Nuan engka ngasaika semua kaban nuan ngena media sosial, lalu sida seruran berandauka nya. Engka sida ngeleseka nuan ketegal nuan nadai ngena nya. Nama patut ditemu nuan pasal situasi nya? Lalu nama patut digaga nuan?

 Nuan enda kediri. Mayuh apai indai enda ngasuh anak sida ngena media sosial. Sida sedar media sosial ulih mai penusah baka ke ba baruh tu:

•   kemurungan sereta penanggul ba pengerai mental ke bukai.

•   tepedaka pornografi, sexting, sereta dibuli ngena online.

•   salah faham entara bala kaban.

 Mayuh bala remaja milih ngetu ngena media sosial. Sida empu sedar, ngena media sosial nya ngenusahka sida. Peratika sekeda pengalaman bala remaja:

•   Priscilla sedar iya ngena mayuh awak ba media sosial lalu iya patut ngena awak nya ngereja utai ti penting agi.

•   Jeremy enda rindu lebuh iya meda utai ti enda senunuh ba media sosial, lalu iya enda ulih nagang utai nya ayan ba talipun iya.

•   Bethany ngasaika lebuh iya ngena media sosial, tu ngasuh iya kelalu berundingka pengawa ke dikereja orang bukai.

 “Aku mutuska diri muai aplikasi media sosial, lalu aku gaga ati ngereja nya. Aku enda nesal ngereja nya, tang aku gaga ati bisi mayuh awak ngereja utai ti penting agi ba aku.”—Sierra.

 “Orang senang gian ngena media sosial, lalu aku enda rindu utai nya. Suba aku kelalu irau sekalika orang deka like tauka komen pasal utai ke dipos aku. Enda senang ba aku deka muai aplikasi media sosial nya, tang udah nya aku berasai gaga ati. Aku berasai tenang agi nadai media sosial.”—Kate.

 Ngasika atur ari apai indai. Tunjukka ngagai sida nuan chukup matang kena idup sejalai enggau atur ke digaga sida lalu enda jampat ringat tauka mutap.

 Prinsip Bup Kudus: “Orang ke beli ngayanka pengeringat diri di mua orang mayuh, tang orang ke mereti, nemu liat ati lalu nagang diri ringat.”—Jaku-Dalam 29:11.

 Sekeda orang engka meransang nuan belalai ngena media sosial, sereta ngena akaun ti enda ditemu apai indai nuan. Nya utai ti salah! Enti nuan enda jujur, nuan deka berasai besalah sereta takut. Enti sida nemu pasal utai ke udah digaga nuan, nuan deka dianu lalu sida tusah deka arapka nuan agi.

 Prinsip Bup Kudus: “Kami deka ngereja semua utai enggau lurus.”—Hebrew 13:18.

 Ngaga pemutus ari ati nuan. Baka bala remaja ke disebut tadi, uji perundingka kebuah nuan patut nyeliahka media sosial. Enti nuan sedar media sosial nya enda manah ke nuan, nuan deka nyeliahka nya ukai semina diasuh apai indai tang ketegal pemutus nuan empu. Enti nuan ngereja nya, nuan enda malu lebuh ditanya bala remaja ke serambau enggau nuan lalu sida engka enda ngeleseka nuan agi.

 Kena nyimpulka nya: Bekerejasama enggau apai indai nuan, lalu perundingka kebuah nuan setuju enggau pemutus ke digaga sida ngambika nuan ulih ngasaika pemutus nya datai ari nuan. Ke diatu, nuan ulih idup nadai media sosial.