Bah Besai amat kala nyadi. Petara ngasuh bah nya nyadi, kena munaska orang jai. Tang Petara ngasuh Noah ngaga bandung besai, ngambika orang manah sereta bala jelu ulih selamat. (Pemungkal 6:11-20) Kitai amat pechaya Bah Besai tu amat kala nyadi, ketegal nya kala ditulis dalam Bup Kudus, iya nya bup ti bepun ari Petara.—2 Timoti 3:16.

•  Fakta tauka cherita bula?

•  Nama kebuah Bah Besai nyadi?

•  Kati mensia nemu Bah Besai deka nyadi?

•  Baka ni gamal bandung Noah?

•  Ni pengelama Noah ngaga bandung?

•  Cherita lama, cherita bula, enggau sejarah pasal Bah Besai

 Dalam Bup Kudus endang bisi madah pasal Noah, enggau pasal Bah Besai ke kala nyadi. Noah enggau Bah Besai ukai cherita kelia aja tauka cherita bula.

•   Penulis Bup Kudus amat pechaya Noah endang amat bisi. Chunto, penulis Bup Kudus baka Esra enggau Luke, orang ke landik pasal sejarah, bisi nulis nama Noah dalam tiris peturun bansa Israel. (1 Bansa Israel 1:4; Luke 3:36) Penulis Bup Kudus ke bukai mega, baka Matthew enggau Luke, nulis jaku Jesus ke nyebut pasal Noah enggau Bah Besai.—Matthew 24:37-39; Luke 17:26, 27.

   Nambahka nya, Nabi Esekiel enggau Rasul Paul meransang kitai neladan Noah, laban iya seiku lelaki ti manah sereta kering ba pengarap. (Esekiel 14:14, 20; Hebrew 11:7) Enti Noah enda kala bisi, kati ka penulis Bup Kudus nya ngasuh kitai neladan iya? Tentu enda! Kitai ulih neladan Noah enggau lelaki sereta indu bukai ke bepengarap, laban sida amat bisi.—Hebrew 12:1; James 5:17.

•   Bup Kudus ngembuan penerang ti silik pasal Bah Besai. Rambai jaku Bah Besai enda berengkah ditulis enggau leka jaku “Bisi sekali maya jeman kelia,” baka cherita kelia ke bukai. Tang, maya nulis pasal Bah Besai enggau utai nyadi ke bisi kaul, Bup Kudus terus madahka hari, bulan, enggau taun. (Pemungkal 7:11; 8:4, 13, 14) Bup Kudus mega madahka kitai ni pemesai bandung ke digaga Noah. (Pemungkal 6:15) Semua penerang tu nunjukka Bah Besai nya fakta, ukai cherita bula.

 Nitihka Bup Kudus, sebedau Bah Besai nyadi, dunya tu penuh enggau orang jai. (Pemungkal 6:5) Bup Kudus mega madahka, dunya tu udah rusak laban “penyai udah ngelekai ngagai semua endur.”—Pemungkal 6:11; Jude 6, 7.

 Bup Kudus madahka, sebagi besai penanggul ke nyadi nya ketegal bala melikat ke jai ninggalka serega lalu jadi enggau indu mensia ba dunya. Udah nya, bala indu nya ngadaka anak ke dikumbai “orang ke besai gamal” (gerasi). Sida tu mai penyarut nyadi ba dunya. (Pemungkal 6:1, 2, 4) Nya kebuah, Petara ngaga pemutus deka munaska semua orang ke jai ba dunya, ngambika orang manah ulih ngepunka pengidup ti baru.—Pemungkal 6:6, 7, 17.

 Au. Petara madah ngagai Noah pasal utai ke deka nyadi, lalu ngasuh iya ngaga bandung kena nyelamatka sida sebilik enggau bala jelu. Noah nusui pasal Bah Besai ngagai semua orang, tang sida enda ibuhka berita nya. (2 Peter 2:5) Bup Kudus madahka, sida enda peduli “nyentuk ngagai maya ai bah datai lalu nabanka semua sida.”—Matthew 24:37-39.

 Bandung Noah baka siti kutak ti besai ke segi empat. Panjai iya 133 meter, pemesai iya 22 meter, lalu peninggi iya dalam urung 13 meter. a Noah ngena kayu ramu ti manah ngaga bandung, lalu begian luar sereta dalam bandung nya dipelali ngena tar. Bandung nya bisi tiga tingkat, enggau disapat mayuh bengkah bilik. Bisi pintu mua ari tisi, pia mega lubang penyenguk entara perabung enggau gandung bandung. Perabung bandung nya mega digaga singit mimit, ngambika ai ujan enda temengkang ba atas perabung nya.—Pemungkal 6:14-16.

 Bup Kudus nadai madah ni pengelama Noah ngaga bandung. Tang, ulih ditemu iya begunaka bepuluh taun ngaga nya. Maya anak tuai iya ada, umur Noah 500 taun. Lalu maya Bah Besai nyadi, iya beumur 600 taun. b—Pemungkal 5:32; 7:6.

 Petara ngasuh Noah ngaga bandung pengudah tiga iku anak lelaki iya mansang besai lalu kawin. Tu engka begunaka 50 nyentukka 60 taun. (Pemungkal 6:14, 18) Ari tu, kitai ulih nyimpulka, Noah engka begunaka dalam urung 40 tauka 50 taun kena nembuka bandung nya.