1. Ongwaye tji tu kara nondjoroka tjinene okurira Ovahongonone va Jehova?

TU NONDJOROKA tjinene okurira Ovahongonone va Jehova. Oweṱe ovakarere va Jehova nu tu raisa kutja oweṱe ovahongonone ve mokuzuvarisa nokuhonga varwe ohunga na ye. Tu kara nondjoroka okuvatera ovandu vomitima omiwa okurira ovakambure nokutja ve kamune “omuinyo waaruhe.” (Oviung. 13:48) Jesus wa ri “nondjoroka” indu ovahongewa ve tji va kotoka nondoṋeno motjiungura tjokuzuvarisa. Eṱe wina tu kara nondjoroka otjingeyo.—Luk. 10:1, 17, 21.

2. Omomuano uṋe mu tu raisa kutja otjiungura tjokuzuvarisa otjinanḓengu tjinene ku eṱe?

² Otjiungura tjokuzuvarisa otjinanḓengu tjinene ku eṱe. Omuapostele Paulus wa tja nai ku Timoteus: “Ritjevera omuini nu wina u tjevere omahongero woye.” Neye wina wa tja: “Orondu tji wa tjiti nai, indino mo riyama omuini na imba mbu mave puratene kove.” (1 Tim. 4:16) Ku nao, otjiungura tjetu tjokuzuvarisa tji yama omuinyo vyovandu. Tu ritjevera mena rokutja oweṱe ouṋepo wOuhona wa Mukuru. Eṱe aruhe matu sokuritjinda momuano mbu mau eta ohiviro ku Jehova nokuraisa kutja tu nongamburiro mombuze ombwa ndji tu zuvarisa. (Fil. 1:27) Eṱe tu raisa kutja tu ‘tjevera omahongero wetu’ mokurirongerisa nawa kotjiungura tjokuzuvarisa nokuningira ombatero ya Jehova komurungu wokuzuvarisa ku varwe.

3. Hapo ovandu avehe mbu mave kara nonḓero mombuze yOuhona? Yandja otjihorera.

³ Nandarire kutja tu ungura pu matu yenene okuzuvarisa ku varwe, ovandu ovengi momaturiro mu tu zuvarisa mape ya ave ha puratene kombuze ombwa yOuhona. Tara kotjihorera tja Mbuti Georg Lindal ngwa zuvarisa erike moIceland okuza mombura ndji 1929 nga 1947. Eye wa yandja omambo omengi tjinene, posi yokutja kape nomundu umwe ngwa yakura ouatjiri. Eye wa tja: “Tjiva aave pirukire ombuze yOmbeibela nu varwe ovengi kava ri nonḓero oparukaze.” Ovahindwa okuza koskole ya Gilead va ya ngo okukavatera notjiungura tjokuzuvarisa,  posi yokutja va zuvarisa ozombura muvyu nokuhina ovandu mbu mave raisa onḓero. Kombunda yozombura nḓo, ovature va Iceland ve riyandja oveni ku Jehova na ve papitisiwa. *

4. Eṱe mape ya atu fula vi indu ovandu tji ve hi nakupuratena kombuze ombwa?

⁴ Tu wa momuinyo indu ovandu tji ve hi nakuraisa onḓero yokurihonga Ombeibela. Eṱe mape ya atu fula tjimuna Paulus ngwa ri ‘noruhoze orunene nomuhihamwatima’ mena rokutja Ovajuda ovengi kaave kambura kutja Jesus ongu ri Messias. (Rom. 9:1-3) Hapo tjike indu tji u ungura oukukutu okurira omuhonge omuwa nokumbira omuhongwa woye, posi yokutja eye ka ṱakamisa imbi mbi me rihongo nu mo sokuisa okurihonga ku na ye? Poo ngahino ko ya rora okurihonga Ombeibela ku nomundu nga tje ya pondondo yokupapitisiwa. Mo sokurimuna ondjo poo okumuna kutja Jehova ke nonyuṋe motjiungura tjoye tjokuzuvarisa? Morupa ndwi matu kazira omapuriro yevari, (1) Ovikwaye mbi raisa kutja otjiungura tjetu tjokuzuvarisa tji nondoṋeno? (2) Ovikwaye mbi matu sokuundjira ko indu tji matu zuvarisa ku varwe?

