1. Otjikeṋa tji tji kupa ongamburiro kutja Embo raMukuru ri nomasa? (Tara kotjiperendero pomautiro worupa ndwi.)

OTJOVAKARERE vaJehova, eṱe katu keyakeya kutja Embo raMukuru poo ombuze ye kovandu, i ‘nomuinyo nu i nomasa.’ (Hebr. 4:12) Tu muna omasa wOmbeibela mehupo retu oveni na mehupo ravarwe. Ovakambure ovakwetu tjiva ngunda ave hiya rira Ovahongonone vaJehova, va ri omarunga, aa ve ungurisa ovipurukise poo aa ve tjiti oruvakiro. Varwe va ri ovandu ovananḓengu mouye poo ovatumbe, posi yokutja ngunda pa ri notjiṋa tjaa ve hepa mehupo rawo. (Omuzuv. 2:3-11) Povikando ovingi ovandu mbaa ve munika aayo kava ri nomuhunga, va vaterwa i Ombeibela okuuta okukayenda mondjira yomuinyo. Ove mape ya wa rora okulesa omahungi wovitjitwa nga pitisiwa mokambo nga The Watchtower morupa ndwi, “The Bible Changes Lives,” nu ngahino wa tjaterwa i omahungi ngo. Ovandu tji va zu nokurira Ovakriste, owo ve hepa okukayenda komurungu okukurisa oupanga wawo kuna Jehova nombatero yOmbeibela.

2. Omasa wEmbo raMukuru ya ṱuna vi kovandu meserewondo etenga?

² Nu hapo otjiṋa otjihimise tji matu munu ovandu ovengi ndino amave tjiti omarundurukiro omanene mehupo rawo, indu tji va zu nokurihonga Embo raMukuru? Kako, katu sokuhimwa! Omahungi otja inga maye tu zemburukisa ovakambure ovakwetu  veserewondo etenga, mba ri nomaundjiro wokukahupa meyuru. (Lesa 1 Ovakorinte 6:9-11.) Paulus tja za nokutamuna ovandu mbu ve hina okurumata Ouhona waMukuru, eye wa weza na tja: “Nu tjiva veṋu wina va ri ohamukwao novandu mba.” Posi yokutja owo va rundurura ongaro yawo, nombatero yOmatjangwa nombepo ondjapuke. Ovandu tjiva nangarire tji va za nokurira Ovakriste, va tjita ozondataiziro ozonene nḓa ṱuna koupanga wawo kuna Jehova. Okutara kotjihorera, Ombeibela i tamuna Omukriste umwe omutwirisiwa meserewondo etenga ngwa konderwe kombongo. Posi yokutja kombunda wa yakurwa rukwao mombongo. (1 Kor. 5:1-5; 2 Kor. 2:5-8) Tjiri otjiyanḓiparise okumuna ovakambure ovakwetu amave tjiti omarundurukiro omengi nao nombatero yomasa wEmbo raMukuru.

3. Ovikwaye mbi matu kahungirira ko morupa ndwi?

³ Embo raMukuru ri nomasa omengi. Nu mena rokutja Jehova we tupa Embo re, eṱe matu sokukara nonḓero yokuriungurisa nawa. (2 Tim. 2:15) Orupa ndwi maru kahurura kutja matu sokutjita vi kutja tu yenene okuungurisa omasa wEmbo raMukuru (1) mehupo retu, (2) motjiungura tjetu tjokuzuvarisa, (3) na tji matu hongo mombongo. Oviṋa mbi matu rihongo morupa ndwi, mavi tu vatere okuraisa orusuvero nondangi ku Tate wetu womeyuru, ngu tu honga imbi mbi ri ombatero ku eṱe oveni.—Jes. 48:17.

4. (a) Otjikwaye tji matu sokutjita kutja Embo raMukuru ri ṱune kehupo retu? (b) Mo yenene vi okutwapo oruveze rwokulesa Ombeibela yoye?

