Baru-baru tu, runding bala nembiak ke deka munuh diri majak nambah-menambah ba sekeda menua. Nama kebuah utai tu nyadi? Kati anak nuan mega bisi runding deka munuh diri?

Ba artikel tu

•  Nama kebuah apai indai patut peduli lebuh anak bisi runding deka munuh diri?

•  Baka ni nuan nemu anak nuan bisi pengingin deka munuh diri?

•  Enti anak nuan bisi runding deka munuh diri, nama patut digaga nuan?

 Kenyau ari 2009 ngagai 2019, tanda kemurungan ba mayuh ari pemelajar sekula menengah di Amerika Serikat majak betambah. a

 “Bala nembiak kemayaharitu napi penanggul ti lain ari ke suba . . . Kesan ari penanggul tu balat ngachau pengerai mental sida.”—Vivek H. Murthy, Pakar Bedah, Amerika Serikat.

 Prinsip Bup Kudus: “Ati ti selalu tusah deka ngasuh nuan mupuk mati.”—Jaku-Dalam 17:22.

 Peratika sekeda ari kebuah tu.

•   Utai ke nyadi. Kala anak nuan napi sekeda penanggul chunto iya, enda diterima, putus dalam sekeda hubungan, gagal ba sekeda pekara, tauka lenyau orang ke dikesayau? Enti pia, kati nuan sedar tu ninggalka kesan ti balat ngagai anak nuan? b

•   Perangai. Kati anak nuan ngetu begulai enggau bala kaban, tauka diri sebilik, tauka nadai minat ba pengawa ke suah dikereja iya? Kati anak nuan sanggup meri utai ti penting tauka dikesayauka iya ngagai orang bukai?

•   Utai ke disebut. Kati anak nuan bisi nyebut utai ke bekaul enggau pemati, tauka nyebut jaku, ‘Enda ke manah agi enti aku enda idup?’ Kati iya kala madahka diri, ngenusahka nuan?

   Amat, kekadang jaku ke disebut sida engka kasar tauka enda berunding. (Jop 6:3) Tang bisi maya utai ke disebut iya engka chara iya nunjukka diri minta tulung. Nya alai, anang enda pedulika sebarang utai ke disebut anak nuan, kelebih agi lebuh iya nyebut pasal pemati.

 Enti anak nuan bisi runding deka munuh diri, nuan ulih nanya, ‘Kati nuan udah berunding kemaya tauka baka ni nuan ngereja nya?’ Saut iya ulih nunjukka naka ni pemalat situasi tu, lalu ni maya pengelengkas nuan patut mutarka tu.

 “Sebagai apai indai, kitai engka enggai nanya bala anak, laban kitai takut nama saut sida. Tang enti sida madahka asai ati diri, manah agi enti kitai nemu nya.”—Sandra.

 Prinsip Bup Kudus: “Runding mensia baka ai ti ba telaga ti dalam, tang orang ke ngembuan runding ti dalam, ulih ngauk ai nya.”—Jaku-Dalam 20:5.

•   Kelala meh runding sereta asai ati anak nuan enggau sabar. Keterubah, puji meh kejujuran anak nuan. Udah nya nuan ulih madah, ‘Aku ka lebih agi faham pasal asai ati enggau utai ke nyadi ba pengidup nuan. Ulih nuan madahka aku nama utai ke nyadi ba nuan baru-baru tu? Tauka ulih nuan nerangka nama kebuah nuan berasai baka tu?’

   Dingaka enggau sabar saut anak nuan. Tagang meh diri ari madahka asai ati iya enda penting. Pia mega, anang berumban madahka nama chara ke ulih mutarka penanggul iya.

   Prinsip Bup Kudus: “Jampat ninga, tang lubah bejaku sereta lubah ringat.”—James 1:19.

•   Tentuka iya likun. Tulung anak nuan sedar lalu nuliska utai ba baruh tu:

   Tanda utai ke bahaya. Nama utai ke digaga tauka diperundingka iya sebedau iya bisi runding deka munuh diri?

   Pengawa ke ulih ngelimpangka. Nama pengawa ke ulih ngurangka stress iya sereta ngasuh iya ngetu berunding deka munuh diri?

   Tulung ke ulih diterima. Kati anak nuan bisi seraban orang ke ulih digiga iya lebuh iya begunaka tulung? Tu engka nyengkaum nuan empu, orang besai tuai ke bukai ti ulih dipechaya, pakar pengerai ba mental, tauka gerempung ke dilatih kena nulung orang ke bisi runding deka munuh diri.

   Prinsip Bup Kudus: “Bejimat lebuh nuan ngaga pelan, nya baru nuan deka bulih mayuh utai.”—Jaku-Dalam 21:5.

•   Mengkang bejimat. Anang ngetu ngemataka situasi anak nuan, taja pan iya udah berengkah berasai baik agi.

   “Lebuh anak lelaki aku madahka diri nadai agi berunding deka munuh diri, aku ngumbai penanggul iya udah ngetu. Tu penyilap ti besai. Sesiti utai ulih nyadi enggau enda dijangka, lalu tu ulih ngasuh runding ke deka munuh diri ulih datai baru.”—Daniel.

   Tulung anak nuan sedar pasal fakta asai ati: Tu sementara aja. “Nya baka mua hari,” ku jaku ke diambi ari bup The Whole-Brain Child. Pia mega enti kitai ngelansa jaku ke diambi ari bup nya madahka, ‘Baka ujan ke amat bisi, asai ati kitai ke tusah mega amat ulih nyadi. Tang baka mata panas ke datai pengudah ujan, asai ati ti tusah nya mega nemu berubah sereta lenyau.’

•   Padahka iya enda kediri: Padahka anak nuan, nuan sayauka iya. Iya mega ulih bepanggai ngagai sukung ari nuan. Nuan mega ulih madah, ‘Aku naka ulih ngereja semua utai ke ulih aku nulung nuan napi tu.’

   Prinsip Bup Kudus: “Pangan endang seruran ngayanka pengerindu sida. Nama guna bisi kaban belayan enti sida enda enggau natka penusah?”—Jaku-Dalam 17:17.