Dijil Ketegal Pengarap Sida
Piak ti bekuasa menua Rusia balat agi ngenusahka Saksi-Saksi Jehovah. Sida ngereja tu nengah siti kimpin ke nyauka sebaka maya Soviet suba. Nyentuk ke 18 Mac 2019, piak ti bekuasa udah meri ukum jil sebedau dipechara ngagai 24 iku Saksi Jehovah, lalu 26 agi ditan ba rumah sida empu sereta enda dikemendarka pansut. 55 iku ke bukai enda dikemendarka pansut ari alai sida diau. Semua sida tu dituduh ngatur, sama enggau, tauka meri sukung ngena duit ngagai pengawa gerempung “extremis.” Abis nadai bisi 150 iku Saksi-Saksi Jehovah ke benung ditasat.
Kena Julai 2018, pegawai ba menua Omsk meri ukum jil sebedau dipechara ngagai seiku Saksi-Saksi Jehovah ke indu. Tu keterubah iya nyadi ba menua nya, lalu pekara tu balat ngachau sereta ngasuh orang irau pasal utai ke deka nyadi. Udah nya, iya dilepaska tang agi ditan ba rumah iya empu. Tang, beberapa bulan udah nya, kena Oktober 2018, piak polis ba nengeri Sychevka nangkap 2 iku agi Saksi-Saksi Jehovah ke indu. Seduai agi dijil sebedau dipechara lalu nadai atur pasal seduai digaga nyentuk ke maya seduai iya dilepaska kena 19 Mei 2019.
Piak bekuasa nguji madahka diri nadai besalah ngereja pengawa tu. Sida madahka diri nitihka atur ke digaga ba bulan April 2017 ke nagang pengawa Saksi-Saksi Jehovah. Sida mega salah ngena Artikel 282 ari Undang-Undang Jenayah. Ke amat iya, piak ti bekuasa nya merinsa Saksi-Saksi Jehovah ketegal nyembah Jehovah taja pan pengawa nya enda ngachau orang bukai. Enti sema sida dikumbai besalah, sekeda ari sida ke udah ditangkap deka diukum jil abis lama 10 taun.
Berengkah ari bulan Februari 2018, piak ti bekuasa ngereja pengawa ti sama lebuh nangkap Saksi-Saksi Jehovah. Piak polis datai mai mayuh senyata lalu terus tama rumah Saksi-Saksi Jehovah, lalu sida kesuah agi numpilka senapang ba pala sida ke bisi dalam rumah nya—nyengkaum anak sereta orang tuai—lalu ngejuka sida ke geladak. Maya piak ti bekuasa nya nyerungkai rumah nya, sida ngerampas utai ke enggi orang ti bisi dalam rumah nya sereta mai sekeda ari Saksi-Saksi Jehovah ngagai endur kena ditasat. Pegawai ke nasat nya nuduh Saksi-Saksi Jehovah ngereja pengawa jenayah lalu nganjung peminta ngagai kot ngambika sida ulih meri ukum jil ngagai sida ke dituduh sebedau dipechara. Maya Saksi-Saksi Jehovah nya udah ba jil, sida sekali agi nganjung peminta ngagai kot ngasuh ukum nya ditambahka agi. Lalu, kot kesuah agi nitihka aja peminta ari sida.
Kena 15 Februari 2019, siti pengawa ke chukup jai nyadi ba nengeri Surgut. Piak ti bekuasa ba endur nya merinsa tujuh iku Saksi Jehovah pengudah sida nyerungkai rumah bala Saksi Jehovah ba endur nya. Semua mansa dipejal telanjai, dichekak nyentuk ke enda ulih enseput, disembur ngena ai, dipalu, lalu udah nya ditimbak ngena pistol lekterik ba lubang burit. Pengawa ti balat jai tu digaga ba tingkat satu Opis Tasat Rusia ba Surgut. 19 iku Saksi Jehovah (nyengkaum seiku indu) ditasat ketegal ‘ngatur pengawa gerempung ekstremis.’ Tiga iku lelaki ari sida ke diperinsa benung dijil sebedau dipechara.
