Anak mit indu nya duduk engkutung, belalai entara rumput ti panjai ba sebelah tebing sungai. Iya merening ngagai siti utai ke diengkah ba rumput panjai nya, enda jauh ari alai iya duduk. Iya ulih ninga ai Sungai Nile belubah-lubah rarat mansa iya. Indu utai terebai ngelingi iya, lalu ngachau, tang iya mengkang dia, tetap bejaga, nganti, sereta terus berati. Nama utai diperening iya? Siti bakul ke dipelali enggau tar, lalu dalam bakul nya, madi lelaki iya ke agi mit . Iya amat sinu, berundingka madi iya kediri aja, nadai daya. Taja pia, iya arapka pelan apai indai iya deka mujur. Laban tu aja chara madi lelaki iya ulih selamat.

 Anak mit indu nya sigi udah ngayanka pemerani, tang enti iya deka ngemujurka pelan nya, iya patut mengkang berani. Taja pan iya agi mit, tang dalam ati iya udah ngemansangka pengarap ngagai Petara. Siti utai deka nyadi sehari nya ti deka nguji pengarap iya. Lalu iya deka bepanggai ba pengarap iya, seumur idup. Lebuh iya nyau udah tuai, iya deka meda utai ti ngalitka ati, lalu iya deka diiring pengarap. Ba maya bukai, pengarap deka nulung iya napi penyalah diri empu. Sapa iya? Lalu nama ulih dipelajar kitai ari pengarap ke diayanka iya?

 Bup Kudus nadai madahka nama iya, tang kitai sigi nemu sapa anak mit indu tu. Iya tu Miriam, anak tuai Amram seduai Jokibit, dua iku orang Hebrew ke udah nyadi ulun ba menua Ejip. (Penyampau 26:59) Madi bunsu iya ke disimpan dalam bakul nya tadi, diberi nama Moses. Abang Moses nya Aron, ke beumur kira tiga taun. Taja pan kitai enda nemu enggau silik berapa umur Miriam maya nya, tang umur iya engka kira sepuluh taun ke baruh.

 Miriam dibesaika ba maya bansa iya amat merinsa. Orang Ejip ngumbai orang Hebrew engka deka ngerampas kuasa ba menua sida. Nya alai, sida nyadika orang Israel ulun lalu nekanka pengidup sida. Tang orang Hebrew tan natka pemerinsa nya, lalu majak beranak nyentukka penyampau sida majak nambah. Orang Ejip majak takutka sida, nya alai, sida nguji chara baru ti chukup jai. Raja Ejip meri pesan—semua anak lelaki orang Hebrew ke baru ada enda tau enda dibunuh. Tang, bisi dua iku indu bidan ti berani ke benama Siprah enggau Puah. Seduai iya belalai nejuka anak bansa Israel ke lelaki idup. Tentu Miriam udah nemu pasal pemesai pengarap ke diayanka seduai iya.—Pemansut 1:8-22.

 Miriam mega belajar ari pengarap apai indai iya. Pengudah Jokibit ngadaka seiku anak lelaki ti manah amat gamal, seduai laki iya Amram ngelalaika anak mit nya pengelama tiga bulan. Seduai iya enda takutka raja Ejip, lalu enggai nejuka anak mit nya dibunuh. (Hebrew 11:23) Tang sigi enda senang ngelalaika anak mit ke baru ada. Nyau kelama seduai iya patut ngaga pemutus ti amat ngenusahka ati. Jokibit nemu iya patut ninggalka anak nya ba siti endur alai iya deka dipeda, diambi, dijaga lalu dibesaika orang bukai. Uji gambarka asai ati seiku indai, seraya iya nganyam bakul nya, melali iya enggau tar ngambika enda masuk ai, lalu ngengkahka anak ke dikesayau iya ba Sungai Nile! Ati iya tentu telih ninggalka anak iya enggau chara nya. Utai ke ulih digaga iya, semina bebendar besampi ngambika anak iya nya likun. Engka iya ngasuh Miriam mengkang bejaga ba dia, ngemataka bakul nya lalu beratika nama utai deka nyadi ba anak mit nya.—Pemansut 2:1-4.

