Kesuah iya, orang biak enda ibuh irau pasal nyaga apai indai. Apai indai nuan engka agi biak sereta bepengerai.

 Tang baka ni enti apai indai nuan enda bepengerai maya nuan agi biak? Peratika utai ti diasaika dua iku nembiak tu.

•  Cherita Emmaline

•  Cherita Emily

 Indai aku bisi penyakit Ehlers-Danlos syndrome (EDS). Penyakit tu amat jai sereta ulih ngachau urat, kulit enggau darah.

 Penyakit tu nadai ubat. Lalu pengerai indai majak jai kenyau ari 10 taun ti udah. Kekadang darah iya balat nurun, lalu nya engka ulih ngachau nyawa iya. Bisi mega maya, indai berasai pedis amat lalu nyauka putus pengarap.

 Kami sebilik Saksi-Saksi Jehovah. Kami bulih mayuh peransang ari bala menyadi ba eklisia. Chunto iya, empai lama ti udah, seiku nembiak indu ke serambau aku meri siti kad ngagai kami sebilik. Iya madahka diri sayauka kami, lalu iya madah iya besedia deka nulung kami. Aku amat gaga bisi kaban baka iya!

 Bup Kudus mega nulung aku. Siti ari ayat ke dikerinduka aku ba Masmur 34:18 ke madah, ‘Jehovah diau semak orang ke tusah ati.’ Lalu siti da agi ba Hebrew 13:6 ke madah, ‘Jehovah endang penyaup aku, nya alai aku enda takut.’

 Ayat ba Hebrew nya amat meransang aku, laban aku takut lenyau indai. Aku amat sayauka iya, lalu aku amat beterima kasih agi begulai enggau iya ninting hari. Ayat nya ngasuh aku sedar, aku ulih napi utai ke dudi hari enggau ati ti andal, enda ngira nama nyadi.

 Tang bisi siti da agi utai ke dikenangika aku. Penyakit EDS nya, penyakit peturun. Indai bulih penyakit nya ari ini aku. Au, aku mega bisi penyakit EDS. Tang Hebrew 13:6 ngasuh aku andal, Jehovah deka nyadi “penyaup” aku.

 Nya kebuah, aku amat beterima kasih ke utai ti dikembuan aku ke diatu. Ukai kelalu betatika utai ti udah nyadi, tauka kelalu irau pasal utai ke bedau nyadi. Enti aku kelalu berunding pasal pengerai indai, aku balat agi tusah ati. Bup Kudus madahka, utai ke ditapi kitai diatu nya “mit sereta enda lama” enti dibandingka enggau pengadang ke jemah ila, iya nya idup belama iya lalu nadai agi penyakit.

 Perundingka: Nama kebuah Emmaline agi ngembuan runding ti manah? Baka ni nuan deka terus ngembuan runding ti manah lebuh napi pemerinsa?

 Maya aku agi ba sekondari, apai bisi depression (kemurungan). Iya mayuh berubah, lalu aku baka ke enda ngelala iya. Kenyau ari nya, apai majak tusah ati, takut, sereta kesal. Iya kala napi depression pengelama 15 taun. Nya tentu enda senang ba iya, laban iya selalu berasai tusah ati taja pan iya nemu, iya enda patut baka nya!

 Kami Saksi-Saksi Jehovah. Eklisia mayuh meransang kami sebilik. Bala menyadi amat manah sereta nemu utai ke diasaika kami. Sida enda kala ngumbai apai aku ngenusahka sida. Lebuh aku meda pengeliat ati apai ngelaban penyakit tu, nya ngasuh aku majak sayauka iya.

 Aku lelengauka maya apai gaga ati, maya iya enda pedis, sereta enda selalu tusah ati. Aku amat kasih meda pemedis apai aku napi asai ati ti enda manah ninting hari.

 Taja pia, apai aku bebendar deka ngemansangka runding ti manah. Maya iya benung balat napi depression, ninting hari iya bebendar deka macha Bup Kudus, taja pan beberapa iti ayat aja. Apai bulih peransang! Utai ke dikereja iya nya baka ke mit aja, tang nya meh ke nulung iya. Aku amat temegahka apai, laban iya enda ngalahka diri taja pan bisi depression.

 Aku amat rinduka ayat ba Nehemiah 8:10 ke madah, ‘Pengaga ti diberi Jehovah ngagai kita, deka ngasuh kita kering.’ Nya endang amat. Ati aku ti asa, penuh enggau pengaga maya aku begulai enggau menyadi Kristian, datai gempuru, sereta kisuk ba pengawa ke Jehovah. Aku berasai kering sereta ransing. Teladan apai ngajar aku, enda ngira nama utai ke ditapi kitai, Jehovah seruran nyukung kitai.

 Perundingka: Baka ni Emily meri sukung ngagai apai iya ke sakit? Baka ni nuan nulung orang ke sakit depression?