Kati nuan ngereja kelalu mayuh pengawa? Artikel tu ulih nulung nuan!

•  Nama kebuah tu nyadi

•  Nama asil iya

•  Nama patut digaga nuan

•  Nama ku orang ke serambau nuan

•   Ngembuan mayuh tanggungjawap. Seiku nembiak ke benama Julie madahka, “Ba pengidup, kitai selalu diasuh ngereja utai enggau pemadu manah, ngaga pemansang, bisi juluk ati ti tinggi, sereta bulih pemujur. Enda senang napi tekan ke baka tu!”

•   Teknologi. Ninting hari, kitai ngena talipun binching, tablet, enggau perengka elektronik ke bukai enggau awak ti panjai. Tu ulih nekan sereta nyau kelama kitai nadai pengering ngereja nama-nama utai agi.

•   Enda chukup tinduk. Seiku nembiak ke benama Miranda madahka, “Mayuh ari nembiak dani tumu pagi tang tinduk laun laban sida patut nurun sekula, kereja, enggau beperindang. Tu ukai tebiat ti manah ke sida.” Tu ulih ngasuh kitai berasai lelak amat.

 Bup Kudus muji orang ke rajin. (Jaku Dalam 6:​6-8; Rome 12:11) Tang, Bup Kudus nadai madahka seseiku orang patut beberatka pengawa sida nyentukka sida enda nyaga pengerai diri empu.

 “Bisi sekali, ketegal aku kelalu kisuk enggau pengawa aku sepemanjai hari, aku nyau enda ingat makai. Berengkah ari sarinya, aku belajar, aku enda patut kelalu bendar gawa tang enda pedulika pengerai diri empu.”​—Ashley.

 Bup Kudus madah, “Indah ukui ti idup deh nyamai agi diau, ari singa ti mati.” (Pengajar 9:4) Keterubah iya, nuan engka baka singa ti mayuh pengering lalu ulih ngereja mayuh utai. Tang, enti nuan kelalu lelak, nya ulih ngachau pengerai nuan.

•   Belajar madah, “Enda ulih.” Bup Kudus madah, “Enti nuan nemu ngemaruhka diri, nuan bepenemu-dalam.” (Jaku Dalam 11:2) Orang ke baruh ati nemu takat diri empu lalu enda nerima pengawa ke enda ulih dikereja iya.

   “Orang ke enda nemu madahka “enda ulih”, deka nguji nerima semua pengawa ke diberi lalu senang amat lenyau pengering. Orang ke baka tu enda baruh ati. Nyau kelama, iya deka berasai lelak amat.”​—Jordan.

•   Belelak enggau chukup. Bup Kudus madah, “Manah agi ngembuan mimit aja utai tang enda irau ati, ari ke seruran bebendar gawa ngena jari dua piak, nguji nangkap ribut.” (Pengajar 4:6) Tinduk nya amat beguna ngambika untak kitai ulih regas baru. Bala nembiak patut tinduk pengelama lapan tauka sepuluh jam. Tang mayuh ari bala nembiak enda chukup tinduk.

   “Lebuh aku kelalu mayuh pengawa, aku kurang tinduk. Tang, kebendar iya, aku begunaka tinduk ti chukup ngambika aku ulih ngereja mayuh agi utai sereta berasai nyamai enggau gaga agi ba hari siti.”​—Brooklyn.

•   Ngembuan jadual ti tetap. Bup Kudus madah, “Bejimat lebuh nuan ngaga pelan, nya baru nuan deka bulih mayuh utai.” (Jaku Dalam 21:5) Pengidup nuan deka teratur agi enti nuan nemu ngatur awak sereta pengawa nuan enggau manah.

   “Kitai begunaka jadual ngambika kitai enda charut. Jadual tu ulih nulung nuan senang agi ngaga ubah ba utai ke diguna ngambika enda kelalu lelak.”​—Vanessa.