 Miriam lalu nganti. Nyau kelama iya tepedaka seraban indu mansang semak. Tang sida tu ukai orang Ejip sengapa aja. Nya meh anak indu raja Ejip, enggau bala indu orang gaji iya! Sida nurun ke Sungai Nile mandi. Miriam engka takut, tauka asa ati meda sida. Baka ni ku anak indu raja Ejip deka ngelanggar pesan apai iya, ke deka munuh semua anak lelaki Hebrew, lalu amat deka ngidupka anak mit tu? Tentu Miriam bebendar besampi maya nya!

 Orang keterubah ke tepedaka bakul ba entara rumput ti panjai, iya nya anak indu raja Ejip! Iya ngasuh ulun iya ngambi lalu mai bakul nya ngagai iya. Ayat Bup Kudus lalu madahka: “Lebuh anak indu raja nya ngebakka bakul nya, iya lalu meda siku anak mit ti lelaki dalam bakul nya. Anak mit nya nyabak.” Iya lalu nemu utai ke nyadi: Seiku indai ke ari bansa Hebrew benung nguji nyelamatka nyawa anak iya. Anak raja lalu berasai sinu ati meda anak mit nya. (Pemansut 2:5, 6) Miriam beratika semua utai ke nyadi. Iya ulih meda, anak indu raja nya berupai sinu ati sereta deka nulung anak mit tu. Miriam nemu, tu meh maya iya patut ngayanka pengarap lalu ngereja siti utai. Iya ngemeranika diri lalu mansang ngagai anak indu raja enggau bala orang gaji iya.

 Kitai enda nemu baka ni seiku anak ulun Hebrew deka diterima enti iya ngemeranika diri bejaku ngagai seiku ari ruang bilik raja Ejip. Taja pia, Miriam lalu terus terang nanya anak raja: “Kati tau aku madahka siku indu orang Hebrew ngambika iya ngibun anak mit nya ke nuan?” Miriam amat pintar nanya utai tu. Anak indu raja nya nemu diri enda ulih nusuka anak mit ke baru ada sereta ngibun iya. Engka iya berunding, manah agi anak mit nya ditusu seiku ari bansa iya empu dulu, lalu ila, iya empu ulih ngambu anak nya, lalu ngemesai sereta ngajar iya. Uji gambarka pengagit ati Miriam lebuh anak raja nya ngasuh: “Au, mupuk meh nuan.”—Pemansut 2:7, 8.

 Miriam lalu jampat pulai rumah. Tentu apai indai iya balat irau seraya sida nganti penatai Miriam. Kitai ulih ngambarka pengagit ati Miriam madahka indai iya berita ti manah tu. Jokibit ngumbai semua tu nyadi laban iring Jehovah. Nyadi, iya nitihka Miriam nikal baru ngagai anak raja Ejip. Engka Jokibit nguji ngelalaika pengagit ati iya lebuh ninga anak raja nya nyebut: “Bai anak mit tu, lalu ibun iya ke aku. Aku deka ngaji nuan.”—Pemansut 2:9.

 Sehari nya, Miriam belajar utai ti beguna bendar pasal Petara iya, Jehovah. Iya nemu, Jehovah ibuhka nembiak Iya, sereta ningaka sampi sida. Iya pan belajar, ukai semina orang besai tuai, tauka lelaki aja ke ulih nunjukka pemerani sereta pengarap. Jehovah ningaka sampi semua nembiak Iya. (Masmur 65:2) Endang manah enti semua kitai ingatka utai tu, enda ngira lelaki tauka indu, agi biak tauka udah tuai, kelebih agi laban kitai idup ba maya ti tusah tu.

 Jokibit nusuka anak mit nya lalu ngibun iya. Kitai ulih ngambarka Miriam amat sayauka madi iya. Engka iya ke nulung madi iya nemu bejaku, lalu ninga lebuh madi iya keterubah kali nyebut nama Petara iya, Jehovah. Tang nyau kelama, anak mit nya udah besai, lalu iya diberi ngagai anak indu raja Ejip. (Pemansut 2:10) Endang amat, sida sebilik tusah ati laban diserara. Anak indu raja Ejip nya lalu meri nama iya Moses. Tentu Miriam keran deka nemu, Moses deka nyadi orang ke baka ni maya iya udah besai. Kati iya deka mengkang rinduka Jehovah seraya iya majak besai, taja pan dibesaika dalam rumah raja Ejip?

