KOVANENE
8: Otjihorera
MATJI KAMBURIRE MOYE
Ovanene mbe notjihorera otjiwa ve tjita imbi mbi mave hongo. Otjotjihorera, ove komoo undjireko kutja omuatje woye omuzandu ma kare nowatjiri indu tje kuzuu a motja, “Mu raera kutja hipo ponganda,” indu tji u hina okuvanga okuhungira kuna omundu nguri pomuvero woye.
“Pena embo rimwe ndi tja ‘Tjita imbi mbi me kuraere, ohorere ku imbi mbi me tjiti.’ Okuhungira nao ka kuungura kovanatje. Owo ve ri tjimuna esembi ndi ta naura otjivara okusanisa ku ngamwa otjiṋa tji tjiri ongondoroka naro, kunao ovanatje wina ve horera oviṋa mbi matu hungire na mbi matu tjiti, nu mave tu raere indu otjihorera tji matu raisa tji tji he ri otja koviṋa mbi matu kondjo okuvehonga.”—David.
OMURARI WOMBEIBELA: “U zuvarisa o tja: “O vaka ko,” nungwari ove u vaka poo indee?”—Ovaroma 2:21.
ONGWAYE TJERI OHEPERO
Ovanatje ovanene novaṱiṱi ve horera tjinene kovanene na komapanga wawo okukapita ovandu varwe. Pu mape hee kutja oove ngu uri omundu omutenga okuurikira ovanatje woye ondjira osemba, indu tji motjiti imbi mbi mohongo.
“Mape ya atu yarukire po otjiṋa ovikando esere natu ripura kutja hapo omuatje ma puratene poo indee, posi yokutja eṱe povikando tjiva tji tu hina okutjita imbi mbi matu hungire, omuatje mayenene okumuna. Ovanatje ve yandja ombango koviṋa avihe mbi matu tjiti, nandarire kutja katu na kumuna nao.”—Nicole.
OMURARI WOMBEIBELA: “Nungwari ounongo mbu za kOmbanda . . . owo rutengatenga oukohoke.”—Jakobus 3:17.
MOYENENE OKUTJITA VI
Konḓonona omirari vyoye ku wa kuramena. Omanyando yeṋe ngu u tarera? Hapo u tjinda vi omurumendu poo omukazendu woye novanatje? Hapo u nomapanga nge rivi? Hapo u ripurira ku varwe? Ousupi, hapo ove u raisa otjihorera tjomundu ingwi ngu uvanga kutja ovanatje woye ve ka kare tjimuna ye?
“Omurumendu wandje na ami katu undjire ko kutja ovanatje vetu vekongorere oveta eṱe oveni ndji tu ha ungurisa.”—Christine.
Ningira ondjesiro kozondataiziro zoye. Ovanatje woye ve tjiwa rukuru kutja kaove ohomonena. Indu tji wa tja“ndji isira” tjeri ohepero komurumendu poo komukazendu woye novanatje moyandja otjihorera otjiwa tjokukara nouatjiri nomerisusuparisiro.
“Ovanatje vetu ve hepa okutuzuva tji matu yakura ondataiziro yetu, nu ve hepa okutuzuva indu tji matu ningire ondjesiro kozondataiziro zetu. Indu tji tu hina okutjita nao, owo mave rihongo okuhoreka ozondataiziro zawo.”—Robin.
“Otjovanene, oweṱe mbu turi otjihorera otjinene kovanatje vetu, nu otjihorera tjetu ootjiṋa otjinene tji tu natjo mena rokutja owo otji ve muna oruveze aruhe. Otjo tjiri tjimuna embo ndi kara kamwaha oruveze aruhe, owo ku ve rihongera aruhe.”—Wendell.
