Dosa nya semua utai ke bekaul enggau pengawa, asai ati sereta runding ti enda sejalai enggau adat Petara. Tu nyengkaum ngelanggar pesan Petara sereta ngereja utai ti salah ba mata Petara. (1 John 3:4; 5:17) Dalam Bup Kudus mega madahka, orang ke nagang diri ngereja utai ti bendar mega ngereja dosa.—James 4:17.

 Nitihka jaku asal ba Bup Kudus, leka jaku dosa mai reti “enda kena tagit”. Ambika chunto, sekeda ari bala soldadu jeman kelia suba amat landik nikauka batu, lalu “enda kala enda kena tagit”. “Enda kala enda kena tagit” sama reti enggau “enda kala ngereja dosa”. (Pengulu 20:16) Nya kebuah kitai ulih nyimpulka, enti seseiku orang nya enda kena tagit tauka enda ulih ngasika adat Petara ti sempurna, iya bedosa.

 Ketegal Petara nya meh Penempa, nya alai Iya bisi hak nentuka ukum ngagai mensia. (Pemandang 4:11) Kitai patut madahka pasal diri empu ngagai Petara enggau semua pengawa kitai.—Rome 14:12.

Kati amat seseiku orang nadai kala ngereja dosa?

 Enda. Bup Kudus madahka, ‘semua bela udah bedosa magang lalu jauh ari mulia Petara.’ (Rome 3:23; 1 Raja 8:46; Pengajar 7:20; 1 John 1:8) Nama kebuah baka nya?

 Mensia keterubah iya nya, Adam sereta Awa, nadai dosa. Seduai iya digaga enggau sempurna sereta ngembuan ulah ti manah sebaka enggau Petara. (Pemungkal 1:27) Tang, seduai iya nyadi enda sempurna pengudah seduai iya ngelanggar adat Petara. (Pemungkal 3:5, 6, 17-19) Ketegal nya, semua peturun seduai iya mega bedosa sereta enda sempurna. (Rome 5:12) Nya meh kebuah Raja David madahka, “Aku endang jai kenyau ari ada.”—Masmur 51:5.

Kati dosa bisi mit, bisi besai?

 Bisi. Ambika chunto, Bup Kudus madahka orang Sodom jeman kelia ‘ngereja utai ti amat jai, lalu dosa sida iya amat besai.’ (Pemungkal 13:13; 18:20) Peratika tiga pekara kena nentuka mit besai sesiti dosa nya.

1.   Pemesai dosa. Bup Kudus ngingatka kitai, ngambi nyeliahka diri ari ngereja dosa ti besai, baka ngereja ulah ti kamah, nyembah engkeramba, ngenchuri, mabuk, ngerumpak, bebunuh, sereta bemanang. (1 Korint 6:9-11; Pemandang 21:8) Tang Bup Kudus enda ngumbai tu sama enggau dosa ti enda disengaja. Ambika chunto, jaku tauka ulah ti enda disengaja ke ngasuh orang bukai pedis ati. (Jaku Dalam 12:18; Epesus 4:31, 32) Taja pia, Bup Kudus ngelalau kitai, anang enda betatika dosa ti mit. Laban nya ulih ngujungka kitai ngereja dosa ti besai ke ngelaban adat Petara.—Matthew 5:27, 28.

2.   Kebuah bedosa. Bisi orang ngereja dosa ketegal sida enda nemu nama utai dikedekaka Petara. (Kereja Rasul 17:30; 1 Timoti 1:13) Taja pan nya salah, Bup Kudus enda ngumbai nya dosa ti disengajaka. Laban sida ukai sengaja ngelanggar adat Petara. (Penyampau 15:30, 31) Dosa ke sengaja dikereja datai ari ati “ti jai.”—Jeremiah 16:12.

3.   Penyuah ngereja dosa. Bup Kudus mega enda ngumbai dosa ke semina sekali aja dikereja, enggau dosa ke suah dikereja dalam sesiti timpuh ke lama nya sama. (1 John 3:4-8) Bisi orang majak ngulang dosa ti sama, taja pan sida udah nemu chara ngambika enda ngereja dosa nya agi. Orang ke baka nya deka diukum Petara.—Hebrew 10:26, 27.

 Orang ke ngereja dosa ti besai deka ngasaika diri besalah. Ambika chunto, Raja David nulis, “Aku lemas dilamun bah dosa aku. Dosa aku kelalu berat.” (Masmur 38:4) Tang dalam Bup Kudus bisi jaku ti ngelantangka ati: ‘Awakka orang ke jai, ninggalka jalai pengidup sida lalu ngubah chara sida berunding. Awakka sida nguingka diri ngagai Petara kitai. Iya endang kasih, lalu jampat ngampun.’—Isaiah 55:7.