Bup Kudus madahka, Jehovah “nadai kala enggai meri utai ti manah ngagai orang ke ngereja utai ti ngena.” (Masmur 84:11) Baka ni nuan ulih terus “ngereja utai ti ngena”? Nuan patut idup sejalai enggau semaya ti digaga nuan lebuh nuan nyerahka diri ngagai Jehovah. (Pengajar 5:4, 5) Baka ni nuan ulih mengkang tetap ati pengudah baptisa?

Ba artikel tu

•  Terus betan napi penusah

•  Terus nulak penguji

•  Terus ngemansangka pengeransing nuan

 Ayat kunchi: “Kitai patut napi mayuh pemerinsa ngambika ulih tama ngagai Perintah Petara.”—Surat Kereja Rasul 14:22.

 Reti iya: Semua orang Kristian deka napi penusah ba pengidup. Sekeda penusah datai laban nuan milih nyadi orang Kristian. Ambika chunto, nuan disakal tauka dikelese. Tang, sekeda penusah ke bukai, baka penyuntuk tauka penyakit, ditapi semua orang.

 Penekul: Bisi maya, gaya pengidup nuan deka berubah. Kekadang, ubah nya deka ngasuh nuan tusah ati. Bup Kudus nerangka utai ti enda manah ulih nyadi ngagai semua orang, enda ngira sida orang Kristian tauka ukai Kristian.—Pengajar 9:11.

 Utai ke patut digaga nuan: Ketegal nuan nemu diri deka napi penusah, nuan ulih besedia dulu sebedau natka penusah nya. Kingatka meh, penusah ke ditapi deka meri nuan peluang negapka pengarap diri lalu bepanggai agi ba Jehovah. (James 1:2, 3) Ila, nuan mega deka ngembuan runding ti sama baka rasul Paul ke nulis: “Aku ulih napi semua utai ketegal pengering ke diberi Petara ngagai aku.”—Pilipi 4:13.

 Tip: Belajar meh pasal Josep. Nuan ulih macha cherita pengidup iya ba Pemungkal bagi 37 sereta 39 ngagai 41. Perunding meh tu: Nama penusah ti enda disangka ke ditapi iya? Baka ni iya natka penusah nya? Baka ni Jehovah nulung Josep?

 Nama agi bantu ke bukai?

•   Bacha:

   “Chara Napi Penusah Ati Ketegal Penusah Ngenyit”

   “Baka Ni Aku Ulih Nyadi Orang ke Tan Ati?”

   “Cara Menghadapi Perubahan” dalam jaku Indonesia

•   Download:

   “Jika Ibu Bapa Kamu Sakit” dalam jaku Melayu

 Ayat kunchi: “Tiap iku orang diuji lebuh pengingin iya empu ngumpan iya sereta narit ati iya.”—James 1:14.

 Reti iya: Bisi maya, kitai semua diuji pengingin ti salah. Enti kitai enda nagang diri, pengingin nya tau ngujungka kitai ngereja utai ti salah.

 Penekul: Indah pengudah baptisa, bisi maya nuan deka diuji “pengingin ti salah.” (2 Peter 2:18) Tu nyengkaum pengingin ngereja pengawa seks sebedau kawin.

 Utai ke patut digaga nuan: Negapka diri diatu, sebedau nuan diuji. Tu deka ngelindung nuan ari ngaga pemutus ti salah lebuh diuji. Kingatka, Jesus madah: “Nadai orang ulih nyadi ulun dua iku tuan.” (Matthew 6:24) Nuan ulih milih sapa deka nyadi tuan nuan. Pilih meh Jehovah. Indah maya nuan bisi pengingin ti balat deka ngereja utai ti salah, nuan ulih ngelaban pengingin nya lalu milih ngereja utai ti betul.—Galatia 5:16.

 Tip: Belajar meh pasal pemanah sereta pengurang nuan empu. Pilih meh bakih ti nulung nuan ngemansangka kualiti ti manah. Seliahka orang, endur tauka situasi ti ngasuh nuan tusah ngereja utai ti betul.—Masmur 26:4, 5.

 Nama agi bantu ke bukai?

•   Bacha:

   “Baka Ni Aku Nulak Penguji?”

   “Baka Ni Aku Ulih Ngetu Berunding Pasal Seks?”

   “Cara Menolak Tekanan Teman” dalam jaku Indonesia

   “Adakah Anda Menjadikan Fikiran Yehuwa Fikiran Anda?” dalam jaku Melayu

 Ayat kunchi: “Terus rajin baka selama . . . lalu enda kakang nyentuk ke ujung, sereta ngambika kita enda nyadi malas.”—Hebrew 6:11, 12.

 Reti iya: Orang ke enda fokus tauka ngemeratka kereja iya deka lenyau pengeransing lalu nyadi malas.

 Penekul: Lebuh nuan baru dibaptisa, nuan tentu ransing sereta gagit ati, rinduka Jehovah enggau pengabis ati. Tang nyau kelama, nuan engka ngumbai enda senang nitihka semua pesan ari Jehovah. Tu ulih ngasuh nuan berasai asa ati sereta lenyau pengeransing.—Galatia 5:7.

 Utai ke patut digaga nuan: Terus meh ngereja utai ti ngena, indah ba maya nuan berasai enda entu ka ngereja nya. (1 Korint 9:27) Ba maya ti sama, terus nyemakka diri ngagai Apai nuan ba serega. Belajar pasal Jehovah ngambika nuan ulih ngelala Iya enggau manah agi lalu suah besampi ngagai Iya. Pia mega, terus nyemakka diri ngagai orang ti rindu nyembah Jehovah.

 Tip: Kingatka, Jehovah amat rinduka nuan lalu Iya besedia deka nulung nuan. Indah ba maya nuan kurang ransing tauka lemi semengat, Jehovah enda pedis ati enggau nuan. Bup Kudus madah: “Iya meri pengering ngagai orang ke lemi lalu ngeringka sida ke nadai daya agi.” (Isaiah 40:29) Jehovah deka merekatka nuan seraya nuan bebendar ngemansangka pengeransing nuan.

 Nama agi bantu ke bukai?

•   Bacha:

   “Kaum Muda—Teruslah Berusaha supaya Kamu Diselamatkan” dalam jaku Melayu

   “Bagaimana Beribadat kepada Allah Bisa Menyenangkan?” dalam jaku Indonesia

•   Peda:

   Nama Ku Nembiak Serambau Enggau Nuan—Pengidup ti Pemadu Manah Belama Iya

 Reti semua nya: Enti nuan mengkang tetap ati ngagai Jehovah, Iya deka lantang ati! (Jaku Dalam 27:11) Jehovah gaga ati lebuh nuan milih nyembah Iya, lalu Iya deka meri semua utai ti diguna ngambika nuan ulih mujur ngelaban Sitan.