Ba artikel tu

•  Nama reti dating?

•  Kati nuan udah besedia dating?

  Sekeda orang ngumbai dating nya siti pengawa ti ngerinduka ati. Ba artikel tu, reti “dating” nya siti timpuh alai siku lelaki enggau siku indu begulai enggau pangan diri, lalu beratika sekalika seduai iya ulih tauka enda jadi enggau pangan diri. Nya alai, dating nya bisi tuju. Nya ukai semina chara minta perhatian ari orang ke enda sama penempa.

 Dating, nulung nuan ngaga pemutus sekalika deka kawin tauka ngetuka kaul ti romantik. Berengkah meh nuan dating, nuan patut besedia, siti ari pekara tu deka nyadi.

 Utai ke penting: Enti nuan ngasaika diri udah besedia deka dating, nuan mega patut udah besedia deka kawin.

  Tuju dating nya ketegal nuan deka kawin. Nya alai, nuan patut berunding nama pemanah ke patut dikembuan nuan enti nuan deka kawin. Chunto iya, perundingka prinsip ba baruh tu:

•   Kaul ba diri sebilik. Chara nuan ngelayan apai indai sereta diri semadi ulih nunjukka chara nuan deka ngelayan kaling nuan, kelebih agi maya nuan benung stress.

   Prinsip Bup Kudus: “Buai semua macham dendam, ati ti pedis, sereta ati ti ngeransi. Anang merak pangan diri. Buai mega jaku ti kasar sereta semua utai ti ngasuh pedis.”—Epesus 4:31.

   Tanya diri empu: ‘Kati apai indai enggau bala semadi ngasaika aku ngelayan sida enggau basa? Lebuh aku enda besetuju enggau siku ari sida, kati aku ulih berandau enggau chara ti tenang, tauka nyadi ringat lalu bekerakal?’

•   Sanggup berkorban. Pengudah kawin, nuan patut berundingka utai ke dikedekaka kaling, lalu suah iya nuan patut berkorban ke iya.

   Prinsip Bup Kudus: “Awakka tiap iku orang seruran ngereja utai ke penguntung orang bukai, ukai ke penguntung diri empu.”—1 Korint 10:24.

   Tanya diri empu: ‘Kati aku selalu dekaka orang bukai nitihka chara aku? Kati orang bukai ngasaika aku masuk akal? Baka ni chara aku nunjukka diri berundingka orang bukai ari ke berundingka diri empu?’

•   Baruh ati. Kaling ti manah ulih ngaku penyalah diri lalu minta ampun enggau ati ti ikhlas.

   Prinsip Bup Kudus: “Semua kitai suah ngereja penyalah.”—James 3:2, nota kaki.

   Tanya diri empu: ‘Kati aku sedia ngaku penyalah diri tauka ngaga alasan? Kati aku berasai ringat tauka enda nyamai ati lebuh orang meri cadangan nama ulah ke patut dikemansangka aku?’

•   Duit. Duit siti ari topik ke ngasuh laki bini belaya. Nuan ulih kurang agi belaya enti nuan nemu ngena duit enggau chara ti betanggungjawap.

   Prinsip Bup Kudus: “Sapa ari bala kita ke deka ngaga sebuah menara enda duduk dulu ngira ungkus utai nya, ngambika iya nemu sekalika iya bisi duit kena nembuka pengawa nya?”—Luke 14:28.

   Tanya diri empu: ‘Kati aku nemu nagang diri ngena duit tauka mayuh berutang? Baka ni aku udah nunjukka diri ulih ngena duit enggau betanggungjawap?’

•   Pengawa rohani ninting hari. Enti nuan siku ari Saksi-Saksi Jehovah, nuan patut bisi atur ti tetap ba macha Bup Kudus sereta datai begempuru.

   Prinsip Bup Kudus: “Gaga ati meh sida ke nemu diri begunaka iring ari Petara.”—Matthew 5:3.

   Tanya diri empu: ‘Kati aku bisi usaha negapka pengarap diri? Kati pengawa rohani nya utai ti pemadu penting ba pengidup aku, tauka aku nejuka utai bukai ngachau nya?’

 Utai ke penting: Nuan patut nyadi kaling ti manah ke orang enggau nuan jadi. Enti nuan berusaha nyadi orang ke baka tu, nuan mega ulih narit ati orang ke ngereja utai ti sama.