5. Ongwaye otjiungura tjetu ku Jehova tji mape ya atji ha kara otja konḓero yetu?

⁵ Ombeibela i tja, omundu ngu tjita ombango ya Mukuru “u ṋingapara mu avihe mbye tjita.” (Eps. 1:3) Posi yokutja, ihi katji hee kutja oviṋa avihe mbi matu tjitire Jehova, mavi tjitwa otja konḓero yetu. Ehupo retu ri “nozongondjero ozengi” mena rokutja eṱe atuhe kaweṱe ohomonena. (Job 14:1) Nu wina ovetupirukire povikando tjiva, mape ya ave tjaere otjiungura tjetu tjokuzuvarisa. (1 Kor. 16:9; 1 Tes. 2:18) Ku nao, omomuano uṋe Jehova me tya kutja otjiungura tjetu tjokuzuvarisa tji nondoṋeno? Tara komirari tjiva vyOmbeibela mbi mavi tu vatere okuzira epuriro ndo.

6. Omomuano uṋe Jehova me muna ondoṋeno yoviungura vyetu ku ye?

⁶ Jehova u yandja ombango komuano mbu tu ungura oukukutu nomuano mu tu he rihahiza. Jehova u kara nonyuṋe na eṱe, indu tji matu zuvarisa noupyuke mena rokutja twe mu suvera nandarire indu ovandu tji ve hi nakupuratena ku eṱe. Paulus wa tja: “Ndjambi Eye omunausemba. Eye ke nokuzemba otjiungura tjeṋu, norusuvero ndu mwa raisa ku Ye mokukarera ovakriste ovakweṋu, nu nga mba mu ve karera.” (Hebr. 6:10) Jehova u zemburuka ozongondjero norusuvero rwetu, nandarire kutja katu nomuhongwa ngwa papitisiwa. Ku nao, mo yenene okuṱakamisa omambo omuapostele Paulus nga hungira kOvakorinte, nge tja: “Ongondjero yeṋu motjiungura tja Ndjambi oyo kamungandjo,” nandarire kutja ozongondjero zoye kaze ya eta ondoṋeno otja konḓero yoye.—1 Kor. 15:58.

7. Ovikwaye mbi matu rihongo okuza ku imbi omuapostele Paulus mbya hungira ohunga notjiungura tje tjokuzuvarisa?

 ⁷ Omuapostele Paulus wa ri omuhindwa omuwa ngwa zikamisa ozombongo movihuro pekepeke. Posi yokutja, indu ovandu tjaave mu nyekerere nokumuraera kutja kamuhonge omuwa, eye ke na pa hungira ohunga notjivaro tjovandu mba vatera okurira Ovakriste. Nungwari wa tja: “Mba ungura tjinene.” (2 Kor. 11:23) Tjimuna Paulus, matu sokuzemburuka kutja, Jehova u vara ozongondjero nḓu tu tjita nonḓaro orure ndji tu raisa.

8. Matu sokuzemburuka ye ohunga notjiungura tjokuzuvarisa?

⁸ Otjiungura tjetu tji yorokisa omutima wa Jehova. Jesus wa hinda ovahongewa 70 okukazuvarisa ombuze yOuhona, nowo va kotoka “nenyando enene.” Ongwaye tji va ri nenyando enene? Owo va tja: “Nangarire inḓa ozombepo ozohakohoke za ri nonḓuviro ku eṱe, tji twe ze pitisa mena roye!” Jesus we ve zira a tja: “Amu yoroka mena rokutja ozombepo ozohakohoke ze nonḓuviro ku eṋe, posi yokutja nyandeye mena rokutja omana weṋu ya tjangwa meyuru.” (Luk. 10:17-20) Jesus aa tjiwa kutja kaaruhe tji mave kara nomahungi omawa ohunga notjiungura tjawo tjokuzuvarisa. Katu tjiwa kutja ovahongewa va Jesus va hungira kovandu vengapi mba karira Ovakriste. Ovahongewa aave sokutjiwa kutja, enyando enene ri za mokutjiwa kutja Jehova u nondjoroka moviungura vyawo nungwari kari zu movandu tji mave puratene kombuze yawo uriri.

9. Otja kOvagalate 6:7-9, ovikwaye mbi mavi tjitwa indu tji twa panḓere po motjiungura tjokuzuvarisa?

⁹ Indu tji twa panḓere po motjiungura tjokuzuvarisa, matu kamuna omuinyo waaruhe. Indu tji twa ungura pu matu yenene okuzuvarisa nokuhonga ombuze ombwa, eṱe wina tu kuna “mehi rOmbepo” mokuyandjera ombepo ondjapuke okuungura mehupo retu. Tji tu hi ‘nakuṱotjirweyo’ poo “tji tu ha urirwe,” Jehova wa kwizika kutja me tu pe omuinyo waaruhe nandarire kutja katu ya vatera omundu okuvaza pondondo yokupapitisiwa.—Lesa Ovagalate 6:7-9.

