Asai ati nuan sempama nama?

•   peta

•   cheremin

•   kaban

•   akim

 Semua ba atas nya betul magang. Artikel tu deka nerangka kebuah iya.

•  Nama reti asai ati?

•  Nama kebuah asai ati patut dilatih?

•  Chara ngelatih asai ati?

•  Nama ku nembiak serambau nuan

 Reti asai ati iya nya, utai ke diasaika kitai kena nentuka sesiti pekara nya betul tauka salah. Nitihka Bup Kudus, asai ati nya sempama ukum dalam ati seseiku orang. (Rome 2:15) Enti nuan ngembuan asai ati ti manah, nuan ulih nentuka pemutus ke digaga tauka ke udah digaga nuan nya, betul tauka salah.

•   Asai ati sempama peta. Nya ulih ngiring nuan ngagai jalai ti betul. Ketegal tu, nuan ulih ngurangka diri ari napi mayuh penanggul.

•   Asai ati sempama cheremin. Ketegal tu, nuan ulih meda sapa nuan ti bendar. Ulih meda nama runding nuan, pasal utai ti betul tauka salah.

•   Asai ati sempama kaban. Nya ulih meri nuan lalau ti ngena, sereta ngerara maya nuan salah. Tu nulung nuan nyadi orang ke manah agi.

•   Asai ati sempama akim. Ati ti manah ngasuh nuan berasai besalah, lebuh nuan ngereja sesiti penyalah.

 Utai ke dipelajar: Asai ati amat beguna ba pengidup nuan. Nya nulung nuan (1) ngaga pemutus ti manah lalu (2) ngemetulka penyalah nuan.

 Bup Kudus ngasuh kitai ‘ngintu ati diri ngambika beresi.’ (1 Peter 3:16) Tang tu enda senang, enti ati nuan bedau beresi tauka bedau dilatih.

 “Enti apai indai nanya dini endur aku, aku bula ngagai sida. Keterubah aku bula, ati aku enda nyamai. Tang nyau kelama, nadai asai agi.”—Jennifer.

 Pengujung iya, asai ati ti dilatih ngasuh Jennifer ngaku penyalah diri, ngagai apai indai iya. Udah nya, iya badu agi bula.

 Perundingka: Ni maya asai ati Jennifer nangkan iya?

 “Aku kala nyadi orang ke pepura aja. Keterubah, asai ati ngukum lalu nekan aku. Tang, ketegal aku enda ibuhka asai ati nya, nyau kelama, aku majak berani ngereja penyalah ke bukai.”—Matthew.

 Bisi orang, enggai ningaka asai ati diri. Ba Bup Kudus madahka, orang ke baka tu “nyau enda malu agi.” (Epesus 4:19)

 Perundingka: Kati nya amat, orang ke enda berasai besalah, berasai lantang agi ba pengidup? Nama penanggul ke engka nyadi ba sida?

 Utai ke dipelajar: Ngambika ngembuan asai ati ti manah, nuan patut: “Matihka diri ngelala bida entara utai ti badas enggau utai ti jai.”—Hebrew 5:14.

 Kena ngelatih asai ati, nuan patut bisi prinsip ba pengidup. Udah nya perundingka, kati ulah nuan sejalai enggau prinsip nuan nya. Bisi sekeda orang, prinsip sida ba pengidup nitihka:

•   ruang bilik enggau adat

•   orang ke serambau

•   orang ke tebilang ba dunya

 Tang, iya ke bendar, prinsip pengidup ti pemadu manah ulih ditemu ba Bup Kudus. Nama kebuah? Laban ajar ke bisi dalam Bup Kudus, ‘bepun ari Petara magang.’ Semina Petara nemu utai ti pemadu manah ke kitai. Laban Iya Penempa kitai.—2 Timoti 3:16.

 Perundingka sekeda chunto.

 PRINSIP: ‘Kami ingin deka ngereja utai ti badas berari.’—Hebrew 13:18.

•   Enti nuan bisi ati deka ngupi maya peresa, bula ngagai apai indai tauka ngenchuri, baka ni prinsip tu ulih nulung asai ati nuan?

•   Enti asai ati ti manah ngasuh nuan lurus ba semua utai, nama penguntung iya ngagai nuan ke diatu, tauka dudi hari?

 PRINSIP: “Seliahka ulah ti kamah.”—1 Korint 6:18.

•    Enti nuan bisi ati deka meda pornografi, baka ni prinsip tu nulung asai ati nuan?

•   Enti asai ati ti manah nulung nuan nulak pengawa ti kamah, nama penguntung iya ngagai nuan ke diatu, tauka dudi hari?

 PRINSIP: “Nelap enggau pangan diri, siru enggau pangan diri, ngampun pangan diri.”—Epesus 4:32.

•    Enti nuan ringat, lalu bisi ati deka belaya enggau menyadi tauka bala kaban nuan, baka ni prinsip tu ulih nulung?

•   Enti asai ati nuan dilatih nyadi orang ke pengampun sereta siru, nama penguntung iya ngagai nuan ke diatu, tauka dudi hari?

 PRINSIP: ‘Iya [Jehovah] begedika orang ke mangah.’—Masmur 11:5.

•    Baka ni prinsip tu nulung nuan, maya milih cherita, rancangan TV, sereta game?

•   Enti asai ati nuan nemu nulak pemerindang ke ngayanka pemangah, nama penguntung iya ngagai nuan ke diatu, tauka dudi hari?

 CHERITA AMAT: “Kaban ke enggau aku begulai rindu main game ke kasar. Suba, aku pan sama. Bisi sekali, apai nagang aku main game ke baka nya. Nya alai, aku belalai main game nya, maya aku ngagai rumah bala kaban. Lebuh pulai ke rumah, aku enggai madahka sida. Ketegal aku enda memunyi, apai nanya aku. Aku madahka nadai nama-nama. Tang, maya aku macha Masmur 11:5, aku berengkah berasai besalah. Aku sedar, aku patut ngetu main game nya. Diatu, aku amat-amat ngetu main game nya. Lalu, seiku ari kaban aku, beratika ulah aku. Ketegal tu, iya pan ngetu main game ke kasar.”—Jeremy.

 Perundingka: Ni maya asai ati Jeremy berengkah enda nyamai? Kemaya iya berengkah ningaka asai ati diri? Nama dipelajar nuan ari cherita Jeremy?

 Utai ke dipelajar: Asai ati ulih nentuka sapa nuan ti bendar, sereta nama prinsip pengidup nuan. Uji peresa asai ati nuan empu. Asai nuan, nuan nya orang ke baka ni?