EPU ROKOMBANDA
Hapo oviperendero vyakamuzu, ovinaumba poo kavinaumba?
Ouye ndino wa takavara noviperendero vyakamuzu (pornography). a Ovyo vi vazewa mozombuze zomarandisiro, omaraisiro wozombanda, ozomuvi, omisiki, omambo, ozoprograma zotiivii, ouvidio games, ozongoze, na wina kotungovi. Pe munika aayo oviperendero vyakamuzu oviṋa mbi yakurwa moruveze ndwi. Ovandu ovengi motuveze pekepeke ve tarera oviperendero vyakamuzu okukapita moruveze indwo orukuru.—Tara kokawongo nga “Ouatjiri ohunga noviperendero vyakamuzu.”
Ongaro yokutarera oviperendero vyakamuzu i runduruka. Professor Gail Dines wa tjanga nai: “Oviperendero ovandu mbyaave nangarasi ovivi tjinene, ndino vi yakurwa i yovandu ovengi.”
Omomuano uṋe okutarera oviperendero vyakamuzu mu ku yeruruka nu ovandu ve noumune uṋe? Hapo oviperendero vyakamuzu ovinaumba tjimuna ouanga, poo kavinaumba? Jesus wa tja: “Omuti omuwa u ruka ovihape oviwa, nomuti omuvi u ruka ovihape ovivi.” (Mateus 7:17) Oviperendero vyakamuzu vi eta ovihape mbya sana pi? Okumuna omaziriro, ngatu tare komapuriro tjiva ohunga noviperendero vyakamuzu.
Omomuano uṋe oviperendero vyakamuzu mu vi yenena okuṱuna ku auhe wetu?
OVATJIWE VE TJA: Ovakonḓonone nozonganga tjiva va tja okutarera oviperendero vyakamuzu ku ri tjimuna okupepa poo okuungurisa ovipurukise. Otjiṋa ho tji tjita kutja omundu ma iririre.
Brian, b ngwa iririra okutarera oviperendero vyakamuzu wa tja: “Kape notjiṋa tjaatji ndji tjaere. Ami ee rimunu tjimuna me roto. Orutu rwandje aaru kerembe nu e utu okuhihamwa otjiuru. Ami ee kondjo okuisa, posi ya ya ri ouzeu ku ami okuvyesa.”
Ovandu mbe tarera oviperendero vyakamuzu potuingi ve horeka ozongaro zawo. Owo ovandu mbe undika oviṋa vyawo nu mbe novineya. Katjikumise, ovengi ve kara nouzeu wokurimuna ourike, okuṱohoṋi, omerikendero, ozombameno, nomazenge. Moviṱo tjiva, owo nandarire ve uta okuripura okuvanga okurizepa oveni. Serge, ngwaa nana oviperendero vyakamuzu mongoze ye eyuva arihe, wa tja: “Ee ripurire ku ami omuini ne munu kutja himee piti mombate ndjo. Ee rimunu okuhinonḓengu, omunandjo, nourike. Ami ee ṱohoṋi, nu ee tira okupaha ombatero.”
Okutarera oviperendero vyakamuzu, nandarire oure woruveze orusupi, ku yenena okuṱuna komundu omuano omuvi. Dr. Judith Reisman omukonḓonone woviperendero vyakamuzu wa hungira komurungu, wo-U.S. Senate committee na tja: “Oviperendero vyakamuzu vi kakatera mourizemburuka womundu, ku nao i rira ouzeu okuvizemba.” Susan wozombura 19, ngwa tarerere oviperendero vyakamuzu kotungovi, wa tja: “Oviperendero mbyo vya kakaterere mouruvi wandje. Ovyo aavi ya nokuhinokuundjira ko. Ee munu kutja himee yenene okuviisa mo mouruvi wandje.”
OKUYARUKIRA PO OUSUPI MORUPA NDWI: Oviperendero vyakamuzu vi eta onyoneno komundu auhe ngu me vi tarere.—2 Petrus 2:19.
Omomuano uṋe oviperendero vyakamuzu mu vi ṱuna komaṱunḓu?
OVATJIWE VE TJA: “Oviperendero vyakamuzu vi teya omaṱunḓu novakupasane.”—Embo ndi The Porn Trap, nda tjangwa i Wendy na Larry Maltz.
Oviperendero vyakamuzu vi teya otukupo nomaṱunḓu
Mokuṋeṋuna ongamburiro norusuvero rwomukweṋu ngu mwa kupasana.—Omiano 2:12-17.
Mokuhinokurikendera kozonḓero zomukweṋu ngu mwa kupasana.—Ovaefese 5:28, 29.
Mokunanukirwa i yomahakaeneno womonyama tjinene.—2 Petrus 2:14.
Mokutjita kutja ovandu tjiva mbe tarera koviṋa mbyo ve vange okukara nomahakaeneno womonyama nge he ri omayakurwa ku nomukwao ngu va kupasana.—Ovaefese 5:3, 4.
Mokuhinokukara nouṱakame komundu ngu mwa kupasana.—Mateus 5:28.
Ombeibela i raera ovakupasane kutja ave ‘ha teya omakwizikiro wawo wokukara nouṱakame’ ku nomundu ngu va kupasana. (Maleaki 2:16) Okuhinokurira omuṱakame ku tjita kutja ovakupasane ve haṋike nokuteya otukupo. Ongaro otja indjo, i yenena okuṱuna kovanatje.
