Maria Magdalin seiku ari murid Jesus Kristus ti tetap ati. Nama Magdalin engka ngangkatka nama menua Magdala (tauka engka Magadan), ti enda jauh ari Tasik Galilea. Iya engka kala diau dia.

 Maria Magdalin enggau seraban orang indu nitihka Jesus sereta murid iya ke bukai. Sida nulung nyediaka utai ti diguna Jesus enggau bala murid iya. (Luke 8:1-3) Maria empu meda chara Jesus diperinsa nyentukka mati. Pengudah Jesus diangkatka idup baru, iya mega seiku ari saksi keterubah ke meda Jesus.—Mark 15:40; John 20:11-18.

•  Kati amat Maria Magdalin nya seiku indu sundal?

•  Kati Maria Magdalin nya rasul ke rasul ti bukai?

•  Kati amat Maria Magdalin nya bini Jesus Kristus?

•  Sapa agi indu bukai ke dikumbai Maria dalam Bup Kudus?

 Dalam Bup Kudus nadai penerang ti nunjukka Maria Magdalin nya indu sundal. Tang dalam Bup Kudus semina bisi madahka, Jesus kala nyumanka iya ari tujuh iku roh ti jai.—Luke 8:2.

 Nama kebuah mayuh orang ngumbai iya kala nyadi indu sundal? Beratus taun pengudah iya mati, sekeda orang ngumbai iya indu (engka seiku ari indu sundal) ke masu kaki Jesus enggau ai mata, lalu ngeringka kaki Jesus enggau buk iya. (Luke 7:36-38) Tang, nadai ayat Bup Kudus ke nyukung penemu tu.

 Ukai. Gerija Katolik ngangauka Maria “Saint Maria Magdalin” enggau rasul ke rasul ti bukai. Sida munyi tu, laban iya seiku ari orang keterubah ke madahka berita pasal pengangkat Jesus ari pemati ngagai rasul ke bukai. (John 20:18) Tang ukai reti iya Maria nya rasul, ketegal iya madahka berita tu. Bup Kudus mega nadai kala meri iya gelar ke baka tu.—Luke 6:12-16.

 Bup Kudus tembu ditulis ba pengujung abad keterubah Masihi. Tang, beratus taun udah nya, piak gerija belabuh ngemeratka Maria lalu ngangauka iya “saint.” Ba abad kedua enggau ketiga, bisi orang nulis, sekeda ari rasul Jesus berasai chemburu ngagai Maria. Tang iya ke bendar, semua utai ke ditulis sida nya ukai bepelasarka Bup Kudus ke diiring roh kudus Petara, tang semina cherita ke digaga aja.

 Ukai. Dalam Bup Kudus enggau terang madahka Jesus enda kala kawin. a