Indu tji pena omaunguriro wakumwe morukupo, omurumendu nomukazendu veri tjimuna omuhinge wonḓera nomuvatere we mbe nondando imwe. Nandarire indu tji vamunu ouzeu, omundu auhe utja “eṱe” nu katja “ami.”

OMIRARI VYOMBEIBELA: “Owo otji ve he tji nakurira vevari, nungwari otji mave rire onyama imwe uriri.”—Mateus 19:6.

“Orukupo ka tjiungura tjomundu umwe. Omurumendu nomukazendu mave sokuungura kumwe kutja vekare nouṋingandu morukupo rwawo.”—Christopher.

Indu tji penondjakaha, omurumendu nomukazendu mbe ha ungura kumwe ve uta okupasana ondjo, pendje nokumangurura ouzeu wawo. Ouzeu ouṱiṱi u karira ounene.

“Omaunguriro wa kumwe oo ndimwa yorukupo. Indu omurumendu wandje na ami tji tu hina okuungura kumwe, matu rire ovandu mbe hanasana etuwo rimwe nungwari mbe hakupasanene, ovandu vevari mbe hupa pamwe nungwari mbe hazuvasana indu tji mave sokutoora omikambo ominanḓengu mehupo rawo.”—Alexandra.

RIPURA OMUINI KUTJA

• Hapo mbi muna kutja ovimariva mbi mbi sutwa “ovyandje erike”?

• Hapo tji mevanga okukerinana, mbi hepa okukara kokure nomusuverwa wandje?

• Hapo mbi kara kokure neṱunḓu romusuverwa wandje, nandarire kutja eye u kara popezu nawo?

PURASANEYE OMAPURIRO NGA

• Omoviṋa viṋe mu tuungura kumwe otjovakupasane?

• Omoviṋa viṋe mu matu hepa okuriṱuna?

• Omikambo viṋe mbi twa sokutoora kutja tu kare nombepo yomaunguriro wa kumwe?

ONDUNGE

• Ripura nenyando ro tennis ndi ma mu nyanda amu yevari, auhe eri munda we, omikambo viṋe mbi ma mu sokutoora kutja mukare komunda umwe?

• Pendje nokuripura kutja, ‘Hapo me yenene okutaara vi?’ ripura kutja ‘Hapo matu yenene okutaara vi?’

“Oripura kutja hapo ouṋe nguri nawa poo nguri navi. Otjiṋa otjinanḓengu okukara nohange nombwaneno morukupo rweṋu.”—Ethan.

OMIRARI VYOMBEIBELA: “Amu tara ku imbi ovyeṋu porwavyo, nungwari tareye ku imbi ovyovakweṋu wina.”—Ovafilipi 2:3, 4.