Pengawa ngachau ukai utai ti mit aja. Nitihka siti pansik ba Britain, lebih ari 40 peratus kes munuh diri ba entara bala nembiak ketegal dikachau.

 Dikachau ukai semina nengah fisikal aja, nya nyengkaum sekeda utai tu:

•   Leka jaku. “Orang indu pan ulih mansutka leka jaku ti kasar sereta ngemediska ati. Aku agi ingatka leka jaku sereta nama kangau ke dikena sida beduan aku. Sida ngasuh aku ngasaika diri enda dikeibuhka sereta enda beguna. Aku deka agi dipalu ari ke digaga baka tu,” ku Celine ke beumur 20 taun.

•   Enggai begulai. “Orang ke sama kelas enggai begulai enggau aku. Sida baka ke sengaja ngaga nadai agi penuduk ke aku, ngambi aku enda duduk enggau sida. Pengelama setaun, aku nyabak lalu suah duduk kediri aja,” ku Haley ke beumur 18 taun.

•   Dikachau nengah internet. Daniel ke beumur 14 taun madah, “Ari beberapa iti utai ke ditekan nuan ba komputer, nuan ulih bejai nama orang bukai, indah pengidup seseiku orang. Taja pan utai tu munyi ke ngelangkung, tang tu amat-amat kala nyadi!” Ngachau nengah Internet mega nyengkaum pengawa nganjung gambar tauka mesej ti ulih ngemaluka nengah talipun binching.

 Ba baruh tu bisi madahka kebuah iya:

•   Sida empu kala dikachau. “Aku udah leju dikachau enggau balat ari bala kaban aku. Nya kebuah, aku pan deka ngachau orang bukai ngambi sida ulih nerima aku. Diatu baru meh aku nemu pengawa nya salah,” ku seiku nembiak lelaki ke benama Antonio.

•   Nadai teladan ti manah ke ulih dititihka sida. Ba siti bup ke betajuk Life Strategies for Dealing With Bullies, Jay McGraw nulis: “Mayuh nembiak ke rindu ngachau orang bukai . . . baka apai indai, menyadi lelaki enggau menyadi indu, tauka diri sebilik sida ngereja nya ngagai orang bukai.”

•   Sida deka tampak pama agi, tang iya ke bendar sida lemi. Nitihka siti bup ke betajuk The Bully, the Bullied and the Bystander, Barbara Coloroso nulis, “Anak mit ke selalu belalaika penusah ati sereta enda pechaya diri selalu ngayanka ulah ti pama agi lalu ngachau orang bukai.”

•   Orang ke selalu kediri. Nembiak ke enda pandai begulai sereta selalu kediri suah agi dikachau.

•   Nembiak ke nyelai agi ari orang bukai. Mayuh nembiak dikachau ketegal sida enda sama chara begari, bansa, pengarap, tauka sida bisi penimpang ba pendiau. Semua utai ulih nyadika senyata kena orang ke ngachau nya ngeleseka sida.

•   Nembiak ti enda pechaya diri. Orang ke ngachau rindu ngachau nembiak ke bisi runding ti enda manah. Sida senang agi dikachau laban kesuah iya, sida enda ngelaban lebuh dikachau.

•   Tejuka aja. Seiku nembiak indu ke benama Kylie madah, “Orang ke ngachau deka nuan ngembuan runding ti enda manah pasal nuan empu. Sida deka ngetu ngachau nuan enti nuan nejuka aja ulah sida nya.” Bup Kudus bisi madah, “Orang ke mereti, nemu liat ati lalu nagang diri ringat.”—Jaku Dalam 29:11.

•   Anang malas. Enti nuan malas, penanggul nya enda ulih diputarka. Bup Kudus bisi madah, “Anang malas penyai ngena penyai.”—Rome 12:17; Jaku Dalam 24:19.

•   Seliahka utai ti ulih ngemedis. Enti ulih, seliahka diri ari orang ke ngachau tauka utai ti ulih meri sida peluang ngachau nuan.—Jaku Dalam 22:3.

•   Tunjukka ulah ti enda disangka sida. Nitihka Bup Kudus: “Saut ti nelap ngasuh orang badu agi ringat.”—Jaku Dalam 15:1.

•   Balas enggau jenaka. Enti orang ke ngachau madahka nuan kelalu gemu, nuan ulih tuchum lalu nyaut, “Ba iya, aku patut diet enda pia?”

•   Rari aja. Nora, ke beumur 19 taun madah, “Enggau enda bemunyi, nuan nunjukka diri nemu berunding sereta kering agi ari iya. Nuan ulih nagang diri, lalu nya ulah ti nadai dikembuan orang ke ngachau nya.”

•   Pechaya diri. “Orang ke ngachau nemu ni maya nuan berasai takut. Sida deka ngena pengelemi nuan nya ngambika nuan terus berasai takut,” ku seiku nembiak indu ke benama Rita.

•   Padah ngagai orang bukai penanggul nuan. Nitihka siti pansik, lebih ari setengah orang ke dikachau enda madahka penanggul sida. Tu engka laban sida berasai malu (kelebih agi lelaki) tauka takut enti orang ke ngachau nya nemu. Tang kingatka, orang ke ngachau enda ngetu seagi nuan nadai madah ngagai sesapa. Padahka penanggul nya ngambi pengawa sida ulih ditagang.