Idup enggau dua iku orang ke selalu belaya tentu enda senang. Nya kebuah, sekeda laki bini ke selalu belaya mutuska sarak. Laban sida ngasaika nya meh chara ti pemadu manah. Tang, kati nya amat?

•  Nama penusah ke diasaika bala anak maya apai indai sarak?

•  Kati anak aku ulih berasai lantang enti aku sarak?

•  Nama patut ditemu aku pasal ngemesaika anak enti udah sarak?

•  Kati bisi chara bukai?

 Nitihka pansik, ketegal sarak nyadi, bala anak deka ngasaika penusah ti berat. Sida engka ulih:

•   jampat ringat, irau, enggau kemurungan

•   ngereja ulah ti ulih ngenusahka diri empu tauka orang bukai

•   enda beberatka pelajar tauka enggai sekula

•   senang sakit

 Kelimpah ari nya, mayuh ari sekeda bala anak ngasaika sida meh kebuah apai indai sarak. Sida engka berunding, sida patut nagang apai indai sida ari sarak.

 Pengawa sarak engka ulih ngachau ulah bala anak nyentukka sida besai. Sida engka ngasaika diri enda beguna sereta pedis pechayaka orang bukai. Enti sida kawin, sida mega engka milih jalai sarak lebuh mutarka penanggul ba tikah sida.

 Utai ke dipelajar: Taja pan bisi orang engka ngasaika sarak nya manah agi ke bala anak sida, tang nitihka pansik, penemu sida nya salah. Penelope Leach, seiku pakar ngajar chara ngemesaika anak nulis, “Laki bini ke sarak ulih ngerusak pengidup anak sida empu.” a

 Prinsip Bup Kudus: “Anang semina berundingka diri empu aja, tang berunding mega ke orang bukai.”—Pilipi 2:4.

 Bisi orang ngasaika anak sida deka berasai lantang agi. Tang kingatka, utai ke diasaika apai indai bedau tentu sama enggau utai ke diasaika bala anak. Apai indai ke sarak milih, deka ngepunka pengidup ti baru. Tang kesuah iya, bala anak enda rindu enggau ubah, lalu sida tentu deka agi semak enggau apai indai.

 Pengudah interbiu beribu anak ke ngembuan apai indai ti udah sarak, bala pengarang bup The Unexpected Legacy of Divorce nulis, “Bisi siti utai ke ditemu ari semua interbiu tu, bala anak ke ngembuan apai indai ti udah sarak madahka diri enda lantang. Indah sida terus terang madah, ‘Maya apai indai aku sarak, aku ulih ngasaika pengidup aku nadai agi pengaga ati.’” Bup nya mega madahka asai ati bala anak, “dunya tu enda ulih dipechaya sereta ulih ngemedis.” Sida bisi runding baka nya, laban sida ngasai sereta meda, “orang ke pemadu semak ba pengidup sida patut ngetanka kaul enggau pangan diri, tang semua nya ancur magang.”

 Utai ke dipelajar: Bala anak engka enda berasai lantang pengudah apai indai sida sarak.

 Prinsip Bup Kudus: “Tang ati ti tusah ngasuh pengering lenyau.”—Jaku Dalam 17:2, NWT.

 Sekeda laki bini ke udah sarak, nguji ngemesaika anak sida baka sida bedau sarak. Tang, iya ke bendar, chara nya tusah dikereja. Nitihka pansik, laki bini ke udah sarak kesuah iya:

•   nadai mayuh awak begulai enggau anak

•   ngajar anak sida enggau dua standard ti enda sama

•   kelalu sayauka anak sida, laban sida berasai besalah

 Nambahka nya, bala anak ulih meda apai indai sida enda ulih dikearapka, laban sida enda bepegai ba semaya diri, ngambika chunto sida kala besemaya deka tetap ati tang sida sarak. Nya alai, bala anak tusah deka bebasaka apai indai sida, lalu sida engka bisi runding, ‘Nama kebuah aku patut ngasika sida?’

 Utai ke dipelajar: Ngemesaika anak enda senang enti laki bini udah sarak. Lalu ba bala anak, penusah tu berat agi.

 Prinsip Bup Kudus: “Anang ngereja utai ti tau ngasuh anak kita ringat, enggai ke sida alah semengat.”—Kolosi 3:21.

 Ari ke bebendar deka ngepunka pengidup ti baru, manah agi laki bini bebendar ngetanka tikah sida. Bup The Case for Marriage nulis, “Kekadang orang ngumbai, tikah ti bisi penanggul nadai peluang diaduka baru. Tang nya penemu ti salah. . . . Laki bini ke bebendar ngetanka tikah sida, taja pan enda senang, ulih ngasaika mayuh agi pengelantang.” Nya alai, ari semua utai ke udah dikerandauka kitai tadi, bala anak berasai lantang agi enti apai indai sida enda sarak.

 Taja pia, tu ukai reti iya seseiku orang nya enda ulih sarak. Bup Kuduus madahka, seseiku orang ulih minta sarak enti kaling pengidup sida butang. (Matthew 19:9) Taja pia, Bup Kudus pan bisi madah: “Orang ke pintar deka nyingkang enggau bejimat.” (Jaku Dalam 14:15) Laki bini ke deka sarak patut berunding enggau dalam, kelebih agi enti sida udah bisi anak.

 Amat, laki bini ke bisi penanggul ba tikah sida patut bebendar ngetanka kaul sida. Sida enda patut jampat putus pengarap. Petara pun tikah, ulih nulung laki bini nengah Bup Kudus. Bup Kudus ngembuan lalau ti pemadu manah, kena laki bini ngemansangka ulah ti beguna dalam tikah sida, lalu ulih ngetanka tikah sida sereta lantang.—Matthew 19:4-6.

 Prinsip Bup Kudus: ‘Aku tu Jehovah Petara kita, ti deka ngajar kita utai ke penguntung kita lalu nunjukka jalai ti patut ditengah kita.’—Isaiah 48:17.