Diatu, mayuh orang “sekula” ari rumah. Enti nuan pan sama, baka ni nuan belajar enggau chara ti manah taja pan ari rumah aja? Ditu, bisi beberapa iti chara ti manah ulih nulung nuan. a

•  Lima chara belajar ari rumah

•  Nama ku nembiak serambau nuan

•   Ngaga pelan. Ba sekula, endang sigi udah bisi jadual ditetapka. Uji meh ngaga jadual nuan empu ba rumah. Gaga meh jadual maya nuan patut ngaga kereja sekula, nulung ngereja pengawa rumah, tauka pengawa ke bukai. Tang, jadual nya agi ulih ditukar nitihka chara ti ngena agi ba nuan.

   Lalau Bup Kudus: ‘Semua utai . . . Meruan atur magang.’—1 Korint 14:40.

   “Gaga jadual baka ba sekula. Udah nya, tembuka pengawa ke udah dipelan dalam jadual.”—Katie.

   Perundingka: Nama pemanah iya enti nuan nulis jadual, lalu ngengkah nya ba endur ke senang dipeda?

•   Disiplin diri. Anang nangguh pengawa sekula nuan. Enti nuan ulih nembuka pengawa sekula taja pan berasai lembau, nya ngajar nuan nyadi orang ke nemu agi berunding.

   Lalau Bup Kudus: “Anang lembau, seruran rajin.”—Rome 12:11.

   “Disiplin diri enda senang. Kitai deka agi ngiga kebuah. Kitai engka berunding, ‘Legi meh aku ngaga nya.’ Tang pengujung iya, kereja nya pan nyau bari nganti ditembuka.”—Alexandra.

   Perundingka: Nama kebuah kitai ulih ngumbai, enti nuan nembuka pengawa sekula ba endur sereta jam ti sama ninting hari, nuan ulih disiplin diri?

•   Ngiga endur belajar. Engkahka semua perengka belajar nuan ba endur ti semak nuan. Tentuka endur nuan belajar nya nyamai ba nuan, tang anang ga kelalu nyamai ngujungka nuan nyau tinduk! Enti nadai endur ke ngena, nuan ulih belajar ba bilik dapur tauka dalam bilik nuan empu.

   Lalau Bup Kudus: “Bejimat lebuh nuan ngaga pelan, nya baru nuan deka bulih mayuh utai.”—Jaku Dalam 21:5.

   “Anang guai mantaika bola keranjang, game, sereta gitar nuan. Asuh handphone nuan enda memunyi. Enti nadai utai ngachau, nuan tentu ulih belajar enggau manah.”—Elizabeth.

   Perundingka: Nama ubah ke patut digaga nuan ngambika endur nuan belajar berasai nyamai agi?

•   Fokus. Uji fokus ngereja siti pengawa dulu. Anang ngereja semua utai enggau serentak. Laban nya ngasuh nuan ngereja mayuh agi penyalah, lalu ngelubahka agi pengawa nuan tembu.

   Lalau Bup Kudus: “Kena semua peluang kita enggau badas.”—Epesus 5:16.

   “Enti handphone semak aku, aku sigi enda ulih fokus. Nya alai, aku selalu masau jam ba utai ti enda beguna.”—Olivia.

   Perundingka: Ngambika ulih fokus, kati nuan ulih lubah-lubah ngemansangka ulah tu maya ngaga pengawa sekula?

•   Ngetu enda lama. Enti nuan bisi belelak, mayuh agi utai ke ulih digaga nuan. Nuan ulih bejalai enda lama, ngayuhka basikal, tauka sebarang sukan ke bukai ti senang ba nuan. Nuan mega ulih ngaga hobi diri. “Tang tembuka dulu pengawa sekula nuan. Enggau chara nya, nuan ulih ngereja hobi nuan enggau lantang ati,” ku bup School Power.

   Lalau Bup Kudus: “Manah agi ngembuan mimit aja utai tang enda irau ati, ari ke seruran bebendar gawa ngena jari dua piak, nguji nangkap ribut.”—Pengajar 4:6.

   “Ba sekula, kesuah iya bisi kelas musik tauka kelas ngelukis. Pengudah aku belajar ari rumah, baru meh aku nemu kelas ke baka nya amat beguna. Reti iya, taja pan belajar ari rumah, kitai agi ulih ngereja pengawa ti ngerinduka ati.”—Taylor.

   Perundingka: Pengawa ke baka ni ulih meransang nuan deka agi belajar?