Kena 19 Ogos 2021, Kot Pelilih Birobidzhan ba Jewish Autonomous Region ngumbai Menyadi Anastasiya Guzeva besalah lalu meri iya ukum jil pengelama 30 bulan ti ditangguh.

Anastasiya Guzeva

• Ada: 1979 (Birobidzhan)

• Biograpi: Iya enggau dua iku menyadi lelaki iya dibesaika indai tunggal. Lebuh iya agi mit, iya beminat macha bup, main sukan sereta betanda. Lebuh iya beumur sepuluh taun iya tepedaka siti Bup Kudus ba rumah ini iya. Kenyau ari nya, iya keran deka belajar mayuh agi pasal Petara. Udah nya, seduai indai iya berengkah belajarka Bup Kudus enggau Saksi-Saksi Jehovah. Seduai iya dibaptisa kena taun 1995. Iya jadi enggau laki iya Konstantin kena taun 2001

Apartment Anastasiya seduai Konstantin diserungkai piak ti bekuasa Rusia kena bulan Mei 2018. Kena Julai 2019, piak ti bekuasa nuduh Konstantin ngereja pengawa “ekstremis”. Lalu kena Februari 2020, Anastasiya pan dituduh sama baka laki iya. Ke pengujung iya, piak ti bekuasa ngepunka 19 iti kes jenayah kena ngelaban 23 iku Saksi Jehovah ba Jewish Autonomous Region.

Ketegal Anastasiya seduai Konstantin dituduh, pengidup seduai iya bisi mayuh penusah. Sebedau tu, seduai iya gawa ba sekula musik. Tang ketegal udah dikumbai “ekstremis,” seduai iya dipejal badu agi gawa dia. Kena Februari 2021 Konstantin diberi ukum jil enggau pengelama dua taun setengah, ke ditangguh.

Anastasiya nerangka nama utai ke udah nulung iya betan: “Manah agi enti nuan dulu nyangka diri deka diperinsa, lalu nyediaka diri, ngambika nuan nemu utai ti patut dikereja nuan lebuh penusah nya nyadi. Ambika chunto, lebuh macha pasal pengawa ke dikereja Jesus beberapa hari sebedau iya dibunuh, endang terang iya udah berundingka dulu utai ke patut dikereja iya lebuh iya ditangkap, . . . iya udah merambu ni maya iya patut bejaku, ni maya iya enda patut bemunyi, sereta nama utai ke patut disebut iya lebuh iya milih bejaku.”

Anastasiya madahka diri rindu agi ke ayat Rome 8:38, 39 ari ke suba. Ku iya nerangka: “Ayat tu meri kitai kebuah deka gaga ati. Jehovah enggau Jesus, dua iku orang ti pemadu besai ba dunya raya, sayauka aku. Lalu nadai orang ulih nagang seduai iya ari rinduka aku. Penemu tu meransang aku terus betan sereta ngayanka pemerani.”