“Maya aku napi penanggul ba sekula, aku deka berundingka seseiku orang ke diminatka aku, ti ngembuan penanggul ke sama. Aku nguji deka neladan iya, lalu nya nulung aku senang agi napi penanggul ke enda senang.”—Haley.

 Ketegal nitihka teladan orang bukai, nuan ulih nyeliahka penanggul lalu bulih juluk ati nuan. Tang, tentuka orang nya teladan ti manah.

•  Nama kebuah nuan patut milih teladan ti manah?

•  Chara milih

•  Nama ku nembiak serambau nuan

•   Orang ke dipilih nuan nyadika teladan ulih dipeda ari ulah nuan.

   Bup Kudus ngelalau orang Kristian beratika orang ti bisi teladan ke manah. Nitihka Bup Kudus, “Peratika pengidup sida, lalu tunda pengarap sida.”—Hebrew 13:7.

   Chara: Ketegal orang ke dipilih nuan nyadika teladan ulih dipeda ari ulah nuan, pilih meh sida ke ngembuan ulah ti manah, ukai semina sida ke tebilang tauka serambau nuan aja.

   “Aku belajar mayuh utai ari seiku menyadi Kristian ke benama Adam. Nyengkaum ulah sereta pemanah iya. Aku agi ingat enggau silik pasal utai ke dipadah sereta digaga iya. Iya enda nemu, teladan iya udah meri asil ti manah ba aku.”—Colin.

•   Orang ke dipilih nuan nyadika teladan, ulih dipeda ari chara nuan berunding sereta emosi nuan.

   Bup Kudus madah, “Orang ke jai ngerusak moral ti menyana.”—1 Korint 15:33.

   Chara: Pilih meh orang ke bisi pemanah ti badas, ukai bepanggai ngagai penyigat tauka pemajik seseiku orang. Enti enda, nuan empu ke deka asa.

   “Nuan deka ngasaika diri enda berega sereta enda manah gamal enti suah mandingka diri enggau orang ke tebilang. Nuan engka kelalu beberatka gamal diri.”—Tamara.

   Uji perundingka: Nama nyadi enti nuan milih orang ke tebilang tauka orang ke landik ba sukan nyadika teladan?

•   Orang ke dpilih nuan nyadika teladan deka nentu sekalika nuan bulih juluk ati tauka enda.

   Bup Kudus madah, “Enti nuan begulai enggau orang ke bepenemu-dalam, nuan deka nyadi orang ke bepenemu-dalam baka sida.”—Jaku Dalam 13:20.

   Chara: Pilih meh orang ke nyadi teladan, ti ulih meransang nuan ngayanka ulah manah ke deka diayanka nuan. Udah nya, ngiga chara ti betul kena ngulihka juluk ati nuan.

   “Ari ke netapka juluk ati ti enda terang baka, ‘Aku deka nyadi orang ke lebih betanggungjawap,’ nuan ulih madah, ‘Aku deka nyadi lebih betanggungjawap baka Jane. Iya selalu nitihka jam ti udah disemaya, lalu ngereja pengawa iya enggau manah.’”—Miriam.

   Batang ajar: Enti nuan milih orang ke bisi teladan ti manah, nuan ulih nentuka, nuan deka nyadi orang ke baka ni.

 Bisi dua iti chara nuan ulih milih orang nyadika teladan.

1.   Nuan ulih milih ni bagi pemanah ke deka dikembuan nuan, lalu pilih meh orang ke ngembuan pemanah nya.

2.   Nuan ulih nyadika seseiku orang nyadika teladan, lalu pilih meh pemanah iya ke deka ditunda nuan.

 Keretas kereja ba artikel tu ulih nulung nuan.

 Orang ke dipilih nuan nyadika teladan nyengkaum:

•  Nembiak serambau. “Aku deka baka kaban rapat aku. Iya amat ibuh ke orang bukai lalu meri awak ngagai orang bukai. Taja pan iya biak ari aku, tang aku ulih meda pemanah iya ke nadai ba aku. Aku deka neladan iya.”—Miriam.

•  Orang ke besai tuai. Nuan ulih milih apai indai nuan empu tauka bala menyadi Kristian. “Apai indai nya meh teladan aku. Sida ngembuan ulah ti patut dipuji. Taja pan sida bisi pengelemi, aku ulih meda penetap ati sida. Maya aku mansang besai baka sida, aku mega ngarapka bisi orang bukai madahka utai ti sama baka sida, pasal aku.”—Annette.

•  Orang ke dalam Bup Kudus. “Aku milih teladan ti manah dalam Bup Kudus. Chunto iya, Timothi, Rut, Jop, Peter, enggau anak mit indu bansa Israel. Mayuh agi aku belajar pasal orang ke ba Bup Kudus, nyata agi sida ba aku. Aku rinduka bup Tirulah Iman Mereka, enggau ‘Indeks Anutan’ ke bisi dalam dua iti bup Pertanyaan Kaum Muda.”—Melinda. a

 Chara: Uji milih beberapa iku orang ke bisi teladan ti manah. Rasul Paul madah ngagai menyadi Kristian iya, “peratika sida ke nunda teladan ti udah diberi kami ngagai kita.”—Pilipi 3:17.

 Nemu nuan? Nuan mega ulih nyadi teladan ti manah ngagai orang bukai! Bup Kudus madah, “awakka nuan empu, ari jaku, ulah, pengerindu, pengarap enggau pengidup nuan ti tuchi, nyadi teladan ke orang ti arap.”—1 Timoti 4:12.

 “Nuan ulih nguji ngaga pemansang, lalu ba maya ti sama nulung orang bukai mega. Nuan enda nemu sapa ke deka neladan nuan, nuan mega enda nemu, enti jaku nuan nya ulih ngubah pengidup seseiku orang.”—Kiana.