•  Kebuah tu nyadi

•  Tiga iti pekara ke ulih dikereja nuan

•  Nama ku nembiak serambau nuan

 Maya nuan mansang besai, bisi siti timpuh ke dikumbai akil baligh, maya tu emosi nuan enda tentu. Tu utai ti biasa. Taja pan nuan engka udah abis timpuh akil baligh, nuan engka berasai nyelai laban agi enda tentu ba emosi.

 Enti nuan enda nemu kebuah nya nyadi, kingatka meh, tu nunjukka hormon dalam tubuh nuan benung berubah. Nuan engka berasai irau tauka enda pechaya diri. Tang tu sebagi ari utai ke nyadi maya nuan mansang besai. Taja pia, nuan ulih nagang emosi diri lalu belajar napi iya.

 Fakta: Amat beguna nuan nemu nagang emosi diri maya nuan agi biak. Enggau tu, nuan ulih napi mayuh penguji maya nuan mansang besai dudi hari.

 Pansutka asai ati. Bup Kudus madah, “Pangan endang seruran ngayanka pengerindu sida. Nama guna bisi kaban belayan enti sida enda enggau natka penusah?”—Jaku Dalam 17:17.

 “Kami sebilik bisi seiku kaban ke disempamaka aku baka seiku ibu. Aku berasai senang deka mansutka asai ati aku ngagai iya, laban iya ninga enggau manah utai ke dipadahka aku. Maya aku bisi runding ti betul, iya muji aku. Tang maya runding aku salah, iya ngemetulka runding aku enggau chara ti manah.”—Yolanda.

 Runding aja: Bala kaban ke serambau nuan engka ngembuan emosi ti enda tentu baka nuan. Nya kebuah, manah agi enti nuan ulih mansutka asai ati diri ngagai apai indai tauka orang besai tuai ke ulih dipechaya nuan.

 Tuliska. Jop mega kala berasai ditekan. Iya madah, “Pendingka pemalat putap aku.” (Jop 10:1) Kelimpah ari mansutka asai ati, nuan ulih “mansutka” asai ati enggau chara betulis.

 “Kini-kini ke penunga aku, aku selalu mai bup nota ke mit. Maya bisi utai ke ngasaka ati nyadi, aku nulis nya. Tu meh chara ke ngasuh aku berasai nyamai agi.”—Iliana.

 Runding aja: Nuan ulih nyimpan diari kediri empu kena nulis asai ati diri. Nuan ulih nulis pasal kebuah nuan berasai baka nya, enggau chara napi nya. Nuan mega ulih ngena keretas kereja ke udah disediaka ba artikel tu.

 Sampi. Bup Kudus madah, ‘Serahka penusah nuan ngagai Jehovah, lalu Iya deka nyaga nuan. Iya nadai kala nejuka orang ke lurus alah.’—Masmur 55:22.

 “Maya aku berasai ditekan, aku selalu besampi ngagai Jehovah. Pengudah mansutka asai ati aku ngagai Iya, aku berasai lantang.”—Jasmine.

 Runding aja: Maya nuan irau, uji perundingka tiga iti pekara ke ngasuh nuan beterima kasih. Maya besampi, pinta meh tulung ari Jehovah. Anang enda ingat nyebut terima kasih ke berekat ti diterima nuan ari Iya.