Cikgu ti terit. Ditekan bala nembiak ke serambau. Stress ketegal peresa, enggau mayuh kereja sekula. Enti nuan madahka diri enda rinduka sekula, kami ulih faham. a Ku siku nembiak ke benama Rachel b madahka:

 “Aku ka agi ba sebarang endur ari ke sekula. Sanggup agi aku ngagai pantai tauka begulai enggau bala kaban aku, indah nulung apai indai aku bepanduk tauka meresi!”

 Enti nuan ngasaika utai ti sama baka Rachel, maya nuan ba sekula nyadi baka rumah jil, lalu nuan patut betan nyentukka nuan abis sekula. Baka ni nuan ulih ngembuan runding ti manah agi maya nuan benung besekula?

 Nemu nuan? Enti nuan ngembuan runding ti manah pasal sekula, nuan ulih ngawal situasi nya, lalu enda ngumbai sekula nya pengawa ke patut ditatka nuan. Enggau chara tu, sekula ulih nyadi utai ti beguna kena nuan ngemansangka pengelandik ti manah seraya nuan mansang besai.

 Ngambika ngembuan runding ti manah pasal sekula, uji peratika tu:

 Pendidikan nuan. Mayuh agi utai ke dipelajarka nuan, senang agi nuan mutarka penanggul dudi hari sekalika nya ba endur kereja tauka ba pengidup ninting hari, ari ke seruran bepanggai ngagai orang bukai. Tanya diri empu, ‘Taja pan bisi utai ke enda dikerinduka aku pasal sekula, tang nama penguntung ke diterima aku ari sekula?’

 Prinsip Bup Kudus: “Bepegai erat ba penemu-dalam enggau ba penalam runding nuan.”—Jaku-Dalam 3:21.

 Tebiat nuan. Tebiat ti manah ke dipelajarka nuan ari sekula ngajar nuan chara ngatur jam, nyadi orang ke bisi disiplin, enggau baka ni nyadi pekereja ti bagas. Semua sifat tu diguna seraya nuan mansang besai. Tanya diri empu: ‘Baka ni rutin ba sekula nulung aku nyadi orang ke bisi disiplin enggau pekereja ti bagas? Nama pemansang ke ulih digaga aku ba senentang tu?’

 Prinsip Bup Kudus: “Enti nuan gawa, nuan deka bulih pengidup.”—Jaku-Dalam 14:23.

 Chara begulai enggau orang bukai. Begulai enggau orang ke sekelas enggau nuan, ulih nulung nuan ngemansangka sifat ti siru sereta bebasaka orang bukai. Siku nembiak lelaki ke benama Joshua madahka, “Belajar berandau enggau orang bukai sama penting baka nuan belajarka sejarah enggau sains. Laban tu pengelandik ke dikena nuan sepemanjai idup.” Tanya diri empu, ‘Nama utai ke dipelajarka aku ari sekula pasal chara begulai enggau orang bukai, taja pan orang nya lain latar belakang tauka enda sama agama baka aku?’

 Prinsip Bup Kudus: “Bebendar meh ngulihka kaul ti manah enggau semua orang.”—Hebrew 12:14.

 Masa depan nuan. Sekula ulih nulung nuan nemu nama pengelandik ke dikembuan nuan. Lalu nuan ulih netapka juluk ati nitihka pengelandik nuan nya. Siku indu ke biak benama Brooke madah, “Baka aku, engka nuan ulih ngambi kursus ba sesiti pengawa, nyadi lebuh nuan abis sekula, nuan bisi kelayakkan kereja.”

 Prinsip Bup Kudus: “Perambu enggau silik utai ti deka dikereja nuan.”—Jaku-Dalam 4:26.