Bisi sekeda salin Bup Kudus, baka Bup Kudus Baru, ti ngena leka jaku “neraka” dalam beberapa ayat. (Masmur 16:10; Surat Kereja Rasul 2:27 a) Baka dipeda dalam gambar ba artikel tu, mayuh orang pechaya, neraka nya endur alai api mau belama iya, lalu orang jai diukum ba dia. Kati tu utai ti diajar Bup Kudus?

Dalam artikel tu

•  Kati neraka nya endur alai orang diperinsa belama iya?

•  Nama reti sempama Jesus pasal orang kaya enggau Lasarus?

•  Kati neraka semina mai reti orang nemu diri nadai kaul enggau Petara?

•  Kala bisi orang dibibaska ari neraka?

•  Ayat Bup Kudus pasal neraka, tauka Kubur

•  Leka jaku Bup Kudus dalam bansa jaku asal

•  Sejarah pasal ajar api neraka

 Enda. Leka jaku asal ti disalin nyadi “neraka” dalam sekeda salin Bup Kudus (“Sheol” dalam jaku Hebrew; “Hades” dalam jaku Gerika) mai reti “Kubur,” iya nya endur alai semua orang ke udah nadai. Bup Kudus nerangka semua orang dalam “Kubur” enda agi idup sereta enda wujud agi.

•   Orang ke udah nadai enda nemu utai, nyadi sida enda berasai sakit. “Di neraka ila endang nadai pengawa, nadai runding, nadai penemu, nadai penemu-dalam.” (Bup Pengajar 9:10, Douay-Rheims Version) Nadai bunyi orang diperinsa ba neraka. Bup Kudus madah: “Awakka orang ke jai, dipechat. Awakka sida enda bemunyi mansang ngagai dunya pemati. [neraka, Douay-Rheims].”—Masmur 31:17; King James Version (30:18, Douay-Rheims); Masmur 115:17.

•   Petara udah madahka upah dosa nya pemati, ukai pemerinsa ba api neraka. Petara udah madah ngagai mensia ti keterubah, Adam, enti orang ngelanggar adat Petara, sida deka mati. (Pemungkal 2:17) Iya nadai nyebut pasal pemerinsa ba api neraka. Pengudah Adam bedosa, Petara madah: “Nuan endang digaga ari amau, nya alai ngagai amau meh nuan pulai.” (Pemungkal 3:19) Reti nya, Adam deka nadai agi. Enti Petara deka nganjung Adam ngagai api neraka, Iya tentu deka madahka nya. Ukum ti ditetapka Petara kena orang ke ngelanggar adat Iya enda kala berubah. Lama pengudah Adam bedosa, Petara ngasuh siku penulis Bup Kudus nulis: “Upah dosa nya pemati.” (Rome 6:23) Nadai agi ukum ti bukai, laban “orang ke udah mati udah dilepaska ari dosa iya.”—Rome 6:7.

•   Ajar pasal pemerinsa ba neraka belama iya ngenusahka ati Petara. (Jeremiah 32:35) Ajar pasal pemerinsa ba neraka enda sejalai enggau utai ti dipadah Bup Kudus laban “Petara nya pengerindu.” (1 John 4:8) Iya deka kitai nyembah Iya laban kitai rinduka Iya, ukai ketegal kitai takut diperinsa ba neraka.—Matthew 22:36-38.

•   Orang manah mega ngagai neraka. Salin Bup Kudus ti ngena leka jaku “neraka” madahka bisi orang ke tetap ati, baka Jakop enggau Jop, ti ngagai neraka. (Pemungkal 37:35; Jop 14:13) Indah Jesus Kristus ngagai neraka sebedau iya diangkat ari pemati. (Surat Kereja Rasul 2:31, 32) Leka jaku “neraka” ti dikena dalam salin Bup Kudus tu, semina mai reti Kubur. b

 Sempama ti dipadah Jesus tu ditulis ba Luke 16:19-31. Sempama dalam Bup Kudus ngajar kitai pasal runding Jehovah. Sempama pasal orang kaya enggau Lasarus ukai cherita ti amat. (Matthew 13:34) Enti nuan deka nemu mayuh agi pasal sempama tu, peda meh artikel “Sapa Siku Lelaki ti Kaya sereta Lasarus?”

 Enda. Ajar pasal orang mati ti nemu diri nadai kaul enggau Petara enda sejalai enggau utai ti dipadah Bup Kudus. Bup Kudus ngajar, orang ke mati nadai nemu utai.—Masmur 146:3, 4; Bup Pengajar 9:5.

 Kala. Dalam Bup Kudus bisi cherita pasal semilan iku orang ti kala ngagai Kubur (disalin nyadi “neraka” dalam sekeda salin Bup Kudus) lalu diangkat ari pemati. c Enti sida sedar lebuh sida ba neraka, sida tentu deka madah ngagai orang pasal utai ti udah nyadi ngagai sida. Tang, nadai siku pan ari sida ti madahka diri diperinsa. Nama kebuah? Baka diajar dalam Bup Kudus, lebuh sida mati sida nadai nemu utai. Sida baka ke “tinduk” jenak.—John 11:11-14; 1 Korint 15:3-6.