ORUPA RWOMAKONḒONONENO 42
Kara nongamburiro kutja u ri mouatjiri
“Roreye oviṋa avihe nu mu ṱakamise ihi tji tji ri otjiwa.” —1 TES. 5:21.
EIMBURIRO 142 Twe riyameka komaundjiro wetu
OMAPU KU MATU KATARA *
1. Omena raye ovandu ovengi tji ve ha tjiwa kutja ongamburiro youatjiri ooiṋe?
PE NOZONGAMBURIRO ozengi ovandu mu ve rivara kutja Ovakriste, nu mbe muna kutja ve rikotamena ku Mukuru momuano omusemba. Iho ootjiṋa tji tjita kutja ovandu ave ha tjiwa kutja ouatjiri u ri pi. Owo ve pura kutja, “Hapo Mukuru u yakura ozongamburiro azehe, poo pe nongamburiro imwe uriri youatjiri?” Hapo eṱe tu nongamburiro otjOvahongonone va Jehova kutja tu honga ouatjiri, nokutja omuano wetu womerikotameneno oomuano auyerike mbu tjata ku Jehova? Hapo ovikwaye mbi mavi tu vatere okukara nongamburiro otja indjo? Ngatu katare komapu tjiva.
2. Otja 1 Ovatesalonika 1:5, ongwaye omuapostele Paulus tja ri nongamburiro kutja ombuze ndjaa hongo, ombuze youatjiri?
2 Omuapostele Paulus wa ri nongamburiro kutja ombuze ndjaa hongo, ombuze youatjiri. (Lesa 1 Ovatesalonika 1:5.) Imbwi kaumune Paulus mbwa ri na wo uriri, nungwari eye wa ri omundu ngwaa konḓonona Embo ra Mukuru nawa. Eye aa kambura kutja “Omatjangwa aehe ya tjangwa nombatero yOmbepo yaNdjambi.” (2 Tim. 3:16) Omakonḓononeno we ya raisa ye? Paulus wa muna ouatjiri oukahu mOmatjangwa kutja Jesus ongwa ri Messias ngwa kwizikwa. Nu imbwi ouatjiri ovanane vOvajuda vozongamburiro mbu va toorora kutja kave nakuyakura. Ovanatjavivi mbo aave tja ve tjiwa Mukuru, nungwari ovitjitwa vyawo kaavi raisa nao. (Tit. 1:16) Paulus kaa toorora kutja otupa tuṋe mOmbeibela tu ma kambura mo tjimuna owo tjaave tjiti. Eye wa ri kamwaha okuhonga nokuṱakamisa “ombango aihe yaNdjambi.”—Oviung. 20:27.
3. Hapo matu hepa okutjiwa omaziriro komapuriro ayehe kutja tu kambure kutja tu nouatjiri? (Wina tara kokawongo nga “ Oviungura vya Jehova nomeripura we—‘Kamaatu yenene okuvivara.’”)
3 Ovandu tjiva ve muna kutja ongamburiro youatjiri mai sokuzira omapuriro ayehe ovandu ngu ve na wo, nandarire inga Ombeibela ngu i hi ya hungirira ko. Hapo oumune mbwo u ri nawa? Ngatu tare kotjihorera tja Paulus. Eye aa tunduuza ovakambure ovakwao ‘okurora oviṋa avihe,’ posiya eye wa yakura kutja pa ri oviṋa ovingi mbyaa ha yenene okuzuva nawa. (1 Tes. 5:21) Eye wa tja: “Ondjiviro yetu yokutjiwa Ndjambi oyo oundondindondi uriri.” Nu wina wa tja: “Ihi eṱe tji matu munu nambano, tji ri otja otjisanekero motjiritarero otjiṱumbe.” (1 Kor. 13:9, 12) Paulus kaa zuu nawa oviṋa avihe, nu eṱe wina katu zuu nawa oviṋa avihe. Posiya Paulus aa zuu nawa ouatjiri ounanḓengu ohunga nondando ya Jehova. Oviṋa mbyaa tjiwa vya yenena okumupa ongamburiro yokutja imbi mbyaa kambura mo ouatjiri.
