“Ba endur aku, nyauka semua orang ke beumur 25 taun ke baruh kala nginsap tauka vape.”—Julia.

Ba artikel tu

•  Utai ke patut ditemu nuan

•  Utai ke ulih dikereja nuan

•  Baka ni enggau ganja?

•  Nama ku nembiak serambau nuan

 Utai ke patut ditemu nuan

•   Nginsap ulih munuh nuan. Nikotin—bahan utama ba dalam insap—nya toksik sereta balat ngasuh gian. Direktorat Pencegahan dan Pengendalian Penyakit Tidak Menular Kementerian Kesehatan Republik Indonesia madahka tebiat ti pemadu balat ngachau pengerai mensia iya nya nginsap, tang risiko tu ulih diseliahka enti milih enda nginsap.

   “Kereja aku nya ngechek scan orang ba sepital, lalu aku udah meda mayuh scan ti nunjukka kesan ba tubuh orang ke nginsap. Aku tekenyit lebuh meda saluran darah pesakit ke kala nginsap balat sumbat. Aku enggai sesekali nguji nginsap, laban aku sayauka tubuh diri.”—Theresa.

   Nemu nuan? Insap ngembuan kira-kira 7,000 bengkah kimia lalu mayuh ari nya berachun. Ninting taun bejuta iku orang mati laban penyakit ketegal nginsap.

•   Lebuh orang vape, kimia ti berachun tama dalam tubuh. Bala pakar madahka, bisi orang ke ngena vape, pod tauka rokok elektronik ti udah ngerusak paru-paru sida lalu mati. Sama mega baka batang insap, mayuh bengkah produk vape ngundan nikotin. Nitihka pansik pasal rokok elektronik, nikotin ulih “ngasuh orang ke biak senang gian ngagai dadah ke bukai.”

   “Sekeda produk vape bisi asai ti manis, baka gula-gula kapas tauka buah ceri, ti narit bala anak mit enggau remaja. Ketegal nya nyamai, sida ngumbai nya enda bahaya.”—Miranda.

   Nemu nuan? Wap ari rokok elektronik ukai semina ai aja, tang mega ngundan kimia ti balat toksik ke ulih tama ke dalam paru-paru nuan.

 Utai ke ulih dikereja nuan

•   Ngiga fakta. Anang pechaya semua utai ke didinga nuan, ngambika chunto enti orang madah vape enda entu bahaya tauka ulih ngasuh muai stress. Gaga meh pansik kediri empu lalu gaga pemutus ti manah bepelasarka fakta.

   Prinsip Bup Kudus: “Orang ke beli deka arapka sebarang utai, tang orang ke pintar deka nyingkang enggau bejimat.”—Jaku-Dalam 14:15.

   “Lebuh nuan berunding pasal kesan ti enda manah ketegal nginsap tauka vape, nuan deka sedar, taja pan selebriti enggau orang ke serambau enggau nuan ngaga nya baka ke ngerinduka ati, tang nya bahaya.”—Evan.

   Perundingka tu: Kati orang biak ke nginsap tauka vape amat gaga ati? Kati sida tan napi stress diatu, enggau dudi hari? Tauka kati sida mai penusah ke diri empu ba dudi hari?

•    Ngiga chara ke manah agi kena mutarka stress. Sekeda chara ti manah kena mutarka stress nyengkaum sesais, macha bup tauka begulai enggau kaban ti meransang. Ketegal nuan sibuk ba mayuh pengawa ti manah, nuan nadai ngasai ka nginsap.

   Prinsip Bup Kudus: “Pengirau ati nuan ulih muai pengelantang, tang jaku ti siru deka ngelantangka ati nuan.”—Jaku-Dalam 12:25.

   “Sekeda orang madah nginsap tauka vape ulih muai stress. Tang, kebendar iya, asai ati tu enda lama aja lalu nuan deka merinsa lama ketegal kesan ari nginsap tauka vape. Bisi utai ke manah agi ke ulih dikereja kena mutarka stress.”—Angela.

   Perundingka tu: Nama sekeda chara ke ulih dikena nuan kena mutarka stress? Artikel “Tanya ari Bala Nembiak” ke betajuk “Baka Ni Aku Ulih Mutarka Asai Ati ti Irau?” ulih nulung nuan.

•    Besedia dulu napi tekanan ari bala serambau. Nuan engka napi tekanan ari bala ba sekula nuan tauka ari utai ke dipeda nuan. Ba wayang, cherita ba TV sereta media sosial, pengawa nginsap enggau vape nya baka ke best sereta ngagaka ati.

   Prinsip Bup Kudus: “Orang ke besai tuai . . . suah berunding, nyentukka runding sida udah dilatih ngambika nemu bida entara utai ti betul enggau utai ti salah.”—Hebrew 5:14.

   “Lebuh aku ba sekula, orang ke sekelas enggau aku bebasaka aku laban aku enda nginsap tauka vape. Pengudah aku enggau terang madahka diri enggai ngereja nya, sida nyukung aku. Lebuh orang bukai nemu pemutus nuan, nya ulih ngelindung nuan.”—Anna.

   Perundingka tu: Kati nuan ulih nyeliahka diri ari ditekan bala serambau? Ulih nuan ingat lebuh nuan mujur ngereja utai tu? “Rencana Tindakan” ba pelajar 15 ari bup Pertanyaan Kaum Muda—Jawaban yang Praktis, Jilid 2, dalam jaku Indonesia, ulih nulung nuan.

•   Pilih meh kaban enggau manah. Nuan deka senang agi nulak nginsap tauka vape enti kaban nuan sepenemu enggau nuan pasal utai tu.

   Prinsip Bup Kudus: “Enti nuan begulai enggau orang ke bepenemu-dalam, nuan deka nyadi orang ke bepenemu-dalam baka sida. Enti nuan bepangan enggau orang ke beli, nuan deka rusak.”—Jaku-Dalam 13:20.

   “Amat beguna lebuh nuan bekaban enggau orang ke bisi kualiti baka nemu nagang diri sereta tetap ati. Lebuh nuan meda utai ke manah nyadi ba sida, nuan deka nunda sida.”—Calvin.

   Perundingka tu: Kati kaban rapat nuan nyukung nuan nitihka gaya pengidup ti beresi sereta bepengerai, tauka sida ngasuh nuan tusah ngereja tu?

 Baka ni enggau ganja?

 Mayuh orang madahka ganja nya enda bahaya. Tang tu enda amat!

•   Bala nembiak ke ngambi ganja ulih nyadi gian. Nitihka pansik, ngambi ganja ulih ngerusak untak nuan sereta ngurangka IQ nuan.

•   Nitihka U.S. Substance Abuse and Mental Health Services Administration, “Orang ke ngambi ganja kesuah agi bisi penanggul enggau bala kaban tauka diri sebilik, nadai bulih asil ti manah ba sekula, enda mujur ba kereja sereta enda puas ati enggau pengidup diri.”

   “Ketegal aku bisi anxiety, aku berunding deka nginsap ganja. Tang lebuh aku berunding baru, aku nemu aku ulih nyadi gian, masau duit, indah tu ulih ngachau pengerai aku, lalu semua tu ulih ngasuh anxiety aku balat agi.”—Judah.