•  Nama kebuah aku enda ulih fokus?

•  Chara fokus

•  Nama ku nembiak serambau nuan

 “Suba, aku rindu macha bup. Tang diatu, indah siti genteran ti panjai pan aku enggai.”—Elaine.

 “Enti aku ngasaika video nya panjai, aku ngelajuka video nya ngambi jampat abis.”—Miranda.

 “Maya aku benung fokus ngereja sesiti utai, lalu talipun aku bebunyi, aku pan berunding, ‘Sapa nya?’’”—Jane.

 Kati teknologi ngasuh kitai tusah fokus? Sekeda orang nyaut, “Au.” Nicholas Carr, seiku penulis enggau konsultan nulis, “Enti kitai suah ngena internet, kitai senang agi dilimpangka. Untak kitai engka jampat nangkap sekeda penerang, tang enda ulih fokus. a

 Peratika, baka ni perengka teknologi ulih ngelimpangka nuan ba tiga iti pekara tu:

•   Maya berandau. Ku Maria, “Kemayaharitu, mayuh orang deka meda mesej, main game, tauka meda media sosial ba talipun, indah maya iya benung berandau enggau orang bukai. Sida enda ulih fokus ngagai orang ke ba mua mata sida.”

•   Ba kelas. Bup Digital Kids madahka, “Maya ba kelas, mayuh pemelajar meda mesej, muka internet, tauka meda utai bukai ti nadai kaul enggau utai ke benung dipelajarka sida.” Perengka elektronik tu enda dikena ba utai ke dipelajar.

•   Lebuh belajar. Chris, ke beumur 22 taun madah, “Tiap kali talipun aku bebunyi, aku enda ulih enda meda nya. Ati aku enda jenuh seagi enda muka mesej nya.” Enti perengka elektronik ngelimpangka nuan, kereja sekula ke ulih ditembuka dalam sejam aja, engka begunaka tiga empat jam.

 Nyadika simpul: Nuan tusah agi fokus, enti nuan nejuka perengka elektronik nya ngachau lalu nguasa pengidup nuan.

•   Maya berandau. Bup Kudus madah, “Anang semina berundingka diri empu aja, tang berunding mega ke orang bukai.” (Pilipi 2:4) Enti nuan mending enggau manah maya orang bukai benung bejaku, nuan nunjukka diri ibuhka sida. Uji peda mata sida maya sida benung bejaku, lalu anang nejuka fokus nuan dikachau perengka elektronik.

   “Maya benung berandau, seliahka diri ari meda talipun. Ayanka basa, lalu fokus meh ngagai orang ke ba mua kitai.”—Thomas.

   CHARA: Maya berandau, simpan talipun nuan. Bala pemansik madahka, enti talipun nuan kelalu semak, senang agi nuan dilimpangka.

•   Ba kelas. Bup Kudus madah, “Pendingka enggau manah.” (Luke 8:18) Enti sekula ngemendarka nuan ngena internet ba kelas enggau tuju belajar, kingatka meh prinsip Bup Kudus tu. Anang ngena peluang nya meda mesej, main game, tauka chat maya ba kelas.

   “Uji fokus ba kelas, lalu uji meh nulis nota. Enti ulih, duduk ba mua ke depan agi, ngambika nuan ulih fokus.”—Karen.

   CHARA: Uji nulis nota ngena keretas enggau pen, ukai ngena talipun, tablet tauka notebook. Bala pemansik madahka, chara tu nulung nuan fokus lalu senang ingatka utai ti dipelajar.

•   Lebuh belajar. Bup Kudus madah, “Giga penemu-dalam enggau runding ti dalam!” (Jaku Dalam 4:5) Nyadi, enti deka ngulihka penemu, nuan patut macha lalu berunding, ukai semina jampat macha enggau ngelansa aja.

   “Maya belajar, aku netapka talipun aku ke ‘airplane mod’ ngambika enda ngachau aku fokus. Aku mega enda meda mesej ke datai. Enti aku teringatka sesiti pengawa ke patut digaga, aku nulis nota dulu.”—Chris.

   CHARA: Maya belajar, uji giga endur ke senang agi alai nuan fokus. Tentuka endur nya beresi sereta teratur.