Nuan patut nyaga barang ke berega ba nuan, baka rumah tauka kerita enggau manah. Sama mega, nuan patut nyaga kaul ti rapat enggau Petara. Pengudah dibaptisa, baka ni nuan ngetanka kaul ti rapat enggau Petara?

Ba artikel tu

•  Terus belajarka Bup Kudus

•  Terus besampi ngagai Jehovah

•  Terus bekunsika utai ti dipechayaka nuan

•  Terus datai begempuru

 Ayat kunchi: “Kena semua pemeri nya enggau pengabis ati nuan, ngambika semua orang ulih meda pemansang nuan.”—1 Timoti 4:15.

 Reti iya: Pengudah dibaptisa, nuan patut terus macha Bup Kudus, lalu berundingka utai ke dipelajarka nuan.—Masmur 25:4; 119:97.

 Penekul: Kekadang, nuan nadai ati deka belajar. Nya alai, nuan engka ngasaika diri enda pandai belajar.

 Utai ke patut digaga nuan: Pansik meh enggau dalam agi topik Bup Kudus ke ngerinduka ati nuan. Gaga meh atur belajarka Bup Kudus kediri empu. Tentuka jam sereta chara nuan belajarka Bup Kudus enggau litaricha Bup Kudus. Enti atur ke ditetapka nuan nya ngena, nuan enda ngasaika belajarka Bup Kudus nya siti pengawa ti ngenusahka. Maya belajar, kingatka tuju nuan ke deka ngenalamka agi pengerindu nuan ngagai Jehovah sereta Jaku Iya. Belajarka Bup Kudus kediri empu ukai semina meri penguntung, tang mega ngerinduka ati.—Masmur 16:11.

 Tip: Ngambika bulih penguntung, belajar meh ba endur ke sunyi sereta nadai utai ngachau.

 Nama agi bantu ke bukai?

•   Bacha:

   “Nama Kebuah Patut Macha Bup Kudus?—Begian 2: Macha Bup Kudus enggau Chara ti Ngerinduka Ati”

   “Baka Ni Chara Aku Belajar Fokus?”

•   Peda:

   Nama ku Nembiak Serambau Nuan—Macha Bup Kudus

•   Download:

   “Jadual Pembacaan Bible” dalam jaku Melayu.

 Ayat kunchi: ‘Anang irauka utai, tang dalam semua utai, bantaika semua peminta kita ngagai Petara ngena sampi, sampi peminta, enggau sampi terima kasih.’—Pilipi 4:6.

 Reti iya: Bejaku enggau Petara, siti randau dua hala: Nuan ninga jaku Petara lebuh nuan macha Bup Kudus, lalu bejaku ngagai Iya nengah sampi. Nuan ulih besampi minta bantu Petara, lalu beterima kasihka berekat ti diberi Iya ngagai nuan.

 Penekul: Kekadang, nuan ngasaika sampi nuan nadai reti laban nyebut utai ti sama. Nuan mega engka berengkah kakang, sekalika Jehovah amat ninga lebuh nuan besampi, tauka kati Iya ka berandau enggau nuan?—Masmur 10:1.

 Utai ke patut digaga nuan: Lebuh ngereja pengawa ninting hari, perundingka utai ke ulih disampika nuan. Enti nuan enda ulih nyebut leka sampi ti panjai ketegal situasi nya enda ngam, kingatka, nuan ulih ngereja nya ba maya ke bukai dalam sehari nya. Kelimpah ari nyebut pasal pengirau nuan dalam sampi, besampi mega ke orang bukai.—Pilipi 2:4.

 Tip: Enti nuan ngasaika sampi nuan enda berapa manah, padahka meh utai nya ngagai Jehovah. Iya deka nuan madahka semua utai, tauka semua pengirau nuan nyengkaum utai ke bekaul enggau sampi nuan.—1 John 5:14.

 Nama agi bantu ke bukai?

•   Bacha:

   “Nama Kebuah Aku Patut Besampi?”

•   Download:

   “Baka Ni Deka Ngemansangka Agi Sampi Nuan”

 Ayat kunchi: “Jaga diri empu, lalu jaga mega ajar ti diberi nuan ngagai orang. . . . enti nuan ngereja nya, nuan deka nyelamatka diri empu enggau orang ke mendingka nuan.”—1 Timoti 4:16.

 Reti iya: Lebuh nuan bekunsika utai ke dipechayaka nuan enggau orang bukai, nuan mega ulih ngeringka pengarap diri. Asil iya, nuan ulih nyelamatka nyawa orang ke ninga sereta nyawa nuan empu.

 Penekul: Kekadang nuan ngasaika diri nadai ati deka bekunsika utai ke dipechayaka nuan. Nuan engka takut, kelebih agi ba sekula.

 Utai ke patut digaga nuan: Tetapka prinsip enggai nejuka asai ati ti negatif meri kesan ngagai pengawa nuan. Rasul Paul nulis, “aku endang udah diasuh ngereja pengawa nya. Tulah meh aku enti aku enda nusui Berita Manah!”—1 Korint 9:16, 17.

 Tip: Enti apai indai udah ngemendarka, giga meh siku Saksi ke ulih nulung nuan, lalu nyadi teladan ti manah ba pengawa nginjil.—Jaku Dalam 27:17.

 Nama agi bantu ke bukai?

•   Bacha:

   “Mengapa Aku Takut Berbicara tentang Imanku?” dalam jaku Indonesia.

 Ayat kunchi: “Lalu aram kitai berundingka chara kitai tau nyungkak pangan diri . . . enda ngelengkaka pengawa begempuru.”—Hebrew 10:24, 25.

 Reti iya: Tuju kitai begempuru ketegal deka nyembah Jehovah. Kelimpah ari nya, bisi dua iti penguntung ketegal begempuru. Kesatu, bala menyadi ulih meransang nuan ba gempuru. Kedua, lebuh datai sereta bisi begian ba gempuru, nuan ulih meransang sida.—Rome 1:11, 12.

 Penekul: Kekadang, runding nuan engka limpang nyentukka nuan telepas poin ti penting ke disebut ba gempuru. Tauka, nuan engka ngetu begempuru enggau tetap. Nuan engka kelalu fokus ba pekara bukai baka kereja sekula, nyentukka nadai awak enggau begempuru.

 Utai ke patut digaga nuan: Gaga kereja sekula nuan. Taja pia, tetapka meh pengeran enggai ngelengkaka gempuru, lalu bisi pengingin deka ngulihka penguntung ba gempuru. Beri meh komen enggau sukarela. Pengudah begempuru, puji meh orang bukai ketegal komen sereta begian sida.

 Tip: Besedia tumu. Download aplikasi JW Library®, lalu kena tab “Meeting” kena nemu nama utai ke deka dikerandauka ba tiap iti gempuru.

 Nama agi bantu ke bukai?

•   Bacha:

   “Mengapa Harus Berhimpun?” dalam jaku Indonesia.