4. Matu yenene okumuna vi kutja tu nouatjiri, nu matu kerihonga tjike ohunga nOvakriste vatjiri?
4 Omuano umwe mbu mau tu vatere okumuna kutja tu nouatjiri, omokusasaneka omuano womerikotameneno Jesus mbwa twa po ku na imbi Ovahongonone va Jehova mbi ve tjita ndino. Morupa ndwi matu kamuna kutja Ovakriste vatjiri (1) ve nakaura omerikotameneno wokovisenginina, (2) ve raisa ondengero kena ra Jehova, (3) va suvera ouatjiri, nu (4) ve raisa orusuvero rwatjiri kovakambure ovakwao.
TU NAKAURA OKURIKOTAMENA KOVISENGININA
5. Matu rihongo tjike kotjihorera tja Jesus ohunga nomuano omusemba wokurikotamena ku Mukuru, nu matu yenene vi okuhorera ku ye?
5 Jesus wa suverere Jehova tjinene. Nu mena ranao eye ee rikotamene ku ye erike indu tja ri meyuru na indu tja ri kombanda yehi. (Luk. 4:8) Eye wina wa honga ovahongewa ve okurikotamena ku Jehova erike. Jesus novahongewa ve ovaṱakame kave na pu va ungurisire ovisenginina momerikotameneno wawo. Mukuru eye ombepo nu kape notjiṋa omundu tji ma yenene okuungura, tji matji yenene okusasanekwa ku na ounene we. (Jes. 46:5) Nu hapo onavi okuungura ovisenginina vya imba mbu ku za ovayapuke nokurikotamena ku vyo? MEtwako oritjavari mu inga omurongo, Jehova wa tja: “Ko nokuritjitira ko otjiserekarera otjihongwa tjotjisenginina, nandarire osaneno yoviṋa, mbi ri kombanda meyuru poo mbi ri kehi kombanda yehi . . . Ko nokurikotamena ku vyo.” (Eks. 20:4, 5) Inga omambo omakahu ku imba mbe vanga okutjita ombango ya Mukuru.
6. Ovahongonone va Jehova ndino ve horera komuano uṋe womerikotameneno?
6 Ovanamakuruhungi wina va muna kutja Ovakriste voruveze orukuru aave rikotamene ku Mukuru erike. Otjotjihorera, embo ndi History of the Christian Church ra tja: “Atja tji rira otjiṋa otjiyaukise” kOvakriste voruveze orukuru okuungurisa ovisenginina motuveze twawo twomerikotameneno. Ndino Ovahongonone va Jehova ve horera kOvakriste veserewondo etenga. Eṱe katu kumbu kovisanekero vya imba mbu ku za ovayapuke poo kovaengeli, nu wina katu kumbu ku Jesus. Eṱe wina katu rikotamene koviṋa mbi kuramena po ehi. Kainatja kutja pe ya ye, eṱe twe rimanena okukara nonḓuviro komambo wa Jesus ngu maye tja: “Rikotamena ku Muhona Ndjambi woye.”—Mat. 4:10.
7. Omomuano uṋe Ovahongonone va Jehova mu va panguka kozongamburiro zarwe?
7 Ndino ovandu ovengi ve vanga okupuratena kovanane vozongamburiro ovatjiukwa. Owo ve tjaterwa i yovahonge mba tjinene nga tji pe munika aayo ve rikotamena ku wo. Ovandu ovengi ve yenda kozokereka zawo, ve randa omambo wawo, nu ve yandja ovimariva ovingi ku wo poo kovira mbi notjiṋa nozokereka nḓa. Ovandu tjiva ve kambura moviṋa avihe mbi ve raerwa i yovahonge mba. Nowo ve tjaterwa tjinene i yovahonge vawo ngandu tji mo himwa kutja, tji va munu Jesus mave raisa ongaro ndjo, poo indee. Nungwari imba mbe rikotamena ku Mukuru momuano omusemba kave tongamisa ovandu. Otjiperi kutja tu raisa ondengero ku imba mbe tu hongorera po, posi yokutja tu yakura omambo wa Jesus nge tja oweṱe “ovangu nomarumbi.” (Mat. 23:8-10) Eṱe katu rikotamene kovandu, kutja ovanane vozongamburiro poo ovanane vehi. Nu wina katu yandja oruvara kovitjitwa vyawo. Eṱe katu toorora omunda nu katu kara norupa movitjitwa vyouye. Moviṋa avihe mbi, eṱe twa panguka kozongamburiro zarwe zovandu mbe tja Ovakriste.—Joh. 18:36.
