Artikel tu deka nerangka, utai ke patut ditemu nuan pasal

•  Ngagai sapa nuan SMS

•  Nama utai ke ditaip nuan ba SMS

•  Kemaya nuan nganjung SMS

Pia mega, artikel tu pan bisi madahka:

•  Chara nganjung SMS

•  Kuis SMS

 Ba mayuh nembiak, SMS nya siti chara berandau ke beguna ba sida. Enggau chara tu, nuan ulih ngiga orang ke ditemu nuan lumur talipun, asal aja apai indai agi ngemendarka nuan ngereja nya.

 “Apai, enda rindu meda aku enggau madi indu aku berandau enggau orang lelaki. Enti kami berandau enggau lelaki, kami patut ngena talipun rumah ke ba bilik besai, lalu patut bisi orang bukai ba dia.”—Lenore.

 Utai ke patut ditemu nuan: Enti nuan sepeneka ati meri lumur talipun ngagai orang, nuan deka nanggung penusah.

 “Enti enda bejimat, lalu meri lumur talipun nuan ngagai sebarang orang, nuan deka nerima SMS tauka gambar ke enda menuku.”—Scott.

 “Enti nuan selalu bemesej enggau orang ke enda sama penempa, senang agi nuan labuh pengerindu enggau iya.”—Steven.

 Ajar Bup Kudus: “Orang ke nemu berunding deka meda penusah datai, lalu belalai.” (Jaku Dalam 22:3) Enti nuan nemu bejimat, nuan ulih nyeliahka penanggul.

 Cherita amat: “Aku bekaban enggau seiku nembiak lelaki, lalu kami selalu bemesej enggau pangan diri. Ba aku, iya semina seiku kaban rapat aja. Tang iya madahka diri, bisi ati ngagai aku. Udah nya baru meh aku sedar, aku enda patut kelalu rapat sereta enda patut bemesej enggau iya.”—Melinda.

 Gambarka: Ba runding nuan, baka ni kaul Melinda enggau nembiak lelaki nya, pengudah nembiak nya madahka asai ati diri?

 Pikirka: Nama patut digaga Melinda ngambi nembiak lelaki nya ulih nyadi kaban iya, tang ukai lebih ari nya?

 Nganjung sereta nerima SMS ulih ngerinduka ati. Tang kingatka, ukai reti iya orang bukai ke nerima mesej nuan, ngembuan runding ti sama baka nuan. Nuan engka ulih ngasuh orang bukai saru penermu.

 Utai ke patut ditemu nuan: Orang engka ulih saru penemu pasal mesej nuan.

 “Lebuh orang macha SMS, sida enda ulih nemu nama ke bendar iya asai ati nuan, tauka ninga bunyi nyawa nuan, taja pan nuan ngena emoji tauka gambar. Tu meh ke ulih ngujungka saru penemu nyadi.”—Briana.

 “Aku ngelala beberapa iku nembiak indu ke ‘dichop’ enda manah perangai, laban sida selalu bemesej enggau orang lelaki.”—Laura.

 Ajar Bup Kudus: “Orang ke menyana berunding dulu sebedau sida nyaut.” (Jaku Dalam 15:28) Reti iya, sebedau nganjung SMS, bacha dulu, dah nya baru nganjung.

 Kena meh penemu-dalam lebuh nuan nganjung SMS. Udah nya, tetapka atur kediri empu pasal SMS.

 Utai ke patut ditemu nuan: Enti nuan nadai atur, orang bukai deka ngumbai nuan enda beradat lalu ngenyauhka diri.

 “Aku suah enda ingat ngayanka basa lebuh berandau enggau orang bukai. Chunto iya, maya benung makai, aku berandau enggau orang, tang ba maya ti sama, aku pan nganjung mesej ngagai orang bukai.”—Allison.

 “Bemesej lebuh deriba amat bahaya. Enti nuan enda fokus lebuh deriba, nuan engka ulih ngemedis diri empu sereta orang bukai.”—Anne.

 Ajar Bup Kudus: “Semua utai ti nyadi di dunya ti endang nyadi ba maya ti diletak, . . . maya enda bemunyi enggau maya bejaku.” (Pengajar 3:1, 7) Prinsip tu mega ulih dikena ba pekara bemesej!

Ngagai sapa nuan SMS

•  ;-) Ngasika atur apai indai.—Kolosi 3:20.

•  ;-) Anang sepeneka ati meri lumur talipun ngagai sebarang orang. Enti nuan ulih nyaga penerang pasal diri empu, nyengkaum lumur talipun, nuan ulih ngemansangka ulah ti beguna bendar seraya nuan mansang besai.

•  ;-) Anang kelalu rapat enggau seseiku orang nengah SMS, kelebih agi SMS ti romantik. Enti asai ati ti salah pansut, tu ulih ngenataika penusah.

 “Apai indai pechayaka aku, laban aku bejimat lebuh ngena handphone. Sida nemu, aku sigi enda meri lumur talipun sengapa aja ngagai orang bukai.”—Briana.

Nama utai ke ditaip nuan ba SMS

•  ;-) Sebedau naip SMS, tanya diri empu: “Kati patut aku nganjung SMS ke baka tu, ngagai orang ke benung napi situasi baka nya?” Engka manah agi terus betalipun, tauka betemu enggau orang nya.

•  ;-) “Enti nuan enda berani madahka sesiti utai ba mua seseiku orang, anang meh nyebut nya ba SMS,” ku Sarah ke beumur 23 taun.

 “Enti bisi orang nganjung gambar ke enda menyana ngagai nuan, padahka ngagai apai indai. Tu ulih nyaga nuan, lalu ngasuh apai indai pechaya agi ngagai nuan.”—Sirvan.

Kemaya nuan nganjung SMS

•  ;-) Tetapka tatak ngena talipun. “Maya aku belajar tauka makai, aku enda megai talipun,” ku seiku nembiak ke benama Olivia. “Maya aku datai begempuru, aku nutup talipun, ngambika aku enda dilimpangka.”

•  ;-) Bebasa. (Pilipi 2:4) Anang meh bemesej lebuh nuan benung berandau enggau seseiku orang.

 “Aku netapka atur kediri empu. Chunto iya, enda bemesej lebuh aku benung begulai enggau bala kaban. Aku mega enda meri lumur talipun ngagai orang ke enda rapat.”—Janelly.