Kena 18 Oktober 2019, Menyadi Dmitriy Barmakin dilepaska ari rumah jil lalu semina ditan ba rumah. Iya ulih begulai baru enggau bini iya Elena, ti udah jadi enggau iya pengelama 13 taun. Sebedau tu, Menyadi Barmakin udah dijil pengelama 447 hari seraya iya nganti kes diri diapil.

Kena 28 Julai 2018, Menyadi Barmakin ngelawa ini bini iya ke beumur 90 taun. Enda memukai, seraban polis bekenaka tutup mua sereta ngembuan senyata tama ngagai rumah nya. Lalu sida nangkap menyadi Barmakin, ketegal iya sebagi ari Saksi-Saksi Jehovah. Kot Menua Vladivostok mutuska menyadi Barmakin dijil pengelama dua bulan sebedau kes iya diapil. Tang bedau lama ti udah, timpuh iya dijil dipanjaika sida baru, indah nyentukka lapan kali kes nya diapil.

Maya kes nya dipechara, kot nerangka pengawa menyadi Barmakin, enda ngachau orang bukai, sereta ukai ‘ektremis’ ke ngelanggar undang-undang menua, mega enda ngachau pengelikun menua. Dawa ke diberi ngagai menyadi Barmakin enda ulih diterima, sereta enda sejalai enggau Undang-Undang Rusia. Nitihka undang-undang nya, enggau terang bisi madah, semua orang “bibas milih, ngembuan, sereta ngerembaika pengarap tauka utai dipechaya iya tauka bejalaika pengawa iya.”

Kitai berasai gaga ati laban Hakim Stanislav Salnikov ari menua nya mutuska menyadi Barmakin dilepaska ari rumah jil. Taja pia, kes iya agi terus ditasat.

Kitai amat andal, Jehovah deka terus ngeringka bala menyadi kitai ba Rusia. Kelebih agi sida ke ditan ba rumah jil tauka ba rumah. Baka menyadi Barmakin, sida nyadika teladan ti manah ngagai menyadi ba serata dunya, ketegal sida tetap ati sereta berani.—Pilipi 1:13, 14.