 Nyau kelama, Miriam nemu nama penyadi ngagai madi iya. Tentu iya temegah ati lebuh nemu, madi iya ke udah besai tuai, mutuska deka nyembah Petara Jehovah, ari ke ngambi ulih ari semua peluang ke dikemisi iya ba rumah raja Ejip! Lebuh Moses udah beumur 40 taun, iya deka ngetanka bansa iya. Tang nya ukai maya ti ngena, lalu chara iya pan enda manah. Iya munuh seiku orang Ejip ketegal nyamah seiku ulun bansa Hebrew. Raja Ejip lalu ngiga Moses lalu deka munuh iya. Nya alai, Moses ngerarika diri ari menua Ejip.—Pemansut 2:11-15; Kereja Rasul 7:23-29; Hebrew 11:24-26.

 Miriam engka nadai ninga berita ari madi iya pengelama 40 taun. Moses ngibun bedus ba menua Midian ti jauh amat ari menua Ejip. (Pemansut 3:1; Kereja Rasul 7:29, 30) Betaun-taun Miriam nganti. Lebuh iya nyau udah tuai umur, iya ngasaika pemerinsa ke ditapi bansa iya majak balat.

 Lebuh Petara ngasuh Moses pulai ke menua Ejip ngambika ngelepaska orang Hebrew, Miriam udah beumur lebih 80 taun. Aron diasuh ngarika Moses bejaku, lalu seduai iya, ti sama bela madi lelaki Miriam, mansang ngagai raja Ejip minta iya ngelepaska nembiak Petara. Tang tiap kali seduai iya mansang ngagai raja, raja nya lalu nulak sida. Taja pan Jehovah udah ngenataika sepuluh iti tulah ba menua Ejip, raja nya agi kieh lalu enggai ningaka Moses seduai Aron. Tentu Miriam engau naka ulih nguji meransang sereta nyukung menyadi iya maya nya. Ke pengujung iya, pengudah genap iku anak tuai ti lelaki orang Ejip dibunuh, semua orang Israel diasuh pansut ari menua Ejip! Uji gambarka pemagas Miriam nulung orang bukai nyediaka diri pansut ari menua Ejip ti diuluka Moses.—Pemansut 4:14-16, 27-31; 7:1–12:51.

 Malam nya, semua orang Israel nya baka ke dipanjuk. Tunga ke mua nya Tasik Mirah, lalu bala soldadu Ejip mansang begagaika sida ari belakang. Miriam meda menyadi iya Moses, ngangkatka tungkat iya atas tasik, lalu ai tasik nya bebagi dua! Lebuh Miriam meda menyadi iya ngiring semua orang Israel meraka sungai nengah tanah ti rangkai, engka pengarap Miriam dikeringka baka ke nadai kala nyadi sebedau tu. Iya nemu diri nyembah Petara ti pemadu bekuasa, ti ulih ngamatka semua semaya Iya!—Pemansut 14:1-31.

 Pengudah semua sida pansut ari tasik ke bedinding nya enggau selamat, ai nya lalu bechamtum baru lebuh raja Ejip enggau semua soldadu iya mansa. Miriam meda enggau nyata, endang nadai raban soldadu ti sekering Jehovah. Semua orang Israel diperansang muji Jehovah ngena lagu. Miriam lalu ngiring semua indu bela belagu munyi tu: ‘Belagu ke Jehovah, laban Iya udah menang. Iya udah nikauka kuda enggau orang ke nepan kuda ngagai tasik.’—Pemansut 15:20, 21; Masmur 136:15.

