Belajarka chara ti manah kena napi depression!

•  Nama patut digaga nuan?

•  Kati nuan begunaka chara berubat?

•  Chara ti manah

•  Ayat Bup Kudus ke ulih nulung

 Perundingka tu:

 Jennifer nadai agi pengaga ati. Ninting hari iya nyabak nadai kebuah. Iya enggai begulai enggau orang sereta makai. Iya tusah tinduk tauka ngereja sesiti utai. Jennifer berunding, “Nama gaga aku? Nama kebuah aku enda baka suba?”

 Suba Mark nya pelajar chunto ba sekula. Tang diatu, iya enda tentu deka datai sekula. Lalu peresa iya majak nurun. Iya mega enda rindu main sukan ke dikerinduka iya agi. Bala kaban Mark enda nemu kebuah. Apai indai Mark irau. Kati penanggul tu semina enda lama aja tauka penanggul ti besai?

 Kala nuan ngasaika utai ti sama baka Jennifer tauka Mark? Enti au, nama patut digaga nuan? Nuan bisi dua iti chara:

1.   Nguji mutarka nya kediri

2.   Berandau enggau orang ke besai tuai ti ulih dipechaya

 Chara A engka chara ti pemadu senang dikereja, kelebih agi maya nuan enggai bejaku enggau sesapa. Tang kati tu chara ti betul? ‘Dua iku manah agi ari siku. Enti sema siku ari seduai iya teterap, siku ga bisi ngangkatka iya. Tang enti orang diau kediri-diri, lalu iya teterap, nya amat tusah, laban orang nadai nulung iya.’—Pengajar 4:9, 10.

 Perundingka: Gambarka nuan tesat ba endur ke mayuh orang jai. Endur nya petang, lalu mayuh orang enda dikelala ngelingi nuan. Nama deka digaga nuan? Nuan ulih ngiga chara pansut kediri empu. Tang, enda ke manah agi enti nuan nanya orang ke ulih dipechaya?

 Depression sempama endur ke petang nya. Semua kitai endang kala ngasaika penusah ati ba sesiti timpuh. Tang enti nya enggai badu-badu, manah kitai minta tulung ari orang bukai.

 PRINSIP BUP KUDUS: Orang ke enda nemu begulai enggau orang bukai . . . enda besetuju enggau semua utai ti dikumbai orang bukai ngena.”—Jaku Dalam 18:1.

 Chara B manah agi laban apai indai tauka orang besai tuai ke bukai engka kala ngasaika utai ti sama. Lalu sida ulih nulung nuan.

 Nuan engka madah, “Apai indai enda nemu utai ke diasaika aku.” Kati nya amat? Taja pan utai ke diasaika sida engka enda sama, tang asai ati sida engka sama enggau nuan. Sida engka nemu chara mutarka nya!

 PRINSIP BUP KUDUS: “Orang ke tuai bisi runding ti dalam.”—Jop 12:12.

 Kingatka: Enti nuan berandau enggau apai indai, tauka orang ke besai tuai ke ulih dipechaya, nuan engka tetemuka lalau ti manah.

 Enti ninting hari nuan berasai tusah ati, nuan engka bisi depression ke begunaka tulung ari doktor.

 Depression ke diasaika bala nembiak engka asai ati ke tusah ti suah diasaika orang nembiak. Tang, enti depression tu majak balat lalu kelalu lama. Nuan patut madahka apai indai, lalu nuan begunaka tulung ari doktor.

 PRINSIP BUP KUDUS: “Orang ke gerai enda begunaka lutur, tang semina orang ke sakit.”—Matthew 9:12.

 Enti nuan bisi depression ti balat, anang malu. Tu endang suah nyadi ba orang biak, tang penyakit tu ulih diubat! Kaban ti bendar tentu agi deka begulai enggau nuan.

 Chara: Sabar meh. Nuan begunaka awak ngambika gerai ari depression. Kingatka, nuan enda ulih rari ari tusah senang ba pengidup. a

 Enda ngira nuan begunaka tulung ari doktor tauka enda, bisi beberapa iti chara ke ulih dikena nuan ngelaban asai ati ti tusah. Chunto, enti nuan selalu sesais, nyaga pemakai, enggau bisi chukup tinduk, tu ulih ngasuh emosi nuan manah agi. (Pengajar 4:6; 1 Timoti 4:8) Nuan mega ulih nuliska asai ati diri ba diari, pasal juluk ati nuan, utai ke ditapi, enggau pemujur ke udah diulih nuan.

 Enda ngira nuan bisi depression ke balat tauka enda, kingatka tu: Ari bantu orang bukai sereta ngiga chara mutarka penanggul tu, nuan ulih mutarka depression.

•  ‘Jehovah diau semak orang ke tusah ati lalu ngidupka sida ke nadai agi pengadang.’—Masmur 34:18.

•  ‘Serahka penusah nuan ngagai Jehovah, lalu Iya deka nyaga nuan. Iya nadai kala nejuka orang ke lurus alah.’—Masmur 55:22.

•  ‘Aku tu Jehovah Petara kita. Aku ngasuh kita kering lalu madahka ngagai kita, ‘Anang takut. Aku deka nulung kita.’—Isaiah 41:13.

•  “Anang irauka pasal pagila.”—Matthew 6:34.

•  ‘Bantaika semua peminta kita ngagai Petara ngena sampi; Lalu pemaik Petara, ti ngelui peragam mensia, deka nyaga ati enggau runding kita dalam Jesus Kristus.”—Pilipi 4:6, 7.