Ukai. Bup Kudus nadai ngajar Maria nya indai Petara. Bup Kudus mega enda kala ngasuh orang Kristian nyembah tauka besugang ngagai iya. a Peratika kebuah iya:

•   Maria empu enda kala ngaku diri indai Petara. Bup Kudus mega nerangka Maria ngadaka ‘Anak Petara,’ ukai Petara.​—Mark 1:1; Luke 1:​32.

•   Jesus Kristus mega nadai kala madahka Maria nya indai Petara lalu patut diberi sembah ti spesial. Bisi sekali, seiku indu madahka Maria deka bulih berekat laban iya nyadi indai Jesus. Tang, Jesus ngemetulka runding iya lalu madahka, ‘Beberekat agi orang ke ninga lalu ngasika jaku Petara!’​—Luke 11:27, 28.

•   Leka jaku “Indai Petara” tauka “Theotokos” (orang ke ngadaka Petara) nadai ditemu dalam Bup Kudus.

•   Dalam Bup Kudus, leka jaku “Kuin Serega” nya siti ari pengarap pelesu ke disembah bansa Israel ke limpang, ukai Maria. (Jeremiah 44:15-​19) “Kuin Serega” nya engka nuju ngagai petara indu orang Babilon ke dikumbai Ishtar (Astarte).

•   Orang Kristian ba abad keterubah enda nyembah Maria tauka bebasaka iya enggau chara ti spesial. Nitihka seiku pemansik sejarah, orang Kristian ba abad keterubah “nulak pengawa nyembah mensia. Sida engka irau baka nyembah petara indu enti Maria diberi basa ti spesial.”​—In Quest of the Jewish Mary

•   Bup Kudus madahka Petara nya meruan bisi. (Masmur 90:​1, 2; Isaiah 40:28) Laban Petara nya nadai pun, nya alai, Iya enda begunaka indai ngadaka Iya. Kelimpah ari nya, nadai patut Maria ngandungka Petara, laban Bup Kudus enggau terang madahka indah semua serega enda chukup alai Iya diau.​—1 Raja 8:​27.

Maria nya Indai Jesus, ukai “Indai Petara”

 Maria nya orang Judah ke datai ari peturun David. (Luke 3:​23-​31) Iya seiku indu ti ngembuan pengarap ke kering sereta tetap ati. Nya kebuah Petara amat rinduka iya. (Luke 1:​28) Ketegal tu, Petara milih iya nyadi indai Jesus. (Luke 1:​31, 35) Maria enggau laki iya Josep, mega ngembuan beberapa anak ke bukai.​—Mark 6:3.

 Bup Kudus mega madahka Maria nyadi murid Jesus. Tang, Bup Kudus enda nerangka mayuh utai pasal Maria.​—Kereja Rasul 1:​14.