10. Ongwaye ovandu tjiva tji ve puratena nu varwe tji ve ha tjiti nao tji matu zuvarisa?

¹⁰ Nandarire kutja ovandu va yakura ouatjiri poo indee, iho tji za ku wo oveni. Jesus wa kahurura otjiṋa hi motjisasanekero tje tjomukune ngwa kuna ozondwi momahi pekepeke, posi yokutja ondwi imwe uriri ondja eta ovihape. (Luk. 8:5-8) Jesus aa tja omahi ngo ye kuramena po omitima vyovandu mbe yakura “embo ra Ndjambi” momiano pekepeke. (Luk. 8:11-15) Tjimuna omukune, eṱe katu yenene okutya imbi mbi ri momitima vyovandu mbu tu ka zuvarisa ko. Omerizirira wetu okukayenda komurungu okukuna ondwi yOuhona wa Mukuru. Paulus wa tja: “Ndjambi ma yandja ku auhe ondjambi ye otja koviungura vye mbya ungura” nungwari katjivaro tjovandu mbu wa eta.—1 Kor. 3:8.

11. Ongwaye Jehova tjaa ri nonyuṋe motjiungura tjokuzuvarisa tja Noa, nandarire kutja ovandu kaave puratene? (Tara kotjiperendero tjokombanda yokambo nga.)

¹¹ Ovakarere va Jehova ovakuru aave zuvarisa kovandu mbe hi na aave vanga okupuratena. Otjotjihorera, Noa wa ri “omuzuvarise wousemba” oure wozombura ape 40 poo 50. (2 Petr. 2:5) Noa aa zeri kutja ovandu ve puratene ku ye, nandarire kutja Jehova katjere nao. Nungwari indu tja raera Noa okutunga otjitendeze, Mukuru wa tja: “Hita motjitendeze, ove novazandu voye nomukazendu woye, novakazendu vovazandu voye.” (Gen. 6:18) Jehova tja raera Noa kutja otjitendeze  matji ṱeki pi, eye mape ya aa munu kutja kavandu ovengi mbu mave puratene ku ye, mena rokutja kamaape kara noruveze ku wo motjitendeze. (Gen. 6:15) Otja tji matu tjiwa, kape nomundu nangarire umwe ngwa puratena ku Noa. (Gen. 7:7) Hapo Jehova aa munu kutja Noa ka ungurire otjiungura tjokuzuvarisa nawa? Kako, kaa munu nao. Jehova wa ri nonyuṋe tjinene mu Noa, mena rokutja eye wa tjita oviṋa avihe otja tje mu raera.—Gen. 6:22.

12. Omomuano uṋe omuprofete Jeremia ma muna ondjoroka motjiungura tje tjokuzuvarisa, nandarire kutja ovandu kaave mu puratene nu aave mu nyekerere?

¹² Omuprofete Jeremia wina wa zuvarisa oure wozombura zokombanda 40 nandarire kutja ovandu kaave puratene ku ye nu aave mu pirukire. Eye wa wire momuinyo tjinene mena rokutja ovemupirukire aave mu ‘nyekerere nokumuhemba,’ mena ranao aa vanga okuisa otjiungura tje. (Jer. 20:8, 9) Posi yokutja, Jeremia ke rihahizire. Ovikwaye mbye mu vatera okukayenda komurungu nokumuna ondjoroka motjiungura tje tjokuzuvarisa? Eye wa yandja ombango koviṋa vivari ovinanḓengu. Otjitenga, ombuze ya Mukuru Jeremia ndja raera ovandu yokutja Mukuru me ve pe “oruveze ndu maru ya rwomaundjiro norwouṋingandu.” (Jer. 29:11) Otjitjavari, Jehova wa toorora Jeremia okumuhungirira po ombuze ye kovandu. (Jer. 15:16) Eṱe wina tu yandja ombuze yomaundjiro kovandu nu tu tjinda ena ra Jehova otjOvahongonone ve. Indu tji twa yandja ombango koviṋa vivari ovinanḓengu mbi, eṱe matu yenene okukara nondjoroka nandarire kutja ovandu ve tu puratene poo kave tjitire nao.

13. Ovikwaye mbi matu rihongo okuza kotjisasanekero tja Jesus tji tji ri mu Markus 4:26-29?

¹³ Ku kambura oruveze omundu okukara nongamburiro. Jesus wa honga ouatjiri mbwi motjisasanekero tje tjomukune ngu rara. (Lesa Markus 4:26-29.) Kombunda ya indu omukune tja kunu ozondwi, eye ka yenene okutjita kutja ze hape tjimanga. Mape ya ape kambura oruveze orure ove okumuna omuhongwa woye wOmbeibela ama ṱakamisa oviṋa mbi me rihongo. Omuṱuta ka yenene okutjita kutja ovikunwa vye vi hape tjimanga otja pu ma vanga. Momuano otjingewo, katu yenene okutjita kutja ongamburiro yovahongwa vetu i kure tjimanga otja pu matu vanga. Ku nao, o u momuinyo poo okurihahiza indu tji mave kambura orure. Tjimuna omuṱuta, eṱe tu hepa omuretima okuundja ovahongewa vetu okutoora ondando yokukarera Jehova.—Jak. 5:7, 8.