Dennis Christensen Dijil Enggau Chara ti Enda Lurus
Pengudah kira setaun dipechara, dibai ngagai kot lebih ari 50 kali, Dennis Christensen, seiku peranak menua Denmark ke beumur 46 taun diukum jil sepengelama enam taun ketegal ngereja pengawa bekaul enggau pengarap iya. Dennis seiku ari Saksi Jehovah. Kena 6 Februari 2019, Hakim Aleksey Rudney ari Kot Menua Zheleznodorozhniy ba Oryol meri ukum ngagai Christensen ketegal tuduh pelesu ke digaga pasal iya. Iya dituduh ‘ngatur pengawa gerempung ekstremis’ ke ngelanggar Artikel 282.2(1) ari Undang-Undang Jenayah Menua Rusia. Luyar iya benung ngapil pemutus nya.
Christensen ditangkap kena 25 Mei 2017 ba menua Oryol Rusia. Piak polis ke mai mayuh senyata sama enggau sekeda pegawai ari opis ti nyaga pengelikun dalam menua (FSB) enggau ngenyit datai ngagai siti pengawa sembah ninting minggu Saksi-Saksi Jehovah ke enda ngachau orang bukai. Kenyau ari nya, iya dijil ba Endur Ngetan No. 1 ba Menua Oryol.
Terus Nguji Ngetuka Pengawa Jil ti Enda Lurus
Pengawa merinsa Saksi-Saksi Jehovah ke majak nambah ba menua Rusia nunjukka piak ti bekuasa ba menua nya ukai semina deka ngetuka pengawa Saksi-Saksi Jehovah tang mega enggai ngemendarka sida bisi pengarap. Luyar ke ngarika Saksi-Saksi Jehovah bedau mujur ngetuka pengawa jil ti enda lurus tu. Sida luyar udah nganjung kes nya ngagai UN Working Group on Arbitrary Detention (WGAD), Komiti Hak Mensia ari PBB sereta ngagai Kot Hak Mensia Eropah. Saksi-Saksi Jehovah ba serata dunya ngarapka kot entarabansa deka nagang menua Rusia ari terus nagang orang ari ngembuan hak bisi pengarap diri empu.
Tusun Timpuh
18 Mac 2019
24 iku Saksi Jehovah benung dijil.
15 Februari 2019
Piak polis enggau ngenyit ngabas rumah ba Surgut enggau Lyantor ke ba begian nengeri Khanty Mansi Autonomous. Tiga iku Saksi Jehovah ke lelaki ditangkap lalu dijil sebedau dipechara.
6 Februari 2019
Piak polis enggau ngenyit ngabas rumah ba Uray. Seiku Saksi Jehovah ke lelaki ditangkap lalu dijil sebedau dipechara.
Piak polis enggau ngenyit ngabas rumah ba Saransk. Tiga iku Saksi Jehovah ke lelaki ditangkap lalu dijil sebedau dipechara.
Kot Menua Zheleznodorozhniy ngumbai Dennis Christensen besalah lalu meri iya ukum jil sepengelama 6 taun.
27 Januari 2019
Piak polis enggau ngenyit ngabas rumah ba Ivanovo. Seiku Saksi Jehovah ke lelaki ditangkap lalu dijil sebedau dipechara.
12 Disember 2018
Piak polis ba Neftekumsk tekalanya nangkap seiku lelaki ke Saksi-Saksi Jehovah maya iya ngagai balai polis ketegal diasuh datai.
9 Disember 2018
Piak polis enggau ngenyit ngabas rumah ba Neftekumsk. Dua iku Saksi ke lelaki Jehovah ditangkap lalu dijil sebedau dipechara.
10 November 2018
Piak polis enggau ngenyit ngabas siti kantin. Beberapa iku Saksi-Saksi Jehovah ke lelaki ditangkap lalu dijil sebedau dipechara.
9 November 2018
Piak polis enggau ngenyit ngabas rumah ba Novosibirsk, nangkap seiku Saksi Jehovah ke lelaki lalu ngejil iya sebedau dipechara.
18 Oktober 2018
Piak polis enggau ngenyit ngabas rumah ba Dyurtuli, nangkap seiku Saksi Jehovah ke lelaki lalu ngejil iya sebedau dipechara.
9 Oktober 2018
Piak polis enggau pegawai spesial enggau ngenyit ngabas rumah ba Kirov. Sekeda lelaki ke Saksi Jehovah, nyengkaum Andrzej Oniszczuk ke peranak menua Poland, ditangkap lalu diukum jil sebedau dipechara.
