Jesus mati ngambika mensia bulih pengampun dosa sereta pengidup ti belama iya. (Rome 6:23; Epesus 1:7) Pemati Jesus mega nunjukka, taja pan seseiku orang balat napi pemerinsa, tang iya agi ulih tetap ati ngagai Petara.—Hebrew 4:15.

 Pikirka baka ni pemati seiku lelaki ulih meri mayuh penguntung ngagai mayuh orang.

1.   Jesus mati ngambi dosa kitai diampun.—Kolosi 1:14.

    Mensia keterubah, iya nya Adam, ditempa enggau sempurna lalu nadai dosa. Tang, iya milih enda ngasika Petara. Ketegal Adam enda ngasi sereta bedosa, semua peturun iya pan ngembuan dosa. Bup Kudus nerangka, “Laban baka orang siku ke enda ngasi nya mai mayuh orang bedosa.”—Rome 5:19.

    Jesus mega sempurna, tang iya enda kala bedosa. Nya kebuah, iya ulih nyadi genselan kena “muai dosa kitai.” (1 John 2:2) Ketegal enda ngasi, Adam ngujungka semua mensia bisi dosa. Tang pemati Jesus, ulih muai dosa orang ke arapka iya.

    Adam baka ke nyual mensia ngagai dosa. Tang, lebuh Jesus mati ngarika kitai, iya baka ke meli kitai baru lalu kitai enggi iya. Ketegal tu, “kitai endang bisi siku Penyaup ke bejaku ngagai Apai ngarika kitai, iya nya Jesus Kristus ti lurus.”—1 John 2:1.

2.   Jesus mati ‘ngambika genap iku orang ke arapka iya enda mati tang bulih pengidup ti meruan belama iya.’—John 3:16.

    Taja pan Adam ditempa ngambika idup belama iya, tang dosa nya ngujungka iya nerima ukum mati. Nengah Adam, ‘dosa ti datai ngagai dunya nengah orang siku, lalu pemati datai laban dosa, nya alai pemati ngelekai ngagai semua mensia, laban semua bela udah bedosa.’—Rome 5:12.

    Tang, semina nengah pemati Jesus aja ulih muai dosa. Pia mega, nya ulih nginsil ukum mati ngagai orang ke arapka iya. Bup Kudus nyimpulka: ‘Ngambika, baka dosa ti merintah ngena pemati, baka nya mega pengasih merintah ngena pengelurus lalu mai ngagai pengidup ti meruan belama iya, ulih Jesus Kristus Tuan kitai.’—Rome 5:21.

    Endang amat, diatu mensia enda ulih idup belama iya. Tang, Petara besemaya Iya deka meri pengidup ti belama iya ngagai orang ke ngereja utai ti badas sereta ngidupka orang mati ngambi sida mega bulih penguntung ari tebus Jesus.—Masmur 37:29; 1 Korint 15:22.

3.   Jesus “ngasi nyentuk ke mati,” nunjukka kitai ulih tetap ati ngagai Petara enda ngira nama penguji tauka pemerinsa ke ditapi.—Pilipi 2:8.

    Taja pan Adam ngembuan runding sereta tubuh ti sempurna, tang iya enda ngasika Petara laban iya dekaka utai ti ukai enggi iya. (Pemungkal 2:16, 17; 3:6) Udah nya, munsuh Petara iya nya Sitan madahka, mensia tentu enda ngasika Petara enti sida nadai bulih nama-nama utai, kelebih agi enti nya bekaul enggau nyawa. (Jop 2:4) Tang, Jesus mensia ke sempurna ngasika Petara sereta tetap ati ngagai Iya taja pan iya diperinsa nyentukka mati. (Hebrew 7:26) Nya alai, kitai ulih nyimpulka: Tiap iku orang ulih tetap ati ngagai Petara enda ngira nama penguji tauka pemerinsa ke ditapi iya.

Sekeda tanya pasal pemati Jesus

•   Nama kebuah Jesus patut merinsa sereta mati ketegal deka nebus mensia? Nama kebuah Petara enda nginsil aja ukum mati nya?

   Adat Petara madahka, “upah dosa nya pemati.” (Rome 6:23) Petara enda belalaika pasal adat tu ari Adam, tang Iya madahka enti enda ngasika adat tu, Adam deka diukum mati. (Pemungkal 3:3) Lebuh Adam bedosa, Petara ti ‘enda kala bula,’ ngamatka jaku Iya. (Titus 1:2) Adam ukai semina mai dosa ngagai semua peturun iya, tang pia mega upah dosa, iya nya pemati.

   Taja pan mensia ke bedosa patut diukum mati, Petara ngayanka ngagai sida “pemesai pengasih Iya.” (Epesus 1:7) Petara udah nganjung Jesus nyadika tebus ti sempurna kena nebus semua mensia. Tu ngayanka pengelurus sereta pemesai pengasih ari Petara.

•   Kemaya Jesus mati?

   Jesus mati kira-kira pukul tiga lemai maya pengerami Paska. (Mark 15:33-37) Nitihka kelinda kemayaharitu, haribulan nya kena Hari Lima, 1 April, 33 M.

•   Dini Jesus mati?

   Jesus diukum mati ba “Endur Keruntuk, ti dikumbai Golgota dalam Hebrew.” (John 19:17, 18) Maya jeman Jesus, endur tu ba “luar nengeri” pintu kuta Jerusalem. (Hebrew 13:12) Laban dalam Bup Kudus madahka bisi beberapa iku orang “nengkila ari jauh” meda Jesus diukum, nya nunjukka endur nya engka ba atas siti bukit. (Mark 15:40) Tang, kemayaharitu endur ke dikumbai Golgota nya enda ulih ditemu agi.

•   Baka ni Jesus mati?

   Taja pan mayuh orang ngumbai Jesus mati ba regang, Bup Kudus madahka: “Tulah meh semua orang ke digantung ari kayu.” (Galatia 3:13) Penulis Bup Kudus ngena dua iti leka jaku Gerika iya nya, ­stau·rosʹ enggau ­xyʹlon, kena nerangka perengka ti dikena ngukum munuh Jesus. Mayuh pakar madahka dua iti leka jaku tu mai reti siti tiang ti lurus ke digaga ari kayu.

•   Nama chara kena ngingatka pemati Jesus?

   Ba malam Paska diintu, Jesus ngepunka siti pengawa ti senang. Iya ngereja pengawa nya begulai enggau bala murid iya, lalu mesan sida: ‘Kereja tu kena ngingatka aku.’ (1 Korint 11:24) Beberapa jam udah nya, Jesus diukum bunuh.

   Penulis Bup Kudus nyemaka pemati Jesus enggau bedus maya pengerami Paska. (1 Korint 5:7) Baka pengerami Paska ke ngingatka orang Israel pasal sida dilepaska ari nyadi ulun, pia mega Ngingatka Pemati Jesus ngasuh semua orang Kristian ingat sida udah dilepaska ari dosa enggau pemati. Nitihka kelinda ba Bup Kudus, Pengerami Paska diintu ninting taun kena 14 Nisan. Nya kebuah, orang Kristian dulu suba mega ngintu pengawa tu setaun sekali.

   Ninting taun, bejuta iku orang ba serata dunya ngingatka pemati Jesus kena 14 Nisan.