“Ninting hari, aku berengkah enggau musik maya aku ngereja pengawa. Maya dalam kerita, aku ninga musik. Maya benung belelak ba rumah, benung ngaduka utai, macha—pan aku ninga musik. Aku seruran ningaka musik.”—Carla.

 Kati nuan antu musik baka Carla? Enti au, artikel tu deka berandauka pasal guna musik, utai ke enda manah pasal musik, enggau chara milih musik enggau manah.

•  Guna musik

•  Utai ke enda manah pasal musik

•  Nama ku nembiak serambau nuan

 Musik sempama pemakai. Kitai deka gerai enti makai pemakai ti manah sereta dalam penyampau ke ngena nitihka tubuh kitai. Sama mega enggau musik. Perundingka:

•   Musik ulih ngasuh ati kitai lantang.

   “Maya aku tusah ati, aku ninga lagu ke dikerinduka aku. Udah nya, aku berasai nyamai agi.”—Mark.

•   Musik ngingatka kitai pengingat ti suba.

   “Kekadang, bisi lagu ke ngingatka aku pasal pengingat ti manis. Aku berasai gaga tiap kali aku ninga musik nya.”—Sheila.

•   Musik ulih nyerakup orang.

   “Aku datai ngagai konvensyen entarabansa Saksi-Saksi Jehovah. Maya semua ke datai belaguka lagu ti penudi, ati aku berasai ditegu nyentukka aku nyabak. Taja pan aku enda sebansa, tang musik nyerakup kami.”—Tammy.

•   Musik ulih ngemansangka kualiti ti manah.

   “Belajarka perengka musik ulih ngemansangka kualiti ti sabar sereta bisi disiplin. Kitai begunaka mayuh awak kena belatih ngambi landik.”—Anna.

 Nemu nuan? Masmur, bup ti pemadu tebal ba Bup Kudus, ngembuan 150 iti lagu.

 Baka pemakai ke udah jai, sekeda musik ulih ngachau kitai. Peratika sekeda kebuah tu:

•   Mayuh leka lagu enda manah didinga.

   “Nyauka semua leka lagu ngembuan seks. Orang nadai agi berasai malu maya belaguka nya.”—Hannah.

   Bup Kudus madah, “Tang pengawa bambai, enggau semua ulah ti kamah, tauka pengamu enda patut nyadi ba bala kita.” (Epesus 5:3) Tanya diri empu, “Kati musik ke dipilih aku ngena enggau lalau Bup Kudus tu?”

•   Sekeda musik ngasuh kitai tusah ati.

   “Kekadang maya malam hari, aku gali lalu ningaka lagu ti ngasuh aku ngingatka utai ngasuh aku tusah ati. Musik nya ngasuh aku ngembuan runding ti enda manah.”—Tammy.

   Bup Kudus madah, “Bejimat lebuh nuan berunding.” (Jaku Dalam 4:23) Tanya diri empu, “Kati musik ke didinga aku, ngasuh runding aku enda manah?”

•   Sekeda musik ngemansangka pengeringat.

   “Lagu ke ngembuan asai ati ti begedi sereta pengeringat, sempama panjuk ke aku. Tiap kali aku ninga lagu ke baka nya, emosi aku pan berubah. Diri sebilik aku pan ulih beratika nya.”—John.

   Bup Kudus madah, “Tang diatu buai semua utai nya ari kita, baka: pengeringat, ati ti ngeransi, ati ti bedendam, ati ti seruran deka bejakuka orang, enggau jaku ti kamah.” (Kolosi 3:8) Tanya diri empu, “Kati musik ke didinga aku ngasuh ulah aku majak kasar, nyentukka aku enda pedulika asai ati orang bukai?”

 Utai ke dipelajar, pilih meh musik enggau manah. Seiku nembiak ke benama Julie bebendar ngereja tu. Iya madahka, “Aku seruran meresa lagu ke dikembuan aku, lalu muai lagu ke enda tentu menyana. Enda senang, tang aku nemu nya endang utai ke patut dikereja aku.”

 Seiku nembiak indu ke benama Tara mega ngereja utai ti sama. Iya madah, “Kekadang ba radio masang lagu ti rindu didinga, tang pengudah nemu leka lagu iya, aku patut ngalihka stesen nya. Tu amat enda senang. Nya sempama, nuan benung makai kuih ti amat nyamai, tang patut muai iya! Tang, enti aku ulih nulak lagu ke ngembuan ulah seks, aku tentu ulih nulak pengingin ngereja ulah seks sebedau kawin. Aku enggai ngumbai musik nya utai ti mit aja, ti enda ulih ngachau pengidup aku.”