HAPO ongumbiro i tu vatera? Ii, Ombeibela i raisa nao. Ozongumbiro zovakarere va Mukuru ovaṱakame tjiri ze ve vatera. (Lukas 22:40; Jakobus 5:​13) Otjingaperi kutja ongumbiro i tunga oupanga wetu ku na Jehova, nu i tu etera ouwa momuinyo na korutu. Omomuano uṋe?

Ngatu tje u nomuatje ngwa pewa otjiyandjewa. Hapo mo mu hongo kutja opuwo tji ma fula nawa uriri? Poo mo mu hongo kutja ma raise ondangi ye? Tji matu raisa omuano mbu matu fula momambo ku tjita kutja tu ripurire ko. Hapo wina pe kara nao indu tji matu hungire ku na Mukuru? Otjingaperi. Tara kovihorera tjiva imbi.

Ongumbiro yokuraisa ondangi. Tji matu tja ndangi ku Mukuru koviṋa oviwa mbye tu tjitira, tu yandja ombango kozondaya zetu. Ku nao, mape ya atu kara nondangi nondjoroka, noumune ouwa.—Ovafilipi 4:6.

Otjotjihorera: Jesus wa raisa ondangi komuano Ihe ma zuva nokuzira ozongumbiro ze.—Johanes 11:41.

Ongumbiro yokuningira ondjesiro. Indu tji matu ningire ondjesiro ku Mukuru tu kara nomeritjiviro omawa womomutima, tu kara nonḓero yokuritanaura, nu katu vanga okutjita ouvi. Nu wina katu rimunu ondjo rukwao.

Otjotjihorera: David mongumbiro ye wa raisa omuhihamwatima nondanaukiro.—Epsalme 51.

Ongumbiro yokuningira omuhunga nounongo. Tji twa ningire Jehova okutupa ounongo nomuhunga, maku tu vatere okutoora omikambo omisemba, nu maku tu vatere kutja tu rire overisusuparise. Maku tu vatere okuzemburuka oungundipare wetu, nokukurisa ongamburiro yetu mu Tate wetu womeyuru.—Omiano 3:5, 6.

Otjotjihorera: Salomo nomerisusuparisiro wa ningira omuhunga nounongo okuhonaparera po Israel.—1 Ozombara 3:5-12.

Ongumbiro tji tu ri mombameno. Indu tji twa raere omaumba wetu ayehe ku Mukuru, matu kutuka momuinyo nu matu riyameke ku Jehova pendje nokuriyameka komasa wetu oveni.—Epsalme 62:8.

Otjotjihorera: Ombara Asa wa kumba indu tja ri kehi youzeu ounene.—2 Ekuruhungi 14:11.

Ongumbiro yokukumbira varwe mbe ri mouhepe. Ozongumbiro otja inḓo ze tu vatera kutja atu he ripurire ku eṱe oveni, nungwari tu raise otjari norusuvero ku varwe.

Otjotjihorera: Jesus wa kumbira ovemukongorere.—Johanes 17:9-17.

Ongumbiro yondangero. Indu tji matu tanga Jehova koviungura novikaṋena vye oviwa, ondengero yetu nondangi ku ye mavi kurire ko. Ozongumbiro otja inḓo wina maze tu vatere okutumbuka popezu na Mukuru nu Tate wetu.

Otjotjihorera: David wa tanga Mukuru koviutwa vye.—Epsalme 8.

Ondaya yarwe ndji tu muna mongumbiro ‘ohange yaNdjambi ndja kapita ozondunge azehe zovandu.’ (Ovafilipi 4:7) Ovandu ovaṱiṱi uriri ombe kara nohange momuinyo mouye wouzeu mbwi. Nu wina ku ve etera ouveruke korutu. (Omiano 14:30) Hapo ozongondjero zetu uriri onḓe tjita kutja tu kare nohange momuinyo? Poo pe notjiṋa tjarwe otjinanḓengu kombanda yanao?

 [Epu enandengu]

Ongumbiro i tu etera ouwa morutu na momuinyo, nu tjinenenene i tunga oupanga wetu ku na Jehova

[Otjiperendero]