Maya nuan muka Bup Kudus, nuan deka meda mayuh leka jaku. Anang meh takut! Tang, uji meh gambarka Bup Kudus nya baka siti mija ke penuh enggau mayuh macham pemakai. Nuan tentu deka nyepi semua pemakai nya. Tang nuan ulih milih pemakai ti chukup ngambika ulih berasai kenyang.

 Ngambika ulih bulih mayuh penguntung ari macha Bup Kudus, nuan ulih fokus ngagai utai ke deka dibacha nuan. Artikel tu deka nulung nuan.

Ba artikel tu

•  Nama kebuah nuan patut fokus maya macha Bup Kudus?

•  Baka ni nuan ulih bulih penguntung ari macha Bup Kudus?

•  Nama ku nembiak serambau nuan

 Mayuh agi nuan berusaha macha Bup Kudus, mayuh agi penguntung ke deka diulih nuan. Uji bandingka tu: Enti sema sekejap aja nuan nepu sepikit mit teh dalam ai angat, teh nya deka nyadi kurang pekat. Tang, enti nuan lama agi ngerendam teh nya dalam ai angat, asai teh deka pekat agi.

 Sama mega maya kitai macha Bup Kudus. Ari ke jejampat macha Bup Kudus, kena meh lebih lama agi awak berundingka utai ke dibacha nuan. Nya meh utai ke digaga penulis Masmur. Lebuh iya macha Bup Kudus, ku iya madah, “Aku belematika iya sepemanjai hari.”—Masmur 119:97.

 Tang ukai reti iya nuan patut berundingka utai ke dibacha nuan sepemanjai hari. Reti iya ditu, Pemasmur nya ngena awak alai iya berundingka ayat Bup Kudus ke dibacha iya. Lalu tu meh ke nulung iya ngaga pemutus ti manah.—Masmur 119:98-100.

 “Bisi sekali indai madahka aku, ‘Nuan bisi tujuh hari dalam seminggu. Dalam tujuh hari nya, nuan udah ngaga mayuh hal kediri empu. Enda ke manah enti nuan ulih meri mimit awak ke Jehovah? Nya baru adil kan?’’”—Melanie.

 Lebuh nuan berundingka prinsip Bup Kudus, nuan deka pintar agi maya ngaga pemutus ti manah. Chunto iya, maya nuan milih kaban tauka maya nuan diuji ngereja pengawa ti salah.

•   Ngaga pelan. Siku nembiak indu ke benama Julia madahka, “Gaga meh jadual maya macha Bup Kudus. Peratika nama utai, kemaya, sereta dini nuan ulih macha Bup Kudus.”

•   Giga endur ti ngena. Siku nembiak indu ke benama Gianna madah, “Giga meh endur ke sunyi. Kelimpah ari nya, padahka diri sebilik nuan, ni maya nuan deka macha Bup Kudus ngambika sida enda ngachau nuan ba maya nya.”

   Enti nuan macha ngena talipun tauka tablet, tutup semua notifikasi. Nuan mega ulih macha ngena Bup Kudus ke dichelak. Iya ke amat nitihka pansik, orang ke macha ngena utai ke dichelak senang agi faham. Tang, tusah agi deka fokus lebuh nuan macha utai ke dipandangka nengah skrin.

   “Aku ngasaika, lebuh aku macha utai ke dipandangka nengah skrin, senang agi runding aku limpang. Aku bulih notifikasi, tauka bateri nyauka padam, tauka line Internet putus. Tang ari bup ke dichelak, semua nya nadai nanggul aku. Aku semina begunaka chukup penampak aja.”—Elena.

•   Besampi dulu. Pinta meh bantu ari Jehovah ngambika nuan ulih faham, ingat, sereta bulih penguntung ari sebagi utai ke deka dibacha nuan ba Bup Kudus.—James 1:5.

   Sejalai enggau sampi nuan, uji meh faham agi utai ke dibacha nuan. Baka ni? Enti nuan ngena aplikasi JW Library, tauka macha Bup Kudus nengah online, nuan ulih klik ba siti ayat kena meda artikel ke bukai, lalu ngiga mayuh agi pansik ke bukai.

•   Ngena tanya. Chunto iya, “Nama dipelajarka aku ari ayat tu pasal Jehovah? Nama sifat Jehovah ke ulih diteladan aku ari ayat tu?” (Epesus 5:1) Nama utai ke ulih dipelajarka aku ari tu, ti ulih dikena aku ba pengidup?” (Masmur 119:105) “Kati ulih aku ngena utai ke dibacha aku tu kena nulung orang bukai?”—Rome 1:11.

   Nuan mega ulih nanya diri empu: “Baka ni begian ke dibacha aku tu bisi kaul enggau batang ajar Bup Kudus?” Nama kebuah tu penting? Laban semua utai ke ditulis dalam Bup Kudus, ari bup Pemungkal ngagai bup Pemandang, bisi kaul enggau batang ajar Bup Kudus, iya nya nuchika nama Petara nengah Perintah Iya ba serega, sereta nunjukka Iya bisi hak merintah enggau chara ti pemadu manah.