Enti nuan bisi internet, baka ni pan nuan nyeliahka diri, nuan tentu bisi tepedaka pornografi. “Nuan enda ibuh ngiga pornografi, tang pornografi ke ngiga nuan,” ku Hayley ke beumur 17 taun.

 Indah pornografi majak deka ngachau nuan ke majak nyeliahka iya. “Aku bebendar nyeliahka diri ari meda pornografi, tang nyau kelama aku labuh mega,” ku Greg ke beumur 18 taun. “Nuan enda ulih nyebut, nuan tentu ulih nyeliahka diri.”

 Kemayaharitu, pornografi bisi ba dini-dini endur. Nambahka nya, sexting majak tebilang lalu mayuh nembiak nganjung mesej tauka gambar sida ke ngayanka pengawa ti kamah.

 Nyadika pengingat: Penanggul ke ditapi nuan ke diatu, jauh besai agi ari penanggul ke ditapi apai indai tauka aki ini nuan maya sida agi biak kelia. Tanya iya, “Kati nuan ulih nyeliahka diri ari meda pornografi?”—Masmur 97:10.

 Au ulih. Nya bepanggai ngagai nama ke dipilih nuan. Tang nuan patut nemu, pornografi nya utai ti tau ngachau. Aram kitai beratika nama pemula enggau fakta pasal tu.

 Pemula: Pornografi enda ngachau.

 Fakta: Sempama baka insap ke ulih ngerusak lempuang nuan, baka nya mega pornografi ulih ngamah sereta ngerusak runding nuan. Petara meri kaul ti spesial nyadika pemeri ngagai seiku lelaki enggau seiku indu. Tang, pornografi enda bebasaka pemeri Petara tu. (Pemungkal 2:24) Nyau kelama, nuan mega enda ulih ngemidaka entara utai ti betul enggau salah. Ngambika chunto, beberapa iku pakar madahka, lelaki ke suah meda pornografi ngembuan runding ti salah ngagai orang indu, lalu ngumbai pengawa kasar enggau orang indu nya utai ti biasa aja.

  Bup Kudus bisi madahka, sekeda orang “nyau enda nemu malu agi.” (Epesus 4:19) Asai ati sida udah tumpul nyentukka sida nadai asai besalah agi lebuh ngereja utai ke salah.

 Pemula: Pornografi meri nuan penemu pasal seks.

 Fakta: Pornografi ngasuh nuan ngemansangka ulah ti amu. Nya ngasuh nuan meda orang bukai, semina endur kena ngemuaska pengingin nuan aja. Nitihka pansik, orang ke suah meda pornografi engka ngujungka iya enda ulih puas ba seks indah pengudah iya kawin.

  Bup Kudus ngelalau orang Kristian patut nyeliahka “pengawa bambai, ulah ti kamah, runding ti kamah, pengingin ti jai, enggau pengamu.” Pornografi meransang orang ngemansangka ulah ti jai tu.—Kolosi 3:5.

 Pemula: Orang ke enda meda pornografi nya enda nitihka chara kemayaharitu.

 Fakta: Orang ke enda meda pornografi ngembuan runding ti betul pasal seks. Sida ngumbai nya pemeri ari Petara kena negapka kaul entara seiku lelaki enggau seiku indu ke udah kawin, lalu patut tetap ati ngagai pangan diri. Orang ke bisi runding baka tu deka puas ba seks pengudah kawin.

  Bup Kudus madah enggau nyemetak pasal seks. Ngambika chunto, sida laki diasuh, “lantang ati diau enggau bini ke enggau nuan jadi, . . . Awakka iya nyerayung nuan ngena pengerindu.”—Jaku Dalam 5:18, 19.

 Baka ni enti nuan ngasaika tusah amat deka nagang diri ari enda meda pornografi? Keretas kereja “Cara Menolak Pornografi” dalam bansa jaku Indonesia ulih nulung nuan.

 Pechaya meh nuan ulih nyeliaka pornografi. Taja pan nuan udah teleba meda pornografi, nuan agi ulih muai ulah nya. Nuan deka bulih mayuh penguntung enti nuan enda meda pornografi.

 Peratika utai ke kala nyadi ba Calvin, iya ngaku diri bisi ulah deka meda pornografi maya iya dalam urung 13 taun. “Aku nemu nya salah,” ku Calvin, “tang aku enda ulih nyeliahka nya. Pengudah meda pengawa ti kamah, aku berasai amat besalah. Nyau kelama, apai aku nemu pengawa aku nya. Tang iya ke bendar, maya nya aku berasai gaga! Laban aku nemu diri deka bulih bantu ke diguna aku.”

 Diatu, Calvin udah mujur nyeliahka pornografi. Iya madah, “Aku amat nesal laban meda pornografi, indah nyentukka diatu pan aku agi bulih pemedis ketegal pengawa aku nya. Kekadang gambar ti kamah agi lekat ba untak aku. Pia mega, kekadang aku mega bisi pengingin deka meda gambar ti kamah. Enti nya nyadi, aku deka berunding pasal pengelantang, pemeresi enggau pemanah pengidup aku dudi hari, enti aku terus nitihka jalai pengidup ke ditetapka Jehovah.”