 Nya meh utai ti pemadu ngalitka ati ke kala dipeda Miriam. Seagi iya idup, iya endang seruran ingatka utai ke nyadi sehari nya. Dalam cherita tu, Bup Kudus ngumbai Miriam seiku nabi indu. Miriam nya orang keterubah ke dikumbai nabi indu dalam Bup Kudus. Iya seiku ari mimit aja indu ke dipilih Jehovah megai tanggungjawap ti spesial tu.—Pengulu 4:4; 2 Raja 22:14; Isaiah 8:3 NWT a; Luke 2:36.

 Ari tu kitai nemu, Jehovah seruran meda kitai lalu iya deka ngupah kitai ti nunjukka diri baruh ati, bagas, sabar, sereta keran deka ngemuliaka Iya. Semua kitai ulih nunjukka pengarap ngagai Jehovah, enda ngira tuai biak, lelaki tauka indu. Pengarap ke baka tu endang ngelantangka ati Jehovah. Iya deka seruran ingatka sereta ngupah pengarap ke dipandangka kitai. (Hebrew 6:10; 11:6) Tu meransang kitai neladan pengarap Miriam!

 Peluang ti spesial gawa ke Jehovah, sereta tampak nama ulih mai mayuh berekat, tang nya mega ulih ngachau. Lebuh orang Israel dilepaska ari nyadi ulun di Ejip, Miriam engka nyadi indu ti pemadu tebilang ba bansa iya. Kati iya deka alah laban penyumbung? (Jaku Dalam 16:18) Sayau amat, iya mega dipanjuk penyumbung.

 Pengudah bebulan pansut ari menua Ejip, Moses gaga ati ngelaluka mentua iya Jetro, bini iya Sipora, enggau dua iku anak seduai iya datai. Moses udah jadi enggau Sipora lebuh iya diau di Midian pengelama 40 taun. Sipora engka udah dulu pulai ngagai menua diri, nemuai ngagai bala iya, lalu diatu, Sipora dibai apai iya pulai baru ngagai kem alai bansa Israel diau. (Pemansut 18:1-5) Uji gambarka pengagit ati semua orang Israel meda raban orang tu pulai! Engka mayuh ari sida amat deka betemu bini orang ke dipilih Jehovah nguluka bansa Israel pansut ari Ejip.

 Kati Miriam gaga ati nerima penatai Sipora? Keterubah iya, engka Miriam gaga. Tang nyau kelama, Miriam nyadi sumbung sereta kepapas. Iya engka takut diri deka diganti Sipora nyadi indu ti tebilang ba Israel. Miriam enggau Aron berengkah nyebut utai ti enda manah pasal Sipora. Tu ngujungka seduai iya bejaku enggau pemenchi sereta pedis ati. Keterubah, seduai iya mutap laban Sipora nya ukai bansa Israel, tang iya orang Kus. b Tang enda lama udah nya, seduai iya pan belabuh ngutuk Moses empu. Ku sida: ‘Kati Jehovah semina bejaku ngena Moses aja? Kati iya nadai udah bejaku ngena kitai?’—Penyampau 12:1, 2.

 Ari jaku seduai iya, kitai ulih meda, runding enggau asai ti tau ngemedis udah tumbuh dalam ati. Seduai iya enda nyamai ati enggau chara Jehovah udah ngena Moses, laban sida empu deka dipebasa orang sereta ka bekuasa agi. Kati Moses tu makai suap, tauka nguji ngemesaika diri? Enda. Amat, Moses enda sempurna, tang iya ukai orang ke sumbung. Bup Kudus madah: “Moses nya orang ke baruh ati. Nadai orang ke baruh agi ati ari iya di dunya tu.” Aron seduai Miriam endang enda patut bejakuka Moses baka nya, lalu seduai iya patut bejimat. Cherita Bup Kudus tu nampung: ‘Jehovah ninga jaku seduai iya.’—Penyampau 12:2, 3.