7 Oktober 2018
Piak polis enggau pegawai spesial enggau ngenyit ngabas rumah ba Sychevka lalu nangkap Nataliya Sorokina enggau Mariya Troshina. Dua iku indu nya diukum jil sebedau dipechara nyentuk ke 19 Februari 2019. Diatu bisi tiga iku Saksi Jehovah ti indu ke benung dijil ba menua Rusia ketegal dituduh ngereja pengawa “ekstremis.” Tu nyengkaum seiku agi ke benama Anastasiya Polyakova ke ditangkap ba bulan Julai.
2 Ogos 2018
Piak polis enggau pegawai ari opis ti nyaga pengelikun dalam menua, enggau ngenyit ngabas rumah ba Khabarovsk. Seiku lelaki ke Saksi Jehovah ditangkap lalu dijil sebedau dipechara.
28 Julai 2018
Piak polis enggau ngenyit ngabas rumah indai seiku lelaki ke Saksi Jehovah. Sida nangkap lelaki nya lalu meri ukum jil sebedau dipechara.
25 Julai 2018
Polis ke mutarka pekara ti bekaul enggau pengawa ngeruga menua ari raban pegawai spesial sereta lengkas ke ba baruh raban ti nyaga pengelikun menua enggau ngenyit nyerebu rumah ba Kostroma. Seiku Saksi Jehovah ke lelaki ditangkap lalu diukum jil sebedau dipechara.
22 Julai 2018
Piak polis enggau pegawai ari opis ti nyaga pengelikun dalam menua enggau ngenyit ngabas rumah ba Berezovskiy. Dua iku Saksi Jehovah ke lelaki, ditangkap lalu diukum jil sebedau dipechara.
15 Julai 2018
Piak polis nyerungkai rumah sekeda Saksi-Saksi Jehovah ba Penza. Seiku Saksi Jehovah ke lelaki, ditangkap lalu diukum jil sebedau dipechara.
4 Julai 2018
Piak polis ngabas ngenyit rumah ba Omsk. Sergey enggau Anastasiya Polyakov ditangkap lalu diukum jil sebedau dipechara. Polyakova nya Saksi Jehovah ke indu ti keterubah ba menua Rusia ke ditangkap lalu didawa ngereja pengawa “ekstremis.”
3 Julai 2018
Polis nangkap Andrey Stupnikov ba siti padang bilun di Krasnoyarsk lalu meri iya ukum jil sebedau dipechara.
12 Jun 2018
Piak polis ngabas ngenyit rumah ba Saratov. Sekeda Saksi Jehovah ke lelaki ditangkap lalu diukum jil sebedau dipechara.
Pun Bulan Jun 2018
Piak polis ngabas ngenyit rumah ba Tomsk enggau Pskov. Seiku Saksi Jehovah ke lelaki ditangkap lalu diukum jil sebedau dipechara.
Mei 2018
Piak polis ngabas ngenyit rumah ba orenburg, Birobidzhan, Perm, Naberezhnye Chelny, Magadan, enggau Khabarovsk. Sepuluh iku Saksi Jehovah ke lelaki ditangkap lalu diukum jil sebedau dipechara.
April 2018
Piak polis ngabas ngenyit rumah ba Ufa, Polyarny, Vladivostok, and Shuya. Sekeda Saksi Jehovah ke lelaki ditangkap lalu diukum jil sebedau dipechara.
19 Februari 2018
Pechara jenayah ngagai Dennis Christensen berengkah ba Kot Menua Zheleznodorozhniy. Hakim Aleksey Rudnev ngemataka pengawa nya.
20 Julai 2017–November 2018
Ukum jil sebedau dipechara ngagai Dennis Christensen diberi betangkan-tangkan. Sekali ari Kot Menua Sovietskiy, lalu udah nya ari Kot Menua Zheleznodorozhniy.
26 Mei 2017
Kot Menua Sovietskiy ke ngemataka endur Oryol meri ukum jil dua bulan sebedau dipechara ngagai Dennis Christensen.
25 Mei 2017
Piak polis enggau ngenyit ngabas pengawa begempuru ketegal pengarap ba Oryol lalu nangkap Dennis Christensen.