Okuisira kuheya okuzemba otjiṋa otjivi tji tja tjitwa kove na wina nokuhina okukara nongore. Ondjesiro kai hee okuṱikonaparisa ouvi mbwa tjitwa poo okutjita aayo kautjitirwe kaparukaze.

OMURARI WOMBEIBELA: “Tjindasaneye nu mu isirasane umwe tje nombiri nomukwao.”—Ovakolose 3:13.

“Indu tji wa suvera omundu, kotara koungundipare womundu ngo nungwari u tara ku imbi oviwa mbi ma kondjo okutjita.”—Aaron.

Indu tji u tjinda ongore, ma peya o rihihamisa omuini korutu na momuinyo nu wina moyenene okuzunḓa orukupo rwoye.

“Otjikando tjimwe omurumendu wandje wa ningira ondjesiro kotjiṋa tji tje ndji hihamisa tjinene. Ya ri ouzeu kwami okumuisira. Nu kombunda mbe ke mu isira, posiya mbi hihamwa omutima kutja hi tjitire nao tjimanga. Otjiṋa ho tja yandja ouzeu mbu hina ohepero morukupo rwetu.”—Julia.

RIKONḒONONA OMUINI

Otjikando tjarwe tji wa hihamisiwa i yotjiṋa omurumendu poo omukazendu woye tja hungire poo tja tjiti, ripura omuini kutja:

• ‘Hapo owami omundu ngu mbi twara oviṋa mbi he ri ohepero kotjiuru poo indee?’

• ‘Hapo mbi undjira kokutja omundu ngwe ndj zunḓa ma ningire ondjesiro kwami, poo me yenene okuyesa i kapite?’

PURASANEYE OMAPURIRO NGA

• Pe kambura oure mbu ṱapi kweṱe okuisirasana?

• Hapo matu yenene okutjitavi kutja tu isirasane tjimanga?

ONDUNGE

• Indu tjiwa hihamisiwa, o munu kutja omurumendu poo omukazendu woye u nouripura ouvi ohunga na ove.

• Kondja okuisira ongaro yomurumendu poo omukazendu woye, a mozemburuka kutja “eṱe atuhe tu tataiza moviṋa ovingi.”—Jakobus 3:2.

“Irira oupupu okuisira indu a tu yevari tji twa zunḓa, posi yokutja irira ouzeu ondataiziro tji maizu munda umwe. Okuyakura ondjesiro nokuisira, kuhepa omerisusuparisiro watjiri.”—Kimberly.

OMURARI WOMBEIBELA: “Zuvasaneye otjiposa hi ngunda ape noruveze.”—Mateus 5:25.