•  Nama kebuah aku patut sesais?

•  Nama utai ke nagang aku ari sesais?

•  Baka ni aku nentuka diri bagas sesais?

•  Anang kelalu

•  Nama ku nembiak serambau nuan

 Ba sekeda menua, bala nembiak jarang deka sesais lalu tu ulih ngachau pengerai sida. Tang, Bup Kudus madah “matihka tubuh beguna.” (1 Timoti 4:8) Uji perundingka sekeda pekara ba baruh tu:

•   Sesais ulih muai stress. Pengawa fisikal ulih ngemanahka agi hormon endorfin. Endorfin nya bahan kimia ke bisi dalam untak ti ulih ngasuh nuan berasai nyamai sereta gaga. Bisi orang madah, sesais nya siti ari chara muai stress.

   “Enti aku joging tumu pagi, aku ngasaika diri gaga agi sereta ulih ngereja mayuh utai sehari nya. Joging ulih ngemanahka mood aku.”—Regina.

•   Sesais ulih ngemanahka tubuh nuan. Enti nuan bisi sesais, nuan deka nyadi kering, bepengerai sereta ulih ngereja mayuh utai.

   “Aku berasai gaga amat ati laban ulih ngaga 10 kali chin-ups. Taun nyin tadi, sekali pan enda ulih. Aku mega gaga ulih nyaga tubuh diri.”—Olivia.

•   Sesais ulih ngemanjaika umur nuan. Sesais ulih nyaga jantung sereta ngemanahka chara nuan enseput. Aerobik siti ari sesais ke ulih nagang penyakit jantung ke ulih ngujungka pemati.

   “Enti kitai bisi sesais, nya nunjukka kitai beterima kasihka tubuh ti diberi Penempa kitai.”—Jessica.

 Utai ke dipelajar: Sesais meri penguntung enda ngira diatu tauka jemah ila. “Nuan tentu enda nyebut, ‘Nesal aku enggau sukan hiking tauka joging,’” ku seiku nembiak ke benama Tonya. “Aku enda kala nesal sesais tauka ngiga kebuah ngambika enda nurun sesais.”

 Sekeda utai ke engka nagang ari sesais:

•   Nadai peransang. “Bala nembiak ngasaika diri nadai penanggul ba pengerai. Sida ngumbai semina orang tuai aja ke bisi penanggul ba pengerai.”—Sophia.

•   Nadai awak. “Aku amat kisuk. Tang aku mejal diri nyaga pemakai sereta nentuka diri bisi tinduk ti chukup. Tang aku selalu nadai awak sesais.—Clarissa.

•   Nadai duit. “Mar amat ka nyadi member ba gim!”—Gina.

 Perundingka:

 Nama utai ke pemadu besai ke nagang nuan sesais? Nuan patut bebendar mutarka penanggul nya, ngambi nuan bulih asil ti manah.

 Sekeda chara ke ulih dikena:

•   Anang bepanggai ba orang bukai pasal pengerai nuan. Nya tanggungjawap nuan empu.—Galatia 6:5.

•   Anang mayuh kebuah. (Pengajar 11:4) Ngambika chunto, nuan enda ibuh nyadi member ba gim. Tang, giga meh sesais ke dikerinduka nuan lalu nyadika sebegian ari jadual nuan.

•   Giga meh jaku lalau ari orang bukai pasal sesais.—Jaku Dalam 20:18.

•   Tetapka awak sesais. Tetapka juluk ati lalu tulis pemansang ke udah dikereja nuan, ngambi nya nyadika peransang mengkang sesais.—Jaku Dalam 21:5.

•   Ngiga kaban sama enggau sesais. Iya ulih meransang nuan terus sesais sereta nitihka jadual ti udah ditetapka.—Pengajar 4:9, 10.

•   Anang meh jampat ngalahka diri taja pan enda mujur beberapa kali.—Jaku Dalam 24:10.

 Bup Kudus ngasuh kitai “nemu nagang diri...dalam semua utai.” (1 Timoti 3:2, 11) Nya kebuah, anang meh kelalu. Orang ke kelalu beberatka sesais, kesuah iya orang ke kelalu beberatka pemanah tubuh diri. “Lelaki ke ngembuan buah isi ti besai tang enda nemu berunding, enda narit ati aku,” ku seiku nembiak indu ke benama Julia.

 Bejimat enggau rambai jaku, “Taja pan nuan lelak, gaga 10 kali da agi.” Jaku ke baka tu ulih ngasuh nuan pedis tauka enda ulih ngereja utai “ti pemadu badas.”—Pilipi 1:10.

 Nambahka nya, utai ke dikena meransang nuan engka utai ke ulih ngelemika nuan. Seiku nembiak indu ke benama Vera madah, “Mayuh nembiak indu nyimpan gambar tubuh artis ke dikerinduka sida nyadika peransang sesais. Tang, enti sida majak mandingka diri enggau tubuh orang bukai, sida senang agi lebu lalu ngujungka sida lemi semengat. Manah agi nuan netapka juluk ati deka nyaga pengerai ari ke beberat agi pasal pemanah tubuh.”