14. Otjihorera tjiṋe tji matji raisa kutja ovandu mape ya ave kambura oruveze orure ngunda ave ha uta okupuratena ku eṱe?

¹⁴ Motuveze tjiva, ku kambura oruveze orure omundu okuuta okukarera Jehova. Tara kotjihorera tja Gladys na Ruby Allen, mba ri ovakandjira ovakarerere mba hindwa kotjihuro Quebec moCanada, mombura ndji 1959. * Mena rokutja ovandu aave tira kutja ovararanganda novapristeri mave tjiti vi poo mave tja vi indu tji va hungire ku na Ovahongonone va Jehova, owo kaave puratene. Gladys wa tja: “Aatu zuvarisa okuza kondjuwo nondjuwo ozoiri hambondatu oure wozombura mbari, nu kape nomundu ngwa hungira ku na eṱe. Ovandu aave ya pomuvero nu tji va munu kutja oweṱe, owo kaave paturura. Posi yokutja, katu rihahizire.” Oruveze tja ru kayenda, ongaro yovandu ya runduruka nu tjiva va uta okupuratena. Motjihuro ho, mu nozombongo ndatu nai.—Jes. 60:22.

15. 1 Ovakorinte 3:6, 7 ri tu honga ye ohunga notjiungura tjokuisa po ovandu ovahongewa?

 ¹⁵ Ovandu ovengi mave yenene okuvatera omundu okurira omuhongewa. Omundu auhe mombongo ma yenene okuvatera omuhongwa okuvaza pondondo yokupapitisiwa. (Lesa 1 Ovakorinte 3:6, 7.) Otjotjihorera, ngatu tje omuzuvarise wa yandja okambapira poo okambo komundu ngwa raisa onḓero. Nu kaa yenene okuyaruka komundu ngo, ku nao wa ningira omuzuvarise warwe okukemuvarura. Nu omuzuvarise ngo, wa uta okurihonga Ombeibela ku nomundu ngo. Eye wa ṋanga ovakambure ovakwao okukara pomerihongero wOmbeibela nu auhe wawo va tunduuza omuhongewa momiano pekepeke. Ovakambure mbwo, va vatera omuhongwa ngo okukura mongamburiro. Momuano otjingewo, avehe mbe ungura oukukutu okuvatera omuhongwa okupapitisiwa ve kara nondjoroka.—Joh. 4:35-38.

16. Ongwaye tji mo yenene okukara nondjoroka motjiungura tjoye tjokuzuvarisa, nandarire kutja wa vera poo ko nomasa?

¹⁶ Tjike tji u ha yenene okuzuvarisa nokuhonga ombuze ombwa mena rokutja wa vera poo ko nomasa? Ove mo yenene okukara nondjoroka mena roviṋa mbi mo yenene okutjita. Tara kotjihorera tjOmbara David, indu eye novarwe ve vovita tji va yama omaṱunḓu nomauini wawo okuza kOvaamalek. Ovarumendu 200 va kara kongotwe okutjevera omitwaro, mena rokutja va urirwe tjinene okurwa. David novarwe ve vovita va taara nu va toora ovihuze ovingi okuza kovanavita. Neye wa rakiza kutja imba mba karwa na imba mba sewa kongotwe, ve mune ovihuze mbyo pu pe ṱeki pamwe. (1 Sam. 30:21-25) Ehungi ndi, ri tu honga otjiṋa ohunga notjiungura tjetu tjokuisa po ovandu ovahongewa. Omundu auhe nga ungura pu ma yenene, ma kara nondjoroka indu omuhongwa tja utu okutjiwa Jehova na papitisiwa.

17. Tu nondangi ku ye?

¹⁷ Tu nondangi ku Jehova komuano me vara otjiungura tjetu, tji tu mu ungurira. Eye u tjiwa kutja kamaatu ṋiṋikiza ovandu okupuratena ku eṱe poo okuuta okurikotamena ku ye. Posi yokutja, u muna omuano mu tu ungura oukukutu nomuano mu twe mu suvera tjinene. Nu wina u tu honga okukara nondjoroka mu imbi mbi matu yenene okutjita motjiungura tjokuzuvarisa. (Joh. 14:12) Matu yenene okukara nongamburiro kutja Mukuru ma kara nonyuṋe indu tji tu hi nakurihahiza.