⁴ Tji matu vanga kutja Embo raMukuru ri ṱune kehupo retu, matu sokurilesa aruhe, poo eyuva arihe tji mape sora. (Jos. 1:8) Otjiperi kutja otjingi tjetu tu kara noviungura ovingi. Posi yokutja, kamaa rire nawa okuyandjera otjiṋa ngamwa atjihe okututjaera okulesa Ombeibela, nandarire omerizirira ngu tu na wo. (Lesa Ovaefese 5:15, 16.) Ovakarere vaJehova ovengi va paha omiano vyokutwapo oruveze rokulesa Ombeibela eyuva arihe. Matu yenene okutoorora okutjita nao omuhuka omunene, ometaha poo ongurova. Ovakarere vaJehova ovengi ve noumune tjimuna owomutjange wepsalme ngwa tja: “Tjiri, ami mba suvera omatwako woye! Mbi ripura na wo oure weyuva arihe.”—Eps. 119:97.

5, 6. (a) Ongwaye tji matu sokuripurira ko oukoto ku imbi mbi matu lese? (b) Omuano omusemba wokuripurira ko oukoto ku imbi mbi matu lese oouṋe? (c) Ove wa muna vi ouwa mokuripurira ko oukoto ku imbi mbi wa lese mEmbo raMukuru?

⁵ Okulesa Ombeibela uriri kaku ya yenena. Tji twa zu nokulesa Ombeibela, matu sokuripurira ko oukoto ku imbi mbi twa lese. (Eps. 1:1-3) Tji twa tjiti nao, otji matu yenene okuṱakamisa nawa ounongo wayo mehupo retu. Kutja matu lese Ombeibela oini poo matu lese mouyendjezewa wetu, ondando yetu mai sokurira okuyandjera Embo raMukuru okuturundurura nokututunduuza.

⁶ Omuano omusemba wokuripurira ko oukoto ku imbi mbi matu lese oouṋe? Ovengi va muna kutja onawa okuhekana kaṱiṱi tji va zu nokulesa  orupa rworive, nokuripura omapuriro tjimuna nga: ‘Orupa ndwi maru ndji hongo tjike ohunga na Jehova? Omomiano viṋe mu mbi ṱakamisa omurari mbu ri morupa ndwi? Omoviṋa viṋe mu me hepa okutjita omarundurukiro?’ Tji matu ripurire ko oukoto ku imbi mbi matu lese mEmbo raMukuru nokukumbira vyo, matu kara nonḓero yokuviṱakamisa. Nu otji matu munu omasa wEmbo raMukuru mehupo retu.—2 Kor. 10:4, 5.

7. Matu yenene vi okuungurisa Embo raMukuru nawa motjiungura tjokuzuvarisa?

⁷ Otjikeṋa tji matji yenene okutuvatera okuungurisa Embo raMukuru nawa motjiungura tjokuzuvarisa? Omukambo omutenga, okuriungurisa tjinene tji matu zuvarisa nokuhonga varwe. Omurumendu umwe omukambure wa tja nai ohunga nepu ndi: “Ngatu tje mo zuvarisa okuza kondjuwo nga kondjuwo nu u ri puna Jehova, mo yandjere Jehova kutja ma hungire poo ma rire ove erike uriri ngu mo hungire?” Eye aa vanga okuṋunisa epu rokutja, Tji matu lese okuza mOmbeibela oini indu tji matu zuvarisa, okutja matu yandjere Jehova kutja ma hungire ku nomunionganda. Etjangwa ndi matu lesere omunionganda, ri nomasa pomambo wetu oveni ngu mape ya atu hungire. (1 Tes. 2:13) Ripura omuini kutja, ‘Mbi kondja okupaha omiano vyokulesa orupa okuza mEmbo raMukuru ku imba mbu mbi zuvarisira ombuze ombwa?’

