•  Nama kebuah nuan patut ngatur jam?

•  Utai ke ulih digaga nuan

•  Nama ku nembiak serambau nuan

•   Jam nya sempama baka duit. Enti kitai enda bejimat, kitai semina masau awak diri ngereja utai ti enda beguna. Tang, enti kitai ngatur jam enggau manah, kitai bisi awak ngereja utai ti beguna sereta ngerinduka ati!

   Prinsip Bup Kudus: “Baka ni pen pemalat orang ke ngelusu inginka utai, iya sigi enda tulihka utai nya, tang orang ke bagas deka bulih semua utai ti dikinginka iya.”—Jaku Dalam 13:4.

   Batang ajar: Ngatur jam enda ngasuh kitai teketu. Tang kitai bisi awak ngereja mayuh agi pengawa.

•   Nemu ngatur jam nya amat beguna seraya nuan mansang besai. Chunto, enti nuan udah bekereja, nuan ulih dibuai kereja enti nuan enda nitihka jam ti udah ditetapka. Nadai bos dekaka pekereja ti selalu laun datai sereta laun nembuka pengawa.

   Prinsip Bup Kudus: “Barang sapa tau dikarapka ngemataka utai ti mimit, tau mega dikarapka ngemataka mayuh utai.”—Luke 16:10.

   Batang ajar: Ari chara nuan ngatur jam, ulih nemu sapa nuan ti bendar.

 Endang amat, ngatur jam nya enda senang. Ba baruh tu bisi sekeda ari penanggul iya.

 Penanggul #1: Kaban

 “Enti bisi kaban mai aku, aku suah agi madahka diri ulih. Taja pan, kebendar iya aku nadai mayuh awak. Aku berunding, ‘Enti udah datai ba rumah legi, aku jejampat nembuka pengawa aku.’ Tang, kesuah iya, pengawa aku enda ulih ditembuka.”—Cynthia.

 Penanggul #2: Limpang

 “TV nya sempama vacum. Cherita dalam TV nyau memanah magang lalu nya ngambi semua awak kitai.”—Ivy.

 “Aku ulih bejam-jam main tablet. Aku semina ngetu enti sema bateri iya abis.”—Marie.

 Penanggul #3: Enda berumban nembuka pengawa

 “Aku enda berumban nembuka kereja sekula tauka utai bukai ti beguna agi. Kesuah iya, aku ngabiska awak aku enggau utai ti enda beguna, lalu berengkah nembuka pengawa aku ba ujung minit. Jam aku amat enda teratur.”—Beth.

1.   Tuliska utai ti patut dikereja nuan. Chunto, nuan ulih nulis nama kereja sekula tauka pengawa nuan ba rumah. Tuliska ni penyampau jam ke biasa dikena nuan kena nembuka pengawa nya dalam seminggu.

    Prinsip Bup Kudus: “Nemu milih utai ti pemadu badas.”—Pilipi 1:10.

2.   Tuliska utai ti deka digaga nuan lebuh bisi awak. Tu nyengkaum lebuh nuan meda media sosial enggau meda TV. Tuliska mega ni penyampau jam ke dikena nuan ngereja pengawa nya dalam seminggu.

    Prinsip Bup Kudus: “Enda tau enda pintar . . . , ngena semua peluang kita.”—Kolosi 4:5.

3.   Ngatur jadual. Peratika dua iti utai ti deka digaga nuan lebuh bisi awak. Kati nuan bisi awak ngereja utai ti beguna agi? Kati nuan patut ngurangka jam nuan ba pemerindang?

    Chara: Gaga jadual nya ninting hari, lalu tanda pengawa ke udah dikereja nuan.

    Prinsip Bup Kudus: “Bejimat lebuh nuan ngaga pelan, nya baru nuan deka bulih mayuh utai.”—Jaku Dalam 21:5.

4.   Titihka jadual ke udah digaga. Kekadang, nuan engka patut nulak kangau bala kaban nuan, ngambika nuan ulih nembuka pengawa ti beguna agi. Iya ke amat, enti nuan bisi jadual, nuan deka bisi mayuh agi awak lalu nuan ulih ngereja nya enggau gaga ati.

    Prinsip Bup Kudus: “Anang lembau, seruran rajin.”—Rome 12:11.

5.   Ulih ngelantangka diri empu tang ukai tekala nya. Seiku nembiak ke benama Tara madah, “Enti bisi dua iti pengawa udah ditembuka aku, aku berunding, ‘Ok, aku ulih meda TV pengelama 15 minit, udah nya nyambung baru pengawa nya.’ Tang 15 minit nyadi setengah jam, lalu setengah jam nyadi sejam. Enda berasai, aku ngena 2 jam meda TV!”

    Kingatka, pemerindang nya sempama hadiah ke diterima pengudah nuan nembuka pengawa, ukai utai ti patut dikereja nuan ninting hari.

    Prinsip Bup Kudus: “Utai ti pemadu manah . . . ngelantangka diri ngena utai ti udah ulih kita.”—Pengajar 2:24.