Dalam Bup Kudus madahka, Petara deka kitai ngembuan “pengidup enggau pengadang. a (Jeremiah 29:11) Indah, siti ari tuju Petara meri kitai Bup Kudus ngambika kitai bulih “peransang ari Bup Kudus, kitai bisi pengadang.” (Rome 15:4) Baka ke udah dikerandauka, Bup Kudus ngembuan lalau ti amat manah, lalu ngasuh kitai ngembuan runding ti positif maya napi penekul ninting hari. Kelimpah ari nya, Bup Kudus pan bisi semaya jemah ila ti amat ngelantangka ati sereta nyadika pengadang kitai.

Artikel tu mega bejuraika

•  Baka ni Bup Kudus nulung kitai ngembuan pengadang?

•  Nama pengadang ke disemayaka ngagai semua orang?

•  Ayat Bup Kudus pasal pengadang

 Bup Kudus meri kitai penemu, ngambika ba semua pengawa ke dikereja kitai ulih mujur lalu kitai pan enda lemi semengat. Chunto iya:

•   Ngiga iring ari Bup Kudus. Masmur 119:105 madahka, “Leka jaku Nuan nyadika lampu tenggau aku nyadika tenggau jalai aku.” Lampu tenggau tauka pichit ti tampak nulung kitai senang agi meda utai ke mua, tauka utai ti jauh agi ari kitai. Nyadi, Bup Kudus nya sempama lampu pichit ti tampak. Lalau ari Bup Kudus ulih nulung kitai mutarka penanggul ke ba mua mata. Enggau chara nya, kitai ulih ngereja pengawa ninting hari enggau runding sereta ati ti positif. Taja pan kitai lelak ketegal napi sekeda penanggul, tang ajar ari Bup Kudus meri kitai pengering lalu “ngelantangka ati.” (Masmur 19:7, 8) Kelimpah ari nya, Bup Kudus ngasuh kitai nemu berunding enggau jauh. Reti iya, kitai nemu pasal semaya Petara ti deka ngenataika dunya ti manah jemah ila. Ketegal tu, kitai bisi pengadang nyentukka kitai ulih berasai lantang sereta puas.

•   Nerima bantu ari orang bukai. Lebuh kitai lemi semengat ketegal napi sesiti penanggul, suah iya kitai ka ngenyauhka diri ari diri sebilik sereta kaban rapat. Tang enti nitihka ajar Bup Kudus, nya ukai chara ti betul laban tu ulih ngujungka kitai ngaga pemutus ti salah, tauka ngereja utai ti beli. (Jaku Dalam 18:1) Ke bendar iya, orang ke semak, nulung kitai berunding enggau manah. Engka sida bisi sekeda chara ti ngena mutarka penanggul nya. (Jaku Dalam 11:14) Abis enda, sida engka ulih merindang ati kitai enggau meri kitai peransang, lalu nulung kitai betan nyentukka penanggul nya nyadi baik agi.—Jaku Dalam 12:25.

•   Besampi ngagai Petara. Dalam Bup Kudus nulis: ‘Serahka penusah nuan ngagai Jehovah, lalu Iya deka nyaga nuan.’ b (Masmur 55:22) Dalam Bup Kudus, Jehovah mega dikumbai ‘Petara ti pun pengadang.’ (Rome 15:13) Nuan ulih besampi ngagai Iya, lalu ‘nyerahka semua pengirau.’ Nuan ulih andal, Iya ibuhka nuan. (1 Peter 5:7) Nambahka nya, Bup Kudus pan bisi madah, Iya “deka ngaga kita nyadi baru, ngering sereta negapka kita.”—1 Peter 5:10.

•   Kingatka, penguji ke ditapi ulih negapka agi pengadang nuan. Dalam Bup Kudus bisi semaya, ‘Tang barang sapa mendingka [Petara], deka bulih pengelikun. Iya deka diau likun, lalu nadai kebuah takut. (Jaku Dalam 1:33) Chunto iya Margaret, seiku indu asal ari Australia. Pengudah rumah iya dipangka ribut, iya lenyau mayuh utai. Taja pia, iya enda lemi semengat. Indah iya belajarka utai ti amat beguna: Reta tengkira ulih lesap barang maya. Kenyau ari nya, iya bendar agi fokus ngagai utai ti amat beguna, iya nya diri sebilik enggau bala kaban iya, kaul iya enggau Petara, sereta pengadang ke disebut ba Bup Kudus.—Masmur 37:34; James 4:8.

 Dalam Bup Kudus bisi madahka pengadang ti manah ngagai semua orang, lalu pengadang nya deka nyadi enda lama da agi. (2 Timoti 3:1-5) Enda lama da agi mega, Petara deka ngereja pengawa Iya. Perintah Iya deka merintah serata dunya ari serega, lalu Iya ngena Perintah tu munaska semua utai ti enda lurus enggau pemerinsa. (Daniel 2:44; Pemandang 11:15) Nya meh Perintah ke disebut Jesus lebuh iya nyebut leka sampi, “Datai meh Perintah Nuan. Nyadi meh peneka Nuan di dunya.”—Matthew 6:9, 10.

 Dalam Bup Kudus enggau terang madahka kitai nama utai ka digaga Petara ngagai semua mensia. Ba baruh tu, nerangka sekeda pekara ke diasaika kitai lebuh Perintah Petara merintah:

•   Nadai agi lapar pungkang. “Tanah udah mansutka utai ti diketau.”—Masmur 67:6.

•   Nadai agi penyakit. “Nadai orang ke diau dalam menua kitai deka mutap madahka diri sakit”—Isaiah 33:24.

•   Nadai agi pemati. Petara “deka ngendas semua ai mata ari mata sida, lalu pemati nadai agi, nadai agi ngulit, nadai agi nyabak, nadai agi pedis, laban utai ti lama nyau nadai agi.”—Pemandang 21:3, 4.