Nuan tentu nemu, enti enda milih pemakai enggau manah, nya ulih ngerusak pengerai nuan. Nembiak ke enda gerai, pan enda gerai maya sida mansang tuai. Nya kebuah, nuan patut milih pemakai ti manah ke pengerai kenyau ari diatu.

•  Nama reti milih pemakai ti manah?

•  Baka ni aku patut terus disiplin diri empu milih pemakai ti manah?

•  Nama ku nembiak serambau nuan

 Bup Kudus ngelalau kitai ngambika “nemu nagang diri.” Tu nyengkaum chara kitai milih pemakai. (1 Timoti 3:11) Nya alai, kitai patut nemu . . .

•   Milih pemakai ti manah reti iya, makai semua tingkat pemakai. Bisi lima iti tingkat pemakai nyengkaum produk tenusu, protein, bengkah buah, bengkah sayur, enggau bijirin. Bisi orang enda makai sekeda ari tingkat pemakai tu, laban sida ngumbai tu chara sida ulih nurunka berat tubuh. Tang iya ke bendar, enti nuan ngereja nya, tubuh nuan enda chukup nutrien ke diguna.

   Uji tu: Giga pansik tauka tanya meh doktor pasal guna iya makai sekeda pemakai. Ngambika chunto:

   Karbohidrat ulih meri nuan pengering. Protein nulung nuan ari dirampit, lalu ngeraika tisu tubuh. Sekeda lemak, ke diempa dalam penyampau ti betul, ulih ngurangka ari penyakit jantung, lalu ulih meri nuan pengering ke chukup diguna tubuh nuan.

   “Aku makai semua pemakai ari tingkat pemakai. Kekadang nadai salah makai gula batu tauka pemakai segera. Tang anang kelalu suah. Nuan patut milih pemakai enggau chara ti betul.”—Brenda.

•   Nemu milih pemakai reti iya, enda kelalu dalam semua utai. Nuan patut makai enggau penyampau ti chukup. Ukai reti iya, enda makai tauka makai kelalu mayuh, tauka nyeliahka semua pemakai ke dikerinduka nuan.

   Uji tu: Pengelama sebulan, tuliska utai ke diempa nuan. Ni penyuah nuan makai kelalu mayuh? Nama ubah ke patut digaga nuan ngambika milih pemakai enggau betul?

   “Dalam beberapa hari, aku makai pemakai ke ngembuan kalori ti tinggi. Tang dalam beberapa hari ke bukai, aku mejal diri makai pemakai ke ngembuan mimit kalori. Tu ukai chara ti betul, nya kebuah aku mutuska enggai ngitung kalori agi. Tang aku ngaga ubah, enda makai kelalu mayuh, lalu ngetu enti udah kenyang. Tu begunaka awak, tang diatu aku ulih milih chara makai enggau betul.”—Hailey.

•   Ngaga atur. Bup Kudus madah: “Bejimat lebuh nuan ngaga pelan, nya baru nuan deka bulih mayuh utai.” (Jaku Dalam 21:5) Enti nuan deka milih pemakai ti manah, nuan patut udah ngaga atur dulu.

   “Nuan patut nemu ngaga atur ngambika milih pemakai ti manah. Kesuah agi pemakai ti manah nya, pemakai ke dipanduk ba rumah. Taja pan enda senang, tang asil iya amat manah lalu nulung nuan jimat agi.”—Thomas.

•   Ganti pemakai ke enda manah enggau pemakai ke manah. Bup Kudus madah: “Bepegai erat ba penemu-dalam enggau ba penalam runding nuan.” (Jaku Dalam 3:21) Enti bisi penemu-dalam, nuan ulih berundingka mayuh agi chara deka makai pemakai ti manah ke pengerai, lalu ngemansangka ulah ti manah tu.

   “Ninting hari, aku nganti siti pemakai ke enda manah enggau pemakai ke manah. Chunto, aku nganti gula batu coklat enggau buah ipul. Enda lama udah nya, aku ulih nganti mayuh pemakai ke enda manah enggau pemakai ke manah ninting hari.”—Kia.

•   Nemu tatak diri. Bup Kudus madah: “Empa meh pemakai nuan, lalu ngelantangka diri.” (Pengajar 9:7) Milih pemakai ti manah ukai reti iya, nuan enda ulih makai pemakai ke nyamai. Tauka nuan patut beratika tiap iti utai diempa ke tama ngagai mulut nuan. Taja pan nuan patut nurunka berat tubuh, kingatka meh, pengerai nuan nya beguna agi. Nya kebuah, patut ngembuan runding ti betul pasal pemakai.

   “Empai lama ti udah, aku lenyau 13 kilogram. Tang, sepemanjai timpuh nya, aku nadai kala enda makai, tauka enda makai sekeda pemakai, tauka nganu diri empu makai pemakai ke manis. Aku nemu, nurunka berat tubuh nya enda ulih jampat, tang aku ngubah chara aku makai.”—Melanie.