•  Kekadang manah kekadang belaya

•  Dua iti kebuah patut bebaik

•  Nama ku nembiak serambau nuan

 Kekadang bala menyadi nuan nya ulih nyadi kaban nuan, tang kekadang sida mega orang ke ulih enggau nuan belaya. Nuan rinduka sida, sida mega rinduka nuan. Tang bisi maya, nuan engka ngasaika tusah deka bebaik enggau sida. Ku Helena ke beumur 18 taun, “Menyadi lelaki aku selalu ngasuh aku ringat.” Iya nambah agi, “Iya baka ke nemu utai ti ngasuh aku ringat!”

 Kati nuan selalu belaya enggau menyadi nuan? Enti nuan belajar chara berandau enggau manah, mayuh penanggul ulih diputarka. Chunto iya:

•   Dua iku menyadi lelaki ke bekunsi bilik engka belaya, ketegal sida ngasaika diri nadai awak kediri empu. Baka ni mutar? Belajar ngalahka diri, lalu bebasaka maya orang bukai deka kediri aja. Titihka meh prinsip ba Luke 6:31.

•   Dua iku menyadi indu engka ngena baju pangan diri tang nadai minta pemendar. Baka ni mutar? Kerandauka pekara nya, lalu tetapka tatak ti ngena. Titihka prinsip ba 2 Timoti 2:24.

 Kekadang penanggul ke nyadi ba entara bala menyadi, engka nyadi balat agi lalu ngenataika penusah. Peratika dua iti chunto ari Bup Kudus:

•   Miriam enggau Aron nerima asil ti enda manah laban sida chemburu ngagai menyadi sida, iya nya Moses. Bacha meh cherita tu ba Penyampau 12:1-15. Udah nya tanya nuan empu, “Nama nulung aku ngambika enda chemburu ngagai bala menyadi aku empu?”

•   Ketegal ringat, Kain munuh menyadi iya empu iya nya Abel. Pemungkal 4:1-12. Udah nya tanya diri empu, “Baka ni aku ulih nagang pengeringat diri lebuh bisi penanggul enggau bala menyadi aku?”

 Taja pan nuan tusah deka bebaik enggau bala menyadi nuan, tang pengawa nuan nya enda lebu. Peratika dua iti kebuah tu:

1.   Nunjukka nuan nemu berunding. “Suba aku jampat ringat enggau dua iku menyadi indu aku,” ku seiku nembiak lelaki ke benama Alex. “Diatu aku sabar agi enggau seduai iya. Ulih disebut, diatu aku nemu agi berunding.”

    Bup Kudus madah: “Enti nuan enda jampat ringat, reti nya nuan orang ke bepenemu-dalam.”—Jaku Dalam 14:29.

2.   Latih ti manah ke dudi hari. Enti nuan enda ulih sabar enggau pengelemi bala menyadi nuan ke diatu, baka ni nuan ulih sabar enggau kaling pengidup, orang ke sama gawa, tauka orang ke begulai enggau nuan dudi hari?

    Fakta ba pengidup: Pemujur pengidup nuan dudi hari bepanggai ba chara nuan bejaku enggau berunding. Latih tu ulih diulih nuan ari diri sebilik.

    Bup Kudus madah: “Enti ulih, seagi-agi utai nya bepanggai ba kita, diau bebaik enggau semua orang.”—Rome 12:18.

 Kati nuan begunaka tulung maya mutarka penanggul ba diri menyadi? Bacha meh begian “Nama ku nembiak serambau nuan”, lalu peda keretas kereja ke betajuk, “Chara Bebaik enggau Bala Menyadi.”