Kena 19 September 2019, Hari Empat, enam iku menyadi kitai ari Saratov Rusia dikumbai besalah ketegal sida Saksi-Saksi Jehovah.

Akim Dmitry Larin ari Kot Besai ba Saratov mutuska, Menyadi Konstantin Bazhenov enggau Menyadi Aleksey Budenchuk dijil pengelama tiga taun enam bulan; Menyadi Feliks Makhammadiyev tiga taun; Menyadi Roman Gridasov, Menyadi Gennadiy German, sereta Menyadi Aleksey Miretskiy dua taun. Nambahka nya, nitihka pemutus ari kot, pengelama lima taun pengudah sida pansut ari rumah jil, sida enda dikemendarka megai sebarang pengawa ke orang mayuh. Ketegal nya, sida deka ngapil kes tu.

Kena 12 Jun 2018, piak bekuasa ba Rusia datai ngenyit ngagai tujuh buah rumah Saksi ba Saratov, lalu enam iku menyadi lelaki kitai dikumbai ngereja pengawa jenayah lalu ditangkap. Semua sida bisi ruang bilik, lalu Menyadi Budenchuk bisi dua iku anak ke agi besekula. Menyadi Budenchuk enggau Menyadi Makhammadiyev, sama bela ditan nyauka setaun sebedau kes tu dipechara.

Ba ujung kes sida dipechara, enam iku menyadi kitai tu sama bela diperansang ari ayat Bup Kudus. Sida madahka diri enda bedendam ngagai piak ke bedawa.

Nyentukka diatu, perintah Rusia udah ngejil tujuh iku menyadi lelaki kitai. Kelimpah ari nya, lebih ari 250 iku menyadi kitai ke bukai disakal ketegal pengarap sida. Bisi 41 iku orang ke dijil, lalu 23 iku ditan ba rumah.

Kitai besampi ngambi bala menyadi kitai ke tetap ati sereta berani ba Rusia “tan natka semua pemerinsa enggau ati ti liat, lebuh kita, enggau ati ti gaga.”—Kolosi 1:11.