Oviperendero vyakamuzu wina vi yenena okuṱuna kovanatje tjinene. Brian, ngwa tamunwa rukuru wa tja: “Indu tji mba ri nozombura omurongo, mba muna embo ratate roviperendero vyakamuzu indu tje nyanda. Ami tje tara moviperendero mbi, ee horeke nu kee tjiwa kutja ongwaye tji mba suverere okutara oviperendero mbi. Ami mba kayenda komurungu okutarera oviperendero mbi nga tji mba rira omunene.” Omakonḓononeno ye raisa kutja oviperendero vyakamuzu vi yenena okuṱuna kovanatje omitanda mokuvanga okukara nomahakaeneno womonyama ngunda ve nozombura ozonḓiṱi, nu wina iho tji tjita kutja ve rire ovanautwe, nu mbe nozombameno.
OKUYARUKIRA PO OUSUPI MORUPA NDWI: Oviperendero vyakamuzu vi teya oupanga pokati kovakupasane nu vi eta omihihamo.—Omiano 6:27.
Ovikwaye Ombeibela mbi hungira ohunga noviperendero vyakamuzu?
EMBO RA MUKURU RI TJA: “Nungwari nambano mamu sokukoza ozonḓuma . . . ombakirasaneno, ouhakohoke, omananukiro wonyama, ozonḓuma ozombi, noukorokope, orondu oukorokope wa sana nokukarera ovisenginina.”—Ovakolose 3:5.
Jehova c Mukuru wa tonda oviperendero vyakamuzu. Ihi kamena rokutja ka hungirire kovingi ohunga nomahakaeneno womonyama. Eye we tu mema nozonḓuma zomahakaeneno womonyama kutja ovakupasane ve kovisasane nokuyorokera okukara novanatje.—Jakobus 1:17.
Ongwaye tji matu yenene okutja Jehova wa tonda oviperendero vyakamuzu? Ngatu tare komapu tjiva.
Eye u tjiwa kutja oviperendero vyakamuzu vi yenena okuhihamisa ovandu.—Ovaefese 4:17-19.
Eye we tu suvera nu u vanga okututjevera komaumba.—Jesaja 48:17, 18.
Jehova u vanga okutjevera otukupo nomaṱunḓu.—Mateus 19:4-6.
Eye u vanga kutja tu rire ovakohoke momeritjindiro nu tu kare nondengero ku varwe.—1 Ovatesalonika 4:3-6.
Eye u vanga kutja tu raise ondengero kotjiyandjewa tjomahakaeneno womonyama nu kutja tu ungurise momuano omuwa.—Ovaheberi 13:4.
Jehova u tjiwa kutja okutarera oviperendero vyakamuzu ku raisa okuripurira kove omuini, nu wina ku raisa ouripura wa Satan ohunga noruvakiro.—Genesis 6:2; Judas 6, 7.
OKUYARUKIRA PO OUSUPI MORUPA NDWI: Okutarera oviperendero vyakamuzu ku zunḓa oupanga omundu mbu u na wo ku na Mukuru.—Ovaroma 1:24.
Jehova u notjari ku imba mbe vanga okuisa okutarera oviperendero vyakamuzu. Ombeibela i tja: “Muhona u nounyaṋutima notjari, u nomutima omure norusuvero orukarerere. Eye u tjiwa kutja eṱe twa ungurwa pu tjike, nu u zemburuka kutja oweṱe oruuma.” (Epsalme 103:8, 14) Jehova u ṋanga overisusuparise okuya popezu na ye “kokutja [ve] kapewe ounyaṋutima nu [ve] kamune otjari okuvaterwa moruveze orusemba.”—Ovaheberi 4:16; tara kokawongo nga “Okuisa okutarera oviperendero vyakamuzu.”
Ovandu ovengi va yakura ombatero ya Mukuru. Hapo ombatero ye, tjiri i vatera? Tara kutja Ombeibela i tja vi ohunga novandu tjiva mba tuurunga ozongaro ozombi: “Nungwari mwa kohororwa komauvi, mwa yapurirwa Ndjambi, nu mwa varwa otja ovasemba komurungu waNdjambi mena raMuhona Jesus Kristus na mena rOmbepo yaNdjambi wetu.” (1 Ovakorinte 6:11) Tjimuna omuapostele Paulus, ovandu otja imbo mave yenene okutja: “Ami me yenene okutjinda avihe, Kristus tjinga e ndji pa omasa womasorero.”—Ovafilipi 4:13.
Susan, ngwa isa okutarera oviperendero vyakamuzu wa tja: “Jehova erike ongu ma yenene okukuvatera okuisa okutarera oviperendero vyakamuzu. Ove mo yenene okurira omukohoke komurungu we, indu tji wa ningire ombatero nomuhunga ku ye. Eye kena ku kwesa ko.”
a Embo ndi “oviperendero vyakamuzu” ri heya omambo, poo ozomuvi nḓa ungurirwa okusekamisa ozonḓuma zovatarere, ovapuratene, poo ovalese. Ovyo vi yenena okukara moviperendero, momatjangwa na movipuratenwa.
b Jehova ena ra Mukuru otja tji pa raisiwa mOmbeibela.
c Omana tjiva morupa ndwi ya rundururwa.
