Sukan ulih mai pemanah tauka pemedis. Nya tepulai ngagai sukan ke dipilih nuan, chara nuan besukan, sereta penyampau jam ke dikena nuan besukan.

•  Nama pemanah iya?

•  Baka ni iya tau ngemedis?

•  Nama ku nembiak serambau nuan

 Sukan manahka pengerai. Bup Kudus mega nyebut, “matihka tubuh beguna.” (1 Timoti 4:8) Seiku nembiak lelaki ke benama Ryan madah, “Sukan ngasuh nuan seruran aktif. Nya jauh manah agi ari ke duduk ba rumah aja lalu main game.”

 Sukan ulih ngajar nuan pasal disiplin diri sereta chara bekerejasama enggau orang bukai. Peratika utai ti ulih dipelajarka kitai ari chunto Bup Kudus tu: “Orang ke belumba belanda endang mayuh, tang ka semina siku aja bulih prais.” Udah nya, ayat nya mega nyebut, “Genap iku orang ke belumba, enda tau enda disiplin diri empu.” (1 Korint 9:24, 25) Nama reti iya? Reti iya, kitai patut belajar nagang diri enggau bekerejasama ngambi ulih main nitihka chara ti udah ditetapka. Seiku nembiak indu ke benama Abigail mega setuju enggau tu. Iya madah, “Nengah sukan, aku belajar chara bekerejasama sereta chara berandau enggau orang bukai.”

 Sukan muka jalai nuan bulih kaban ti rapat. Maya besukan, kitai bisi peluang begulai enggau orang bukai. Seiku nembiak lelaki ke benama Jordan madah, “Nyauka semua sukan bisi pekit. Tang enti kitai ngena peluang besukan nya kena ngagaka ati aja, kitai ulih ngena peluang nya begulai rapat enggau bala kaban.”

 Bengkah sukan. Bup Kudus madahka, Petara “begedika orang ke mangah.”—Masmur 11:5.

 Sekeda sukan endang amat ngayanka pemangah. Chunto, seiku nembiak indu ke benama Lauren madah, “Ba sukan boksing, orang ke main nya sama bela numbuk pangan diri. Ketegal kitai orang Kristian, kitai patut nyeliahka diri dalam semua bengkah pengawa ke tau ngemedis. Nya alai, nama kebuah kitai rinduka pemerindang ti baka tu?”

 Perundingka: Kala nuan main tauka meda sukan ke ngayanka pemangah, tang nuan ngasaika sukan nya nadai ngachau nuan? Enti au, kingatka ayat ba Masmur 11:5. Ayat nya nunjukka, Petara ukai semina enda rinduka orang ke ngereja penyai, tang Iya mega “begedika orang ke mangah.”

 Chara besukan. Bup Kudus madahka, “Anang ngereja utai semina berundingka diri empu aja, tauka beduduk ba ati ti deka ngenyumbungka diri, tang enggau ati ti baruh, seruran ngumbai orang bukai pama agi ari kita.”—Pilipi 2:3.

 Enti sukan nya bisi belaban enggau orang bukai, tentu bisi orang deka menang. Tang enti nuan keran deka menang, main nya enda ngerinduka ati agi. “Asai ati ti deka bepekit amat jampat tama runding nuan,” ku seiku nembiak ke benama Brian. “Landik agi nuan dalam sesiti sukan, bebendar agi nuan patut ngemansangka pemaruh ati.”

 Perundingka: Seiku nembiak lelaki ke benama Chris madah, “Ninting minggu kami main bul, lalu selalu aja bisi orang pedis.” Nya alai tanya diri empu, “Nama kebuah selalu aja bisi orang pedis? Nama patut digaga aku ngambika nya enda nyadi?”

 Penyampau jam ke dikena. Bup Kudus ngelalau, “nemu milih utai ti pemadu badas.”—Pilipi 1:10.

 Nuan patut milih ni bagi utai ke pemadu beguna agi. Utai ke diguna ba pengarap nya patut dikemeratka. Enda ngira nuan meda tauka main sukan, nya tentu begunaka mayuh jam. “Aku selalu belaya enggau indai, laban iya ngasaika jam ke dikena aku meda sukan ba TV patut dikena ngereja utai ke beguna agi,” ku seiku nembiak indu ke benama Daria.

 Perundingka: Kati nuan ningaka lalau apai indai pasal utai ke patut dikemeratka? Seiku nembiak indu ke benama Trina madah, “Lebuh kami menyadi majak meda sukan lalu enda ngereja tanggung pengawa ke diberi, indai selalu ngingatka kami, semua pemain nya bisi orang mayar gaji sida enda ngira kami meda tauka enda. Lalu udah nya iya nanya kami, ‘Sapa mayar kita deh?’ Reti ku indai nya, nya endang sigi pengawa bala pemain nya. Tang enti kami enda bejalaika tanggung pengawa diri, kami enda ulih ngidupka diri empu dudi hari. Iya ke bendar, indai ngajar kami, meda tauka main sukan enda patut nyadi utai ke pemadu dikemeratka dalam pengidup kami.”