TU RAISA ONDENGERO KENA RA JEHOVA
Ovakriste vatjiri ve nonyuṋe okuraera varwe ohunga na Jehova (Lesa oparagrafa 8-10) *
8. Otjikeṋa tji matji raisa kutja Jehova u vanga kutja eṱe tu yozike ena re nokuritjiukisa ku varwe?
8 Otjikando tjimwe Jesus wa kumba ku Ihe na tja: “Tate, yandja ondjozikiro kena roye!” Jehova omuini wa zira ongumbiro ndjo neraka enene na tja ma yozike ena re. (Joh. 12:28) Jesus wa yandja ondjozikiro kena ra Ihe indu tjaa zuvarisa kombanda yehi. (Joh. 17:26) Ku nao, Ovakriste vatjiri ve muna kutja ondjingonekero okuungurisa ena ra Mukuru nokuritjiukisa ku varwe.
9. Ovakriste veserewondo etenga va raisa vi kutja va ri nondengero kena ra Mukuru?
9 Jehova “wa raisa ombango ye yokuyakura omihoko vyarwe indu tje ritoororera otjiwaṋa mokati kawo” meserewondo etenga O.Z., ousupi indu ombongo yOvakriste tji ya za nokuzikwa. (Oviung. 15:14) Ovakriste veserewondo etenga mbo, va ri nonyuṋe okuungurisa ena ra Mukuru nokuritjiukisa ku varwe. Ovaapostele novahongewa va Jesus va ungurisa ena ra Mukuru indu tjaave zuvarisa nokutjanga Ombeibela. * Ku nao, owo va raisa kutja omba ri ovandu aveyerike mba tjivisa ena ra Mukuru.—Oviung. 2:14, 21.
10. Ovikeṋa mbi raisa kutja Ovahongonone va Jehova aveyerike ombe tjiukisa ena ra Jehova?
10 Hapo Ovahongonone va Jehova oovandu aveyerike mbe tjiukisa ena ra Jehova? Ngatu tare kovihorera. Ku ndino ovanane ovengi vozongamburiro va kondja nomasa okuhoreka kutja Mukuru u nena. Owo va isa mo ena ndi mozOmbeibela zawo nu va tjaera ena ndi kutja ari ha ungurisiwa mozokereka zawo. * Oukahu kutja Ovahongonone va Jehova oovandu aveyerike mbe raisa ondengero ndja yenene kena ra Mukuru. Eṱe tu tjiukisa ena ra Mukuru tjinene okukapita ngamwa ozongamburiro zarwe. Ku nao, eṱe tu kondja nomasa okutjita otja ena retu pu ri heya kutja oweṱe Ovahongonone va Jehova. (Jes. 43:10-12) Eṱe twa pitisa ozOmbeibela nḓa New World Translation of the Holy Scriptures, zokombanda omangete 240, nḓa yarura po ena ra Mukuru ovatoroke varwe ndu va isa mo. Nu wina tu pitisa omambo, nga zikamena kOmbeibela nge ungurisa ena ra Jehova momaraka nge ri kombanda 1000.
