•  Nama reti main-main pengerindu?

•  Nama kebuah sekeda orang main-main ba pengerindu?

•  Nama kebuah nya ulih ngachau?

•  Nama ku nembiak serambau nuan

 Nitihka sekeda orang, main-main ba pengerindu nunjukka minat ti romantik ngagai indu tauka lelaki nengah jaku sereta ulah. Enti nuan bisi ati ngagai seseiku orang, kati salah bisi asai ati ti romantik ngagai iya? Ukai semua nya betul. Seiku nembiak indu ke benama Ann madah, “Nuan engka udah sedia deka dating. Enti nuan bisi ati ngagai seseiku orang, baka ni nuan nemu iya mega bisi ati ke nuan?”

 Ba artikel tu, kitai deka berandauka ulah orang ke nunjukka minat ti romantik ngagai orang bukai, tang semina ngasaka ati aja.

 “Enda salah ngayanka ulah ti romantik. Kelebih agi enti nuan bisi ati ngagai iya lalu deka bisi kaul enggau iya. Tang enti nuan semina ngasaka ati iya aja, nuan ulih ngasuh ati iya telih.”—Deanna.

 Sekeda orang semina deka main-main aja ba pengerindu, ngambika sida tampak lawa agi ari orang bukai. Seiku nembiak indu ke benama Hailey madah, “Enti nuan ngasaika ulah nuan nya ngasuh nuan tebilang, nuan deka ngereja pengawa nya mayuh agi, ngambika nuan majak tebilang.”

 Baka ni enti nuan semina main-main aja, tang nuan nadai ati ngagai orang nya? Nya nunjukka nuan enda pedulika asai ati orang nya. Orang bukai engka ngumbai nuan orang ke enda nemu berunding. Bup Kudus madah, “Orang ke beli gaga ke pemeli, tang orang ke bepenemu-dalam deka ngereja utai ti ngena.”—Jaku Dalam 15:21.

 Hailey madah, “Main-main ba pengerindu baka ke ngerinduka ati. Tang iya ke bendar, tu ulih ngachau.”

•   Ngenyaika nama diri empu.

   “Aku ngasaika, indu ke main-main ba pengerindu enda andalka diri empu sereta enda nemu berunding. Iya enda ulih dipechaya sereta semina dekaka utai ari nuan.”—Jeremy.

   Bup Kudus madah: “Pengerindu . . . enda berundingka diri empu.”—1 Korint 13:4, 5.

   Perundingka: Jaku enggau ulah ke baka ni ti ngasuh orang ngumbai nuan semina deka main-main ba pengerindu?

•   Ngasuh ati orang bukai telih.

   “Aku enggai bekaban enggau orang ke semina main-main ba pengerindu. Iya bejaku enggau aku ketegal aku indu. Iya ke bendar, orang ke main-main ba pengerindu enda ibuhka aku. Sida semina berundingka diri empu aja.”—Jaqueline.

   Bup Kudus madah: “Anang berundingka diri empu aja, tang berunding ke orang bukai.”—1 Korint 10:24.

   Perundingka: Kati nuan kala ngasaika orang bisi minat ti romantik ngagai nuan, tang udah nya nuan nemu iya semina ngasaka ati aja? Enti kala, kati asai ati nuan? Nama patut digaga nuan, ngambika nuan enda ngasaka ati orang bukai?

•   Nuan tusah deka bulih pengerindu ti bendar.

   “Mayuh orang enggai jadi tauka dating enggau orang ke main-main ba pengerindu. Enti bisi orang ke baka tu dekaka aku, kati aku ulih pechaya tauka amat ngelala sapa iya?”—Olivia.

   David bisi madahka dalam Bup Kudus: “Aku enggai begulai enggau orang ke pura-pura ngapa.”—Masmur 26:4.

   Perundingka: Sapa sanggup dekaka orang ke semina main-main ba pengerindu? Kati nuan bisi ati ngagai orang ke baka nya?