“Empai lama ti udah, aku tama ngagai siti kedai, lalu semina deka meda-meda aja. Tang maya aku pansut, aku udah meli siti utai ke mar, taja pan keterubah iya aku nadai pelan ka meli nya.”—Colin.

 Colin madahka tusah deka nagang diri ari bebelika utai. Kati nuan pan ngasaika utai ti sama? Enti au, artikel tu deka nulung nuan.

•  Nama kebuah patut nagang diri bebelika utai?

•  Chara ngereja nya

•  Nama ku nembiak serambau nuan

 Ku orang: Enti nuan kelalu irau pasal belanja, nuan enda ulih ngasaika pengaga.

 Fakta: Enti nuan nagang diri ari bebelika utai, nuan deka bulih mayuh agi pengaga ati, ukai kurang. Nitihka bup I’m Broke! The Money Handbook, “Mayuh agi penemu nuan pasal chara bebelanja, mayuh agi duit ke dikembuan nuan diatu tauka dudi hari.”

 Perundingka: Enti nuan nagang diri ari bebelika utai . . .

•   Nuan bisi duit maya nuan begunaka nya. “Aku deka raun ngagai Amerika Selatan,” ku seiku nembiak ke benama Inez. “Maya aku nyimpan duit, aku selalu ingatka juluk ati aku nya.”

•   Nuan kurang tauka enda kala berutang. Bup Kudus madah, “Enti nuan nginjau duit, nuan nyadi ulun orang ke nyali nuan duit nya.” (Jaku Dalam 22:7) Seiku nembiak indu ke benama Anna mega setuju. Iya madah, “Utang ulih nguasa idup nuan. Enti nuan nadai utang, nuan ulih ngiga utai ke deka tauka juluk ati nuan.”

•   Nuan nunjukka diri nemu berunding. Orang ke nemu nagang belanja diri, majak senang agi seraya sida mansang besai. “Tu latih ti manah ke aku, kelebih agi enti dudi hari aku deka ngidupka diri,” ku Jean ke beumur 20 taun. “Diatu aku benung nguji nyadi orang ke betanggungjawap agi maya ngatur belanja, ngambika dudi hari aku ulih baka nya.”

 Nyadika simpul: “Ngatur belanja ba diri empu siti chara nyediaka nuan ulih ngidupka diri,” ku bup The Complete Guide to Personal Finance: For Teenagers and College Students. “Ngatur duit enggau chara ti betul, siti chara ti ulih meri penguntung ba pengidup.”

 Nemu pengelemi diri. Enti nuan selalu enda chukup duit, pansik chara nuan ngatur belanja. Ba sekeda orang, bebelika utai nengah online nya meh penanggul sida. Iya ke bukai, enda berasai mansutka duit mimit-mimit nyentukka duit nya abis.

 “Belanja ninting hari ulih nyadi besai. Chunto iya, bebelika hadiah, ngagai kedai kupi, enggau meli barang ke bisi diskaun. Pengudah sebulan aku pan berunding, kini ke duit aku!”—Hailey.

 Tetapka belanja. Bup Kudus madah, “Bejimat lebuh nuan ngaga pelan, nya baru nuan deka bulih mayuh utai.” (Jaku Dalam 21:5) Ari netapka belanja, nuan ulih nentuka semua belanja ke dikena nuan nya, enda lebih ari gaji tauka duit ke diulih nuan.

 “Enti nuan ngena duit lebih ari ke patut, tentuka chara nuan ngena duit enggau manah agi, lalu anang bebelika utai ti enda diguna. Kurangka lis utai ke dibeli nuan ngambika nuan bisi chukup belanja.”—Danielle.

 Titihka belanja ti udah ditetapka. Bisi beberapa iti chara dikena ngurangka belanja. Sekeda nembiak ngasaika chara ba baruh tu chun ba sida.

•  “Kesuah iya, aku terus nyimpan duit ba bank, ketegal tu aku kurang ngena belanja laban udah disimpan.”—David.

•  “Maya aku ngagai kedai aku semina mai duit ke ngam-ngam aja, ngambika aku enda bebelanja lebih.”—Ellen.

•  “Enti aku nganti dulu sebedau meli sesiti utai, aku ulih nemu sekalika aku amat begunaka nya tauka enda.”—Jesiah.

•  “Ukai tiap kali bala kaban mai aku, aku patut enggau. Enti duit aku enda chukup, enda salah aku nulak.”—Jennifer.

 Batang ajar: Ngatur belanja siti tanggungjawap ti amat beguna. Nya meh utai ke ditemu Colin, ke disebut tadi. “Enti dudi hari aku nyadi tuai bilik, aku patut nemu ngelimat duit.” Iya madah, “Enti maya aku agi bujang udah nemu ngatur belanja, nya nulung maya aku kawin dudi hari.”