EṰE TWA SUVERA OUATJIRI
11. Ovakriste voruveze orukuru va raisa vi kutja va suverere ouatjiri?
11 Jesus wa suverere ouatjiri, owo mbu ri ouatjiri ohunga na Mukuru nozondando ze azehe. Jesus wa raisa momuano mbwaa hupu kutja u kambura mouatjiri mbwo. Neye wa tjiukisa ouatjiri mbwo ku varwe. (Joh. 18:37) Wina ovakongorere va Jesus vatjiri va suverere ouatjiri mbwo tjinene. (Joh. 4:23, 24) Omuapostele Petrus wa tja ongamburiro yOukriste “Ondjira yOuatjiri.” (2 Petr. 2:2) Mena rokutja va suverere ouatjiri, Ovakriste voruveze orukuru kaave yakura omahongero wozongamburiro, nozombazu noumune wovandu mbwaau pirukire ouatjiri. (Kol. 2:8) Momuano otjingewo, ndino Ovakriste vatjiri ve kondja nomasa okukara “nongarero ombwa youatjiri,” mokuzikamisira omahongero wawo ayehe nongaro yawo yehupo kEmbo ra Mukuru.—3 Joh. 3, 4.
12. Orutu Orunane tji rwa munu kutja ru nomazuviro omavi ohunga nomapu worive ru tjita vi, nu ongwaye tji ru tjita omarundurukiro ngo?
12 Ovahongonone va Jehova kave munu kutja ve zuva nawa oviṋa avihe mbi ri mOmbeibela. Povikando tjiva owo va tjita ozondataiziro momuano mbu va kahurura omahongero tjiva wOmbeibela na mozondyero tjiva zombongo. Ihi katji sokurira otjihimise ku eṱe. Orondu Ombeibela i raisa oukahu kutja ovakarere va Mukuru ve zuva ouatjiri nawa otja oruveze pu maru kayenda. (Kol. 1:9, 10) Jehova u vandurura ouatjiri kouṱiṱiṱiṱi, nu eṱe matu sokuraisa omuretima nga tji twa zuu ouatjiri nawa. (Omiano 4:18) Orutu Orunane tji rwa munu kutja rwa ri nomazuviro omavi ohunga nepu rorive, orwo karu wombo okutjita omarundurukiro ngu maye heperwa po. Ozokereka ozengi ndino ze rundurura omahongero wawo mena rokuvanga okuyakurwa i youṋepo wawo poo mena rokuvanga okuyakurwa i youye. Nungwari Ovahongonone va Jehova ve tjita omarundurukiro mena rokuvanga okutumbuka popezu na Mukuru, nokuvanga okurikotamena ku ye otja Jesus tjaa tjiti. (Jak. 4:4) Eṱe katu tjiti omarundurukiro otja ouye pu mau runduruka, nungwari tu tjita omarundurukiro otja pu matu yende amatu zuu Ombeibela nawa. Eṱe twa suvera ouatjiri.—1 Tes. 2:3, 4.
TU RAISA ORUSUVERO RWATJIRI KOVAKAMBURE OVAKWETU
13. Otjikaṋena tjiṋe otjinanḓengu Ovakriste veserewondo etenga tjaave tjiukirwa ko, nu Ovahongonone va Jehova ndino ve raisa vi otjikaṋena ho?
13 Ovakriste veserewondo etenga aave tjiukirwa kovikaṋena ovingi oviwa, posi yokutja otjikaṋena tjaave tjiukirwa ko tjinene tja ri orusuvero. Jesus wa tja: “Tji mwa suverasana, indino avehe otji mave tjiwa kutja oweṋe ovahongewa vandje.” (Joh. 13:34, 35) Ovahongonone va Jehova mouye auhe ve raisasana orusuvero rwatjiri nu ve nombwaneno. Eṱe twa panguka kozongamburiro zarwe azehe mena rokutja tu ri otja ovandu veṱunḓu rimwe, nandarire kutja twa za komahi nozombazu pekepeke. Orusuvero rwatjiri ndwi, tu ru muna pozombongarero zetu na pomaworonganeno wetu worukondwa na inga wotukondwa. Oviṋa mbi, vi tu vatera okukara nongamburiro kutja tu rikotamena momuano Jehova mbwe yakura.