8. Ongwaye tji tu ha sokulesera ovandu omatjangwa uriri tji matu zuvarisa?

⁸ Okulesera ovandu mbu matu hungire kumwe etjangwa rOmbeibela uriri, kaku ya yenena. Orondu ovandu ovengi kave zuu nawa omatjangwa wOmbeibela. Otji pa ri nao meserewondo etenga, nu ndino wina peri nao. (Rom. 10:2) Okutja katu sokumuna kutja omundu ma zuu nawa epu retjangwa ndi twe mu lesere. Matu yenene okumuvatera mokuyarukira po rukwao omambo poo omapu omanahepero okuza metjangwa, nu okuzambo atu mu kahururire kutja maye hee tjike. Momuano mbwi otji matu yenene okutjita  kutja Embo raMukuru ri ṱune komeripura nomitima vyovapuratene.—Lesa Lukas 24:32.

9. Matu yenene vi okuvatera ovandu kutja ve kare nondengero kEmbo raMukuru ngunda atu hiye ve lesera etjangwa? Yandja otjihorera.

⁹ Imbi mbi matu hungire ngunda atu hiya lesa etjangwa wina mavi yenene okuvatera omunionganda kutja ma hare ondengero kOmbeibela. Okutara kotjihorera, matu yenene okutja, “Indjo tu tare kutja Omuute wetu ma tja vi ohunga nepu ndi.” Tji mo hungire ku nomundu ngu ha tjiwa ombazu yOukriste, mo yenene okutja, “Tara ku imbi Omatjangwa Omayapuke mbi maye tu raere.” Poo tji twa hakaene ku nomundu ngu he notjiṋa nozongamburiro, matu yenene okumupura kutja, “Ove wa rora okuzuva omambo omakuru nga?” Matu sokuripurira kozongaro zomundu auhe, natu tjiti omarundurukiro komuano mbu matu utu ehungi kuna wo, kutja tu yenene okuṱuna komitima vyawo.—1 Kor. 9:22, 23.

10. (a) Serekarera imbi mbya tjitwa komurumendu umwe omukambure. (b) Ove wa muna vi omasa wEmbo raMukuru motjiungura tjokuzuvarisa?

¹⁰ Ovandu ovengi va muna kutja okuungurisa Embo raMukuru motjiungura tjokuzuvarisa ku ṱuna tjinene kovandu. Otjotjihorera, omurumendu omukambure wa kavarura omurumendu omukurundu ngwaa lese oumbo wetu ozombura ozengi. Eyuva rimwe, moruveze rwokuyandja okambo okape nga The Watchtower uriri, omurumendu omukambure ngwi we mu lesera etjangwa nda ri mokambo ngo. We mu lesera 2 Ovakorinte 1:3, 4, ndi ma ri tja: “OIhe younyaṋutima, nu oNdjambi womayaruriro pehi aehe womutima. Eye u tu vatera momauzeu wetu aehe.” Omunionganda ngwi wa ṱunwa tjinene i omambo nga, nga tja ningira kutja ye lesewe rukwao. Nu eye wa tja, eye nomukazendu we tjiri ve hepa omahuhumiṋino. Mena retjangwa ndi, omurumendu ngwi aa vanga okutjiwa ovingi ohunga nOmbeibela. Embo raMukuru tjiri ri ṱuna komitima vyovandu motjiungura tjokuzuvarisa!—Oviung. 19:20.

11. Ovarumendu mbe honga mombongo ve nomerizirira waye?

¹¹ Atuhe tu tjaterwa okukara pozombongarero zetu zombongo na pomaworonganeno omanene. Epu enene ndi tu i ra ku wo okukerikotamena ku Jehova. Nu wina tu muna ombatero tjinene momahongero nge za ku Jehova, ngu tu kamuna ngo. Ovarumendu ovakambure mbe yandja omahungi povitjitwa otja imbi ve nondjingonekero onene. Posi yokutja wina mave sokutjiwa kutja owo ve nomerizirira omanene. (Jak. 3:1) Mave sokukondja nomasa kutja oviṋa avihe mbi mave hongo vi zikamene kEmbo raMukuru. Tji wa ningirwa okuyandja ehungi mombongo, mo yenene okutjita vi kutja omasa wEmbo raMukuru ye ṱune komitima vyovapuratene voye?

