15. (a) Ongwaye tje he ri ounongo okuhupa pevari? (b) Ovikwaye mbi mavi vatere omitanda okupirukira oṋiṋikizire okuza komitanda omikwao? (Tara komambo wokehi.)

¹⁵ Tjike tji u ri omutanda ngu vanga okuhitasana ku nomitanda omikweṋu? Ngoo roro okuhorera ku tjiva mbe ri raisa tjimuna ve karera Mukuru nungwari kave mu karere. Owo ve munika tjimuna aa yo ovanatje ovawa tji ve ri puna ovanene vawo na mombongo posi yokutja ve rira ovandu varwe tji ve ri pokati komitanda omikwao mbi vi ri mouye na kotungovi. Mape ya ve ungurisa eraka ehazendu, ve rihwikika ouhazendu, ve puratena komizumbi omivi, ve ṱomeva wa mururu poo okuungurisa ovipurukise, owo va wotekwa movineya, na vyarwe ovivi. Owo ve hupa motjizeze, ve kora ovizeze kovanene vawo, kovakambure ovakwao, na ku Mukuru. (Eps. 26:4, 5) Jehova u tjiwa nawa indu tji matu mu ‘yozike notjinyo, nungwari omitima vyetu vi ri kokure na Ye.’ (Mar. 7:6) Tjiri onawa okutjita tjimuna omutjange wOmiano pa hungira: “O ṱeruru novanauvi, nungwari kondja okukara nondira ku Muhona aruhe.”​—Omiano 23:17. *

16. Okukara nouatjiri ku nai ye nomaningiriro wokuungurira Jehova motjiungura tja peke?

¹⁶ Mape ya mo vanga okurira omukandjira woruveze aruhe poo okuungurira Jehova oruveze aruhe, nandarire po Betel. Indu tji motjiti  omaningiriro, ounanḓengu okuyandja omaziriro nge ri wo nu omauatjiri ohunga nouveruke, omanyando, nongaro yoye. (Hebr. 13:18) Hapo nu tjike tji wa kara norupa moviṋa ovihakohoke poo oviṋa mbi mavi ku purisa nu ngunda ovanene vombongo ave hi nokutjiwa? Kondja okupaha ombatero yawo kokutja u karere Mukuru nomeritjiviro womomutima omakohoke.​—Rom. 9:1; Gal. 6:1.

17. Matu sokutjitavi indu tji matu hungire ku novetupirukire ohunga novakambure ovakwetu?

¹⁷ Ngatu tje rumwe ohoromende ya tjaere oviungura vyOuhona mehi reṋu nu okuzambo ave ku isana okukupura ohunga novakambure ovakweṋu, ove mo tjiti vi? Mo ve raere oviṋa avihe mbi motjiwa? Jesus wa tjita vi indu tja purwa i yovahongorore vOvaroma? Omurari mbu ri mOmatjangwa u raisa kutja pe ‘noruveze rwokumwina norwokuhungira,’ kunao Jesus povikando tjiva aa mwina uriri! (Omuzuv. 3:1, 7; Mat. 27:11-14) Mozongaro otja inḓa, tu hepa okukara nounongo, kokutja atu ha twa mo ovakambure ovakwetu moumba.​—Omiano 10:19; 11:12.

18. Tu nomerizirira wa ye indu tji matu hungire ku novanene vombongo ohunga novakambure ovakwetu?

¹⁸ Hapo nu tjike umwe tja tjiti ouvi ounene nu mbu motjiwa nawa? Ovanene vombongo, mbe nomerizirira wokuṱiza ombongo kutja i rire ongohoke, mape ya ave hepa okukupura oviṋa ohunga nongaro ndjo. Ove motjiti vi, indu tje ri epanga roye roposengo poo omuzamumwe woye? “Tji mo hungire ouatjiri, ousemba mau tjitwa.” (Omiano 12:17; 21:28) Kunao omerizirira woye wokuraera ovanene vombongo ouatjiri auhe, nungwari kaviṋa tjiva uriri, poo okukora ovizeze. Owo ve nousemba wokutjiwa ouatjiri auhe kokutja ve tjiwe kutja omomuano uṋe omusemba mu mave yenene okuvatera ingwi ngwa tjiti ouvi okutunga oupanga we kuna Jehova.​—Jak. 5:14, 15.

19. Morupa ndu maru kongorereko matu ka tara ku ye?

¹⁹ Omutjange wEpsalme David wa kumba ku Jehova a tja: “Ove u suvera ouatjiri womutima omusemba.” (Eps. 51:6) David aa tjiwa kutja okukara nouatjiri otjiṋa tji tji za mourekoto womutima wetu. Momiano avihe vyehupo retu, otjOvakriste vatjiri tu ‘sokuserekarerasana ouatjiri.’ Omuano warwe mu matu yenene okuraisa kutja twa panguka kouye otjovakarere va Mukuru, o mokuhonga ouatjiri we motjiungura tjokuzuvarisa. Morupa ndu maru kongorere ko matu ka tara kutja matu yenene vi okutjita nao.