14. Otja kOvakolose 3:12-14, omomuano uṋe omunanḓengu mu matu yenene okuraisa orusuvero rwatjiri kovakambure ovakwetu?
14 Omatjangwa ye tja: “Suvarasaneye nomasa tjinene.” (1 Petr. 4:8) Omuano umwe mu tu raisa orusuvero otja indwo, omokuisirasana nokutjinda oungundipare wovakwetu. Eṱe wina tu kondja okuraisa ouharupu nokusekirisa avehe mbe ri mombongo, nandarire imba mbe tu hihamisa. (Lesa Ovakolose 3:12-14.) Tji matu raisa orusuvero otja indwo, eṱe tu raisa kutja oweṱe Ovakriste vatjiri.
‘ONGAMBURIRO IIMWE URIRI’
15. Omomiano viṋe vyarwe mu tu horera komiano vyomerikotameneno mbya zikamisiwa i yOvakriste veserewondo etenga?
15 Eṱe wina tu horera komiano vyarwe vyomerikotameneno mbya zikamisiwa i yombongo yOvakriste veserewondo etenga. Otjotjihorera, otjira tjetu tji hongorerwa momuano otjingewo mbwi, mbwa zikamisirwe i yOvakriste veserewondo etenga. Eṱe tu novatarere mbe varura ozombongo, ovanene vombongo, novavatere vombongo tjimuna wo. (Fil. 1:1; Tit. 1:5) Nu wina tu raisa ondengero komatwako wa Mukuru ohunga nomahakaeneno womonyama, orukupo nomaungurisiro wombinḓu. Nu tu tjevera ombongo ku imba mbe ha vanga okukongorera omatwako wa Mukuru.—Oviung. 15:28, 29; 1 Kor. 5:11-13; 6:9, 10; Hebr. 13:4.
16. Omambo nge ri mOvaefese 4:4-6, maye tu hongo tjike?
16 Jesus wa tja ovengi mave tja ovahongewa ve, posi yokutja kaavehe mbu mave raisa ovikaṋena vyOukriste watjiri. (Mat. 7:21-23) Omatjangwa wina ye tu raera kutja momayuva omasenina ovengi ‘kombanda mave munika aayo ovakambure.’ (2 Tim. 3:1, 5) Posi yokutja Ombeibela i tu raera oukahu kutja pe “nongamburiro iimwe uriri” Mukuru ndje yakura.—Lesa Ovaefese 4:4-6.
17. Oowaṋi ndino mbe kongorera ongamburiro youatjiri nu mbe tjita imbi Jesus mbya honga?
17 Hapo oowaṋi ndino mbe kongorera ongamburiro imwe youatjiri? Eṱe twa tara kovihorera ovingi, tjimuna omuano womerikotameneno Jesus mbwa honga, nomuano womerikotameneno wOvakriste veserewondo etenga. Nu twa munu kutja Ovahongonone va Jehova uriri ombe kongorera ongamburiro youatjiri. Indji ondjingonekero yapeke okurira umwe wovakarere va Jehova nokutjiwa ouatjiri ohunga na Jehova nondando ye. Ku nao, eṱe ngatu kayende komurungu okupanḓera pouatjiri nongamburiro ndji ha teratera.
EIMBURIRO 3 Omasa wetu, omaundjiro wetu, ongamburiro yetu
^ par. 5 Morupa ndwi, matu katara kotjihorera Jesus tja raisa ohunga nomuano omusemba wokurikotamena ku Jehova, nu matu kakonḓonona omuano ovahongewa ve voruveze orukuru maave horere ku ye. Nu wina matu katara komapu nge raisa kutja Ovahongonone va Jehova ve rikotamena momuano otjingewo ndino.
^ par. 9 Tara kokawongo nga “Did the First Christians Use God’s Name?” mokambo kOruhungu, ketenga ku Juli, 2010, pomuk. 6.
^ par. 10 Otjotjihorera, mombura ndji 2008, Pope Benedict XVI wa rakiza kutja ena ra Mukuru “ari ha roro okuungurisiwa poo okutamunwa” movitjitwa, momaimburiro na mozongumbiro zokereka yOkatolika.
^ par. 63 OMAKAHURURIRO WOTJIPERENDERO: Otjira tja Jehova tja pitisa Ombeibela ndji o-New World Translation momaraka wokombanda 200, kokutja omundu auhe ma yenene okulesa Ombeibela, ndji nena ra Mukuru meraka re omuini.
