Semua berita ke dikenakutka kitai bisi ba dini-dini alai ba barang maya. Kitai ulih tepedaka nya ba TV, HP, tablet, sereta komputer. Lalu kesuah iya, semua berita ke dipandangka nya ngembuan video-video ti enda betapis.

 Baka anak mega meda nya.

 Berita ke enda manah nya, engka ulih ngasuh sida irau sereta takut. Nyadi, baka ni kita ke apai indai nulung bala anak?

•  Nama empas berita ti enda manah tu ngagai bala anak?

•  Nama chara ke ulih dikena nuan nulung bala anak?

•  Baka ni enti anak nuan nyengala meda utai ti ngenakutka?

•   Mayuh anak mit berasai tusah ati sereta takut. Sekeda anak mit, enda mantaika asai ati diri taja pan sida udah meda berita ti enda manah. Tang iya ke bendar, berita ke baka nya bisi empas ngagai sida. a Enti sema apai indai pan ulih berasai irau enggau sekeda berita, bala anak deka lebih agi irau.

•   Bala anak engka saru penemu. Chunto, sida engka ngumbai, berita ke dipeda sida engka nyadi ba ruang bilik sida. Lalu enti sida suah meda berita ti enda manah nya, sida pan engka ngumbai utai nya suah nyadi.

•   Bala anak engka ngumbai berita ke udah dilangkungka nya amat. Sida enda nemu, berita ke laku dipeda orang mayuh sengaja digaga baka nya, ngambika bisi piak bulih mayuh duit. Nyadi, bisi berita nya endang digaga ngambi mayuh orang meda lalu enda sabar deka nemu nama sambung iya.

•   Tatak meh pemayuh berita ke ulih dipeda anak nuan. Tu ukai reti iya, anak nuan enda ulih meda sebarang berita agi. Tang patut ingat, sekeda berita ke enda manah ti suah didinga, ulih meri empas ti enda manah ngagai anak nuan.

   “Kekadang, aku enggau laki aku berandauka berita ti enda manah ke ditemu kami. Tang kami enda sedar, berita nya meri empas ngagai anak kami ke ninga.”—Maria.

   Prinsip Bup Kudus: ‘Pengirau ati muai pengelantang.’—Jaku Dalam 12:25.

•   Dingaka anak nuan, lalu ayanka pengibuh. Enti anak nuan tusah mansutka asai ati diri enggau utai ke dipeda, asuh meh iya ngelukis nya. Kerandauka utai ti ngasuh anak nuan irau, ngena chara bejaku ke ditemu iya. Lalu, enda ibuh kelalu berandauka berita ke dipeda iya.

   “Anak kami berasai nyamai agi pengudah kami ninga lalu berandau enggau iya. Bala anak enda ulih ditulung enti kitai semina madah, ’Gaya hari kemayaharitu sigi baka nya. Nyadi, kitai patut nelebaka diri enggau pekara ke baka nya.’”—Sarahi.

   Prinsip Bup Kudus: “Jampat mending, lubah mansutka jaku.”—James 1:19.

•   Tulung anak nuan napi berita nya enggau chara ti betul. Chunto iya, maya bisi berita pasal anak mit ditabanka, mayuh orang ngumbai pekara nya mayuh nyadi. Enti anak nuan mega ngasaika utai ti sama, terangka ngagai iya, nuan deka ngelindung iya. Ingat meh, sekeda berita ke dipandangka ukai reti iya nya suah nyadi, tang ketegal nya jarang nyadi.

   “Tulung meh anak nuan, ngambika iya enda kelalu irau. Laban utai ke diasaika iya, datai ari runding iya. Nya kebuah, tulung meh anak nuan berundingka utai ti positif, ngambi pengirau sida ulih dikurangka.”—Lourdes.

   Prinsip Bup Kudus: “Orang ke bepenemu-dalam, berunding dulu sebedau sida bejaku.”—Jaku Dalam 16:23.