12. Omuyandje wehungi ma yenene okutjita vi kutja Omatjangwa ye rire orupa orunanḓengu tjinene mehungi re?

¹² Tjita kutja Omatjangwa ye rire orupa orunanḓengu tjinene mehungi roye. (Joh. 7:16) Ihi matji hee tjike? Matji hee kutja mo sokukara nongengezero tjinene kutja omuano mu mo yandja ehungi roye, nomahungi wovitjitwa ngu mo serekarere poo ovisasanekero mbi mo ungurisa, avi ha isako ombango yovandu kOmbeibela. Wina tjiwa kutja okulesa omatjangwa uriri okuza mOmbeibela, kaviṋa vimwe nokuhonga okuza mOmbeibela. Nu tji wa lese omatjangwa omengi, ovandu ovengi kamaave yezemburuka. Okutja toorora nawa omatjangwa ngu mo vanga okulesa. Okuzambo toora oruveze okuyelesa, okuyekahurura, okuyesasaneka nokuraisa kutja maye yenene okuṱakamisiwa vi. (Neh. 8:8) Ehungi tji ra zikamene kombapira yehungi ndja zu kotjira tjaJehova, kondja okukonḓonona nawa ombapira yehungi ndji, nomatjangwa nge ri mu yo. Kondja okuzuva nawa kutja pe nombwaneno yatjike pokati komambo nga ungurisiwa mombapira yehungi, nomatjangwa nga yandjwa mu yo. Okuzambo ungurisa omatjangwa ngu wa toorora nawa, okuṋunisa omapu nge ri mombapira yehungi.  (Mo yenene okuungurisa omapu nge ri membo ndi Benefit From Theocratic Ministry School Education porupa 21 nga 23.) Nu otjinanḓengu pu avihe, ningira Jehova kutja me ku vatere okuhaṋasana ounongo mbu ri mEmbo re ku novakambure ovakweṋu.—Lesa Esra 7:10; Omiano 3:13, 14.

13. (a) Omukazendu umwe omukambure wa ṱunwa vi i omuano omatjangwa mu ya ungurisiwa nawa pombongarero yombongo? (b) Ove wa ṱunwa vi i omuano Embo raMukuru mu ra ungurisiwa pozombongarero zombongo?

¹³ Omukazendu omukambure moAustralia wa ṱuninwe tjinene i omuano omatjangwa mu ya ungurisiwa nawa pombongarero yombongo. Nangarire kutja we kura mongaro ombi, eye wa yakura ombuze yOmbeibela ne riyandja ku Jehova. Posi yokutja ngunda ya ri ouzeu ku ye okuyakura kutja Jehova we mu suvera. Nu oruveze tjaa ru kayenda, eye wa uta okukambura kutja Jehova we mu suvera. Otjikeṋa tji tje mu vatera okuuta okukara nongamburiro ndjo? Eye wa uta okukara nongamburiro ndjo, indu tja za nokuripurira ko oukoto ketjangwa nda ungurisiwa pombongarero imwe yombongo, nu okuzambo wa kasasaneka ku nomazeva warwe wOmbeibela. * Ove wina wa rora okuṱunwa i omuano Embo raMukuru mu ra ungurisiwa pozombongarero zombongo na pomaworonganeno omanene?—Neh. 8:12.

14. Matu yenene vi okuraisa ondangi kEmbo raJehova?

¹⁴ Hapo ove u nondangi ku Jehova kutja we tupa Embo re Ombeibela? Eye kayandjere embo ndi uriri kovandu, nungwari wina wa yenenisa omakwizikiro we wokutja ma ri karerere. (1 Petr. 1:24, 25) Okutja tjiri ma rire nawa tji twa lese Embo raMukuru aruhe, natu ṱakamisa mbi matu lese mu ro mehupo retu, nokuriungurisa tji matu vatere varwe. Tji twa tjiti nao matu raisa orusuvero nondangi yetu kotjihuze tji twa pewa i Mukuru hi. Nu tjinenenene matu raisa orusuvero nondangi kOmutjange wayo, Jehova Mukuru.