 Jehovah lalu tekala nya ngangauka tiga iku menyadi nya datai begempuru di Langkau Kain Jehovah. Gentilang remang, ti ngarika Jehovah empu ke bisi enggau sida, lalu pegari ba penama ngagai langkau kain nya. Jehovah lalu bejaku. Iya nganu Miriam seduai Aron, lalu ngingatka seduai iya pasal kaul ti spesial entara Iya enggau Moses, sereta pemesai pengarap Jehovah ngagai Moses. Jehovah lalu nanya: “Nya alai nama kebuah seduai berani bejaku ngelaban nembiak Aku Moses?” Miriam seduai Aron tentu balat takut. Jehovah ngumbai ulah seduai iya ti enda bebasaka Moses, mega ngayanka seduai iya enda bebasaka Jehovah.—Penyampau 12:4-8.

 Miriam lalu diukum. Nitihka penerang tu, kitai ulih ngumbai nya Miriam ke ngepunka ulah ti ngelaban tu, lalu meransang madi iya Aron sama ngelaban ipar seduai iya. Tekala nya, Jehovah ninggang Miriam enggau penyakit lan. Penyakit ti balat tu ngasuh “kulit iya bebali burak baka seluju.” Aron terus ngemaruhka diri, lalu ngasuh Moses minta Jehovah ngampunka seduai iya lalu madah: “Anang ngasuh kami duai merinsa natka ukum tu ketegal pemeli kami duai.” Moses, ke sigi amat baruh ati, nyabak ngangauka Jehovah: ‘O Petara, geraika iya!” (Penyampau 12:9-13) Jaku enggau ulah Moses seduai Aron, ti bendar minta Jehovah ngampunka lalu ngeraika Miriam, nunjukka Miriam amat dikesayauka seduai iya, taja pan iya ngereja penyalah.

 Jehovah ngayanka pengasih, lalu nyumanka Miriam ke udah nesal ati. Taja pia, Miriam patut dikuarantin, diserara ba luar kem orang Israel. Tentu nya amat ngemaluka Miriam. Laban diatu semua orang dalam kem nya nemu iya pansut ketegal disiplin ari Jehovah. Tang pengarap Miriam nyelamatka iya. Dalam ati, Miriam andalka Apai iya Jehovah seruran lurus, lalu Iya meri disiplin laban Iya amat sayauka Miriam. Nya alai, Miriam ngasi. Semua orang Israel ba kem nganti pemulai iya pengelama tujuh hari. Tentu Miriam berasai amat sunyi maya nya. Sekali agi Miriam ngayanka pengarap ti tegap, lebuh iya, enggau ati ti baruh, nejuka diri “dibai pulai baru.”—Penyampau 12:14, 15.

 Jehovah disiplin orang ke dikerinduka iya. (Hebrew 12:5, 6) Laban Iya sayauka Miriam, Jehovah ngemetulka runding iya ke udah nyadi sumbung. Disiplin nya enda nyamai ditapi, tang nya pan nyelamatka iya. Enggau ati ti baruh, Miriam nerima disiplin nya, lalu ngenyamaika ati Jehovah baru. Iya lalu idup nyentukka umur iya nyau manggai 130 taun. Enda lama sebedau bansa Israel tama ke menua ti udah disemaya, Miriam madamka seput ba Kades, di menua puang Sin. c (Penyampau 20:1) Beratus taun udah bekau nya, Jehovah ingatka pengarap Miriam enggau pengerindu sereta basa. Iya ngasuh nabi Iya, Mikah, ngingatka semua nembiak Iya: “Aku udah ngelepaska kita ari pengidup kita ke nyadi ulun. Aku udah ngasuh Moses, Aron enggau Miriam nguluka kita.”—Mikah 6:4.

 Mayuh utai ulih dipelajar kitai ari pengidup Miriam. Baka Miriam lebuh iya agi mit, kitai patut enggau berani ngetanka pengelurus sereta nyaga orang ke nadai daya. (James 1:27) Kitai mega patut neladan Miriam ti ngajar pesan Jehovah enggau gaga ati. (Rome 10:15) Baka Miriam, kitai mega patut belajar nulak runding ti negatif, nyengkaum pemenchi enggau ati ti kepapas. (Jaku Dalam 14:30) Lalu baka Miriam kitai patut baruh ati sereta sanggup nerima disiplin ari Jehovah. (Hebrew 12:5) Seraya kitai ngereja semua utai nya, kitai